Bikh. 2

Liliicha lia Roho Omutakatifu

1 # Bal. 23.15-21; Likh. 16.9-11 Nga endaalo eya Pendekositi ne yoola, basuubili boosi baba bebuusiisie abuundu alala. 2Ao ne nao lutiri lwauliilikhana khukhwama mwikulu nga lwe khungu engali ne uucha, mala yechula munju nimwo baba ne bekhaale. 3Nio, babona sisiabonekha nga chinimi che kumulilo, chasalaanila ne khukhwiikha khu buli mundu owabamo. 4Boosi bechusibwa ne Roho Omutakatifu, barakikha khulomaloma mu nimi chichiindi nga Roho Omutakatifu ne aabanyalila khulomaloma.

5Babao Bayaudi be dini ba bamenyanga mu Yerusalemu, ba bama mu mbeka choosi che sibala. 6Nga ne baulila luyoka olwo, becha alala mala boosi besiindukha lukali, sikila buli mulala khu nibo aulila basuubili ne balomaloma buli mundu mu lulomo lwewe. 7Mukhurangararwa ne mukhwisiindukha bareebana bali, “Babaandu balomaloma bano se bali Bakalilaya? 8Nono, aba kali kariena, buli mulala khwifwe alaulilanga niko balomaloma mu nomo chefwe ching'ene? 9Balala khu khwama Paritia, babaandi Medesi ne Elamu, ne babaandi Mesopotamia, e Buyuda, ne Kapatosia; nende be Pondiasi ne Esia, 10khukhwama Firikia ne Pamufilia, khukhwama e Misiri ne lubeka lwa Libia embi Kireni. Balala khwifwe bakeni khwama e Burumi, 11Bayaudi nende Be Chikholo ba bafukiilila edini eye Siyuda, ne balala khwifwe bama e Kurete ne Ebuaraabu ne kakhali fwesi khubaulila ne balomalomela mu nomo chefwe bibiindu biboofu nibio Wele akholile!” 12Barangararwa lundi bauka lukali, mala bachiililila khureebana bali, “Kano kekesia siina?”

13Ne kakhali, babaandi bakholela babasuubila siienyameno bali, “Babaandu bano bameelile!”

Burume bwa Petero

14Mala Petero eema alala ne barumwa basie ekhumi na mulala, mala arakikha khuboolela babaandu bakali abo ne kumumilo kwe angaaki ali:

“Bayaudi basiaase, ne nanywe mwesi mumenyile mu Yerusalemu, khemundekeeresie muboolele sifuno sie kamakhuwa kano. 15Babaandu bano se bameelile nga ne mwibaasia tawe; chili busa chisa chitaru che kumutikhinyi.” 16Ne kakhali kano niko omung'oosi Yoeli aaloma ali:

17 # Yoe. 2.28-32 Wele aloma ali,

“Kano niko khakhole mundaalo chimaliilisi,

khachukhe Roho wase khu buli mundu,

basoleeli ne bakhaana benywe bakhang'oole,

baele benywe bakhabe ne kamalola,

ne basaakhulu bakharoore.

18Yee, akhaba khu bakholi base,

be siseecha nende be siikhasi,

khabachukhekho Roho wase mundaalo ng'enecho,

mala bakhang'oole.

19Ndikhola kamayia khwikula

ne kamakhuwa ke khuukia khu sibala.

Kamafuki, kumulilo, ne liliisi likali.

20Enyanga elimaliya,

ne kumwesi kulibesema nga kamafuki,

ebweeni we Ndaalo yo Mwami emboofu lundi eye luyali ne ekhoola tawe.

21Nio, yesi yesi okhalaange khu lisina lio Mwami akhaonisibwe.

22“Rekeeresia kamakhuwa kano Baisiraeli basiaase! Yesu owa Nasareti, omundu owe bunyali bwe buwele bubwabonekha abuwaanga khwinywe, mu mayia koosi ne bibiindu bie khuukia nibio Wele aakhola khubirira mu niye, enywe mwabeene mumanyile kano sikila kakholekha ano mwinywe. 23#Mat. 27.35; Mk. 15.24; Lk. 23.33; Yn. 19.18 Khuloondekhana ne khurekekha khwa Wele, Wele aba aabisia khale ali Yesu aliaanwa khwinywe. Ne enywe mwamubaamba khu musalaba mwamwiira khurumikhira babaandu bali enje we lilaka. 24#Mat. 28.5-6; Mk. 16.6; Lk. 24.5 Ne kakhali Wele amulamusia khukhwama mu lifwa, amurusia mu bunyali bwalio, sikila abele se kanyalikhana lifwa limutiile nga omuboe tawe. 25#Chiny. 16.8-11 Sikila Daudi alomaloma ka Yesu ali,

‘Nabona Omwami ebweeni wase biise bioosi,

sikila ali kumukhono kwase kumuseecha,

se ndabakho ne buuri tawe.

26Khwako ndi ne busangaafu bukali,

ne kamakhuwa kase kali ke khoyo.

Ne ese akhaba ne ndi omundu ofwa,

ndaola mu lieyikina,

27sikila se olindekha e makoombe tawe.

Se olilekha omukholi wowo omusuubilwa abolele mu siliindwa tawe.

28Wanjekeesie chingila che bulamu;

ndiba ne khoyo khulwe khubaao khwowo.’

29“Bawandaayefwe, khukhwola ese muboolele enywe abuwaanga ka kuuka wefwe owamanyikhana, Omwami Daudi. Aafwa mala aasiikhwa, ne siliindwa siewe sili nafwe ano khukhwola endaalo yino. 30#Chiny. 132.11; 2 Sam. 7.12-13 Aaba omung'oosi, mala aamanya niko Wele amusuubisia. Wele echubila Daudi ali, ‘Alikhola mulala khu be lisaaye liewe abe Omwami nga Daudi ne aba.’ 31Daudi aabona niko Wele aaba ne acha khukhola mu ndaalo chichiicha, nio alomaloma khu lilamukha lia Kristo nga ne aloma ali,

‘Se alianjukhwa e makoombe tawe,

kumubili kwewe se kulibolela mu siliindwa tawe.’

32“Wele aalamusia Yesu chana oyo khukhwama mu lifwa, ne efwe fweesi khuli baloli khu kano. 33Alamusibwe khuba kumukhono kumuseecha kwa Wele, oli Paapa wewe, mala anyoolile Roho Omutakatifu khukhwama khu niye, nga ne amusubisia. Nisio mulikho mubona luno ne khuulila sili siianwa siewe nisio akhuchukhiile efwe. 34#Chiny. 110.1 Sikila se aaba Daudi owaniina mwikulu tawe, ne kakhali aaloma ali,

‘Omwami aboolela Omwami wase ali,

Yikhala ano amukhono kwase kumuseecha,

35khukhwola nga khola basiku bowo babe endebe eye bikele biowo.’

36“Nono babaandu ba Isiraeli mwesi mumanye ng'ali muli Yesu yuno, niye enywe mwabambile khu musalaba, ali niye Wele akholile Omwami, lundi Kristo.”

37Nga baulila bario, bananisibwa mu miooyo, mala baboolela Petero ne barumwa basie bali, “Bawandaayefwe, efwe nono khukhole siina?”

38Petero abakobosia ali, “Buli mulala khwinywe khukhwola ekanile bubwoni bwewe mala abatiisibwe mu lisina lia Yesu Kristo, nio mubeelwe bubwoni bwenywe, mala mulanyoola siianwa sia Wele, niye Roho Omutakatifu. 39Sikila lisuubisia lia Wele lili khwinywe ne khu baana benywe, ne khu baali aleeyi, boosi nibo Omwami wefwe Wele, akhalaange bamwichekho.”

40Petero aabekoonjelela ne kamakhuwa kakaandi kamakali ne abachuuba naloma ali, “Khemwionie khukhwama khu sinyaasio sisiicha khu baandu be bubwoni bano!” 41Bakali khu nibo basuubila burume bwewe mala babatiisibwa, embi babaandu chielefu chitaru batasikha khu sipupu esio endaalo ng'ene eyo. 42Barumikhira biise biabwe khukhweyika khukhwama khu barumwa, khumenya alala mu busanganilo, ne bakabana biakhulia ne khusaba Wele.

Limenya mu basuubili

43Kamayia ne kamakhuwa ke khuukia kamakali kaba kalikho kekholekha khubirira mu barumwa, mala buuri bwaamba buli mundu. 44#Bikh. 4.32-35 Basuubili boosi bachiililila khuba alala mu busanganilo bwa siimbisiimbi ne khukabana kimiaandu kiabwe babeene ne babeene. 45Bakusianga kimiaandu kiabwe, mala bakabana chirupia, khuloondekhana ne butinyu bwa buli mundu. 46Bakaananilanga mu Lukaangu buli busiele, lundi balilaanga alala mu chingo chabwe. Balichanga ne busangaafu ne kimiooyo kimilayi. 47Bafumianga Wele ne khu fukiililwa ne babaandu boosi. Ne buli endaalo Omwami Wele atasaanga khu sipupu siabwe abo ba baonisibwanga.

Currently Selected:

Bikh. 2: LUBUKUSU

Highlight

Copy