Bikh. 11

Petero aboolela ekanisa eya Yerusalemu

1Barumwa ne basuubili babaandi be mu Buyuda mwoosi baulila bali Be Chikholo bosi banyoolile elomo eya Wele. 2Nga Petero ne acha e Yerusalemu, Bayaudi chana babenyanga Be Chikholo bakhebwe, bamwikiicha ne baloma bali, 3“Siina sikila ewe ne wachiile walia ne babaandu basiinde?” 4Nio Petero ababoolela mubwichufu koosi kakaba ne kekholeekhe, khukhwama mu khurakikha. Ababoolela ali,

5“Nga ne naba ne saba mu lukoba lwa Yopa, naba ne kamalola nabona sisiindu siikha aasi sifwaana nga esuuka embalaayi ne yikhisibwa aasi mu mikhanda chayo chine khukhwama mwikulu, mala yakamila niio ese naba. 6Nekhecha mukari mala nabonamo bibiaayo ne chisaang'i che mundaa, nga chimbakilia ne chinyuni che mundaa. 7Nio naulila kumumilo ne kuloma khwise kuli, ‘Petero, yinyokha, ochiire olie!’ 8Ne kakhali naloma ndi, ‘Tawe, Omwami! Sikila sisiindu sie kumusaango namwe sinyaalu sikhengilakho mukhanwa mwase tawe.’ 9Kumumilo chana kwalomaloma lundi khukhwama mwikulu kuli, ‘Nibio Wele ang'oona okhabilanganga oli binyaalu tawe.’ 10Lino liakholekha khukhwola khataru, ekhumaliilikha biakobosebwa mwikulu. 11Siise siene esio ne sisiene babaandu bataru baba barumirwe khwise khukhwama Kaesarea, abele boolile anju niio naba. 12Roho aamboolela ali nje nabo khatitila tawe. Khwacha ne basuubili basiaase sita bano khukhwama Yopa khukhwola Kaesarea, mala fweesi khwengila munju mwa Korinelio. 13Korinelio akhuboolela nga ne abona malaika ne emile munju mwewe, ne amuboolela ali, ‘Ruma omundu mulala Yopa alaange omundu olaangwa bali Simoni Petero. 14Alakhuboolela burume bulakhuonia ewe wamwene nende be nju yowo boosi.’ 15Ne nga narakikha khulomaloma, Roho Omutakatifu abekhakho bulayi bwene nga ekha khwifwe mu khurakikha. 16#Bikh. 1.5 Abwenao nakhebulila kamakhuwa niko Omwami aaloma ali, ‘Yoana arumikhira kameechi khu batisia, ne enywe mulabatiisibwa ne Roho Omutakatifu.’ 17Kaaba bali Wele aabaelesia siianwa sisiene nga ne akhuwa efwe nga ne khwasuubila mu Mwami Yesu Kristo, abeele ese naanu ooyingania Wele?”

18Nga ne baulila kano, balekha kamayiingamo kabwe mala bafumia Wele, ne baloma bali, “Nono aba Wele aelesie akhaba Be Chikholo boosi bubweyaangu bwe khukhwikanila mala bamenye.”

Ekanisa eye e Andioka

19 # Bikh. 8.1-4 Balala khu basuubili basalanila sikila khunyaasibwa khukhwabao nga Sitefano ne erwa, bacha boola e Foenike, Saipurasi ne e Andioka. Ne belwacha burume chana obwo khu Bayaudi bong'ene. 20Ne basuubili babaandi, babama Saipurasi ne Kireni, bacha e Andioka basalanisia burume obwo akhaba khu Bakiriki, ne belwacha Elomo Endayi eyo Mwami Yesu. 21Kamaani ko Mwami kaba nabo, babaandu bakali basuubila ne khukobolela Omwami.

22Kamakhuwa kano kolela ekanisa mu Yerusalemu, nio baruma Baranaba ache e Andioka. 23Nga ne ola ne khubona nga Wele ne aelesie baandu chikhabi, asangaala nekhubaa kumwoyo boosi babe basuubilifu lundi bang'ali khu Mwami ne kimiooyo kiabwe kioosi. 24Baranaba aba omundu omulayi, owechusibwa Roho Omutakatifu ne lisuubila, ne babaandu bakali beecha khu Mwami.

25Mala Baranaba acha e Tasasi khuyiima Saulo. 26Nga ne amunyoola, amuyila e Andioka, ne khu mwiiko kwosi boombi babonanga babaandu be kanisa ne bekisia sipupu siboofu. Yaba e Andioka niyo basuubili banyoela khulaangwa bali, “Bakristo.”

27Mu siise sienesio, bang'oosi balala bacha Andioka khukhwama Yerusalemu. 28#Bikh. 21.10 Mulala khu nibo lisina bali Akabasi, eema ne khulwe kamaani ka Roho ang'oola ali enjala engali elikho yiicha khu sibala sioosi. (Enjala yino yecha mu liamiia lia Kilautio). 29Babeeka abo bafukiilisiana bali, buli mundu khu nibo arume siosi siosi nisio anyala khuyeeta babasiaabwe bamenyile e Buyuda. 30Bakhola bario, mala barumira babemeelesi be kanisa chirupia khubirira khu Baranaba ne Saulo.

Currently Selected:

Bikh. 11: LUBUKUSU

Highlight

Copy