Bikh. 10

Petero ne Korinelio

1Abao omundu mu Kaesarea lisina liewe bali Korinelio, owaba omwimeelesi omukhulu we banamae be bubwami bwe Barumi ba balaangwa bali, “Sikoosi sie banamae ba Italia.” 2Aba omundu owe dini owaria Wele. Niye nende be lisaaye lwewe boosi basaayanga Wele. Akholanga kamakali khuyeeta Bayaudi bataambi ne lundi asabanga Wele busiele. 3Embi chisa tisa che kumuusi, aba ne kamalola abona malaika owa Wele ne echa niio ali mala amulaanga ali, “Korinelio!”

4Korinelio aloleelela malaika chana mu buri mala aloma ali, “Omwami, siina?”

Malaika chana amukobosia ali, “Wele asimisiibwe ne lisaba liowo ne bikholwa bie buaani, mala erekeekhe khu khukobosia. 5Khorume babaandu balala e Yopa balange omundu olaangwa bali Simoni Petero. 6Ali omukeni munju mwa Simoni omuali owe kamaafu omenyile siimbi ne nyanja.” 7Nga malaika arekukha acha, Korinelio alaanga bakholi bewe babili no musikaari, omundu waria Wele mulala khu bakholi bewe ba busiele. 8Ababoolela kakaba ne kekholekhe koosi mala abaruma khucha Yopa.

9Endaalo eyaloondakho, nga baaba khu lukeendo ne benya khwola Yopa, Petero aniina khunju khusaba, chaba embi chisa sita che kumuusi. 10Enjala yamulia mala enya khulia, nga siakhulia ne siaba ne sising'oonwa, aaba ne kamalola. 11Abona likulu liekuukhe ne sisiindu silekhanga aasi sisiabonekha nga esuuka embalaayi elikho yikhisibwa ne kimikhanda kine khwiloba. 12Mu niyo chabamo chisaang'i chingano choosi, che bikele bine, ne chichiindi nga chimbakilia ne chinyuni che mundaa. 13Kumumilo kwecha kwaloma kuli, “Petero, yinyokha; wire mala olie!”

14Nio Petero aloma ali, “Omwami sekholakho ndio ata atiiti ene tawe. Ese khaliakho sisiindu siosi siosi sie kumusaango namwe sili sinyaalu tawe.”

15Kumumilo chana kwamubolela lundi kuli, “Okhebaasia sisiindu siosi siosi nisio Wele afukiilila khuba sikwalaafu sibe sie kumusaango tawe.” 16Kano kekholekha khukhwola khataru, mala sisiindu chana siabukulwa ne khuyilwa mwikulu.

17Oli Petero asiiuka sifuno sie kamalola ako, babaandu chana nibo Korinelio aba na arumire yaba bareebire niyo enju eya Simoni yaba mala abele nono bolile asilibwa bemile. 18Balaanga, bareeba bali, “Munju muno alimo omukeni olaangwa bali Simoni Petero?”

19Petero aaba asikhaka khumanyilisia niko kamalola ako kaboola, ne Roho amuboolela ali, “Ulila! Babaandu bataru balikho bakhuyiima. 20Nono yirekekha mala wikhe, okhakhiinda khucha nabo tawe, sikila ese niye oobarumire.” 21Khwako Petero ekha aasi mala aboolela babaandu abo ali, “Ese niye mulayiimanga. Mwenyile siina?”

22Bamukobosia bali, “Omwimeelesi we banamae Korinelio akhurumire. Ali omundu omulayi owaria Wele lundi niye Bayaudi boosi baria. Malaika owa Wele amubooleele khukhulaanga ewe oche munju mwewe, nio aulile niko omuboolela.” 23Nio Petero abakaanila, mala abasaaya bakone munju omwo siilo esio.

Nga bwasia, Petero aacha nabo, ne basuubili balala babama Yopa bosi bacha ne naye. 24Endaalo eloondakho boola Kaesarea, Korinelio alala ne balebe ne basaale bewe, nibo aaba ne alangile, baaba bamuliindile. 25Nga Petero aaba nakana khwingila munju, Korinelio arura enje khumwakaanila, aasikama aasi ne khumusaaya. 26Ne kakhali Petero amwinyosia ne khumuboolela ali, “Yiima, sikila ese ndi omundu busa nga ewe.” 27Petero achiililila khulomaloma ne Korinelio ne balikho bengila munju. Aanyoolamo babaandu bakali bebuusiisiemo. 28Petero aababoolela ali, “Enywe mumanyile bulayi bwene muli Omuyuda yesi yesi se afukiililwa mu lilaka lie dini yewe akeniye namwe aambaane ne babaandu Be Chikholo chichiindi tawe. Ne kakhali Wele aanjekeesie ndekhe khwibaasia ndi kuli kumusilo khukhola ndio. 29Nio nga ne wanaangile, nechile sendobile tawe. Nono, khureeba ndi, sikila siina ne unaangile?”

30Korinelio aaloma ali, “Yabeele esaa nga yino eri, chindaalo chitaru chiweele, chisa tisa che ekolooba, naba munju mwase ndikho saba. Ao ne nao omundu okundi eema ebweeni wase aba efwarire chingubo ching'enang'ena 31ne aloma ali, ‘Korinelio! Wele aulile lisaba liowo ne buaani bwowo biafukiiliilwe. 32Ruma omundu e Yopa khu mundu olaangwa bali Simoni Petero. Akeniiye mungo mwa Simoni omuali owe kamaafu, omenyile siimbi ne nyanja.’ 33Khwako khulangile khangu, ne wakholile bulayi khukhwicha. Luno khuli ano fweesi ebweeni wa Wele, khwaliindiliile khuulila liosi liosi nilio Omwami akhuelesie khu khubolela.”

Lilomaloma lia Petero

34 # Likh. 10.17 Abwenao Petero arakikha khuloma ali, “Luno namanyile ndi ng'ali Wele se aromboranga babaandu tawe. 35Wele afukiilila omundu yesi yesi owe ekholo yosi yosi omwisaaya ne khukhola kali ng'ali. 36Mumanyile burume nibwo Wele aruma khu baana ba Isiraeli; ne elwacha Elomo Endayi eye kumuleembe khubirira mu Yesu Kristo, ooli Omwami owa boosi. 37Mumanyile kamakali kakakholeekhe mu sibala sia Isiraeli sioosi, khurakikhira Kalilaya, Yoana ne amalile khukhwilwacha ke libatiisia. 38Mumanyile ka Yesu owa Nasareti nga Wele aamua Roho Omutakatifu ne bunyali, Acha buli abuundu nakhola kamalayi ne khuonia boosi babamiinwa ne Sietani, sikila Wele abechanga ne naye. 39Efwe khuli baloli ba buli siindu nisio akhola mu sibala sia Isiraeli ne mu Yerusalemu. Bamwiira mungila eye khumubamba khu musalaba. 40Ne kakhali Wele amulamusia khukhwama mu bafu enyuma we chindaalo chitaru, amukhola abonekhe. 41Se abonekha khu baandu boosi tawe, ne kakhali khu baloli nibo Wele arobora khaale, efwe khukhwalia ne khunywa naye namalile khulamukha khurura mu lifwa. 42Lundi akhulaka khukhwilwachila babaandu Elomo Endayi, ne khubaboolela nga Wele ne amurobora niye khuba Omukhalaki owe balamu ne bafu. 43Bang'oosi boosi bamulomalomangakho, ne baloma bali yesi yesi omusuubila, bubwoni bwewe bulabeelwa khubirira mu maani ke lisina liewe.”

Be Chikholo Banyoola Roho Omutakatifu

44Nga Petero aba nasilomaloma ario, Roho Omutakatifu ekha khu boosi ba baaba ne barekeeresie burume bwewe. 45Bayaudi basuubili ba baaba ne bechile khukhwama e Yopa ne Petero, bauka nga Wele naba ne aanile siianwa siewe sia Roho Omutakatifu khu Be Chikholo bosi. 46Sikila babaulila ne balomaloma mu nimi chingeni ne khufumia Wele. Abwenao Petero alomaloma ali, 47“Babaandu bano banyoolile Roho Omutakatifu, nga efwe fwesi ne khwanyoola. Nono aliio omundu yesi yesi onyala khubakhiingilila khubatiisibwa ne kameechi ku?” 48Khwako aaloma babatiisibwe mu lisina lia Yesu Kristo. Nio bamureeba amenye nabo chindaalo ngekhe.

Currently Selected:

Bikh. 10: LUBUKUSU

Highlight

Copy