Matayo 27

Arikio Yesu nia Pilato

(Mariko 15:1; Luka 23:1-2; Yoana 18:28-32)

1Nataparach elilim, apot ngimurok luapolok a akai a Akuj daang ka ngikasukou a Atuk totuko eger lo eareta Yesu. 2Toena ngesi a ngiriko, sodi torikosi nia Pilato alo arai ekapolon a Ngiroma.

Akitu a Yuda

(Ngitichisio 1:18-19)

3Na ayenea Yuda lo arikokini Yesu ngitunga atamar erirae Yesu, abu tokii kotere akisech keng sodi tobua ngaropiyae natomwon-uni lomurok luapolok a akai a Akuj ka ngikasukou a Atuk. 4#Tich 1:18-19 Tolim ngesi tama, “Asech ayong ani arikokinea itwaan ni nyesechit ngitunga taarae.”

Tatachut kesi tamasi, “Eraakasi nguna ngaka akiding kon, emam sua itwaan ekachit nguna!”

5Kimasak Yuda ngaropiyae kwap tooma akai a Akuj, dio arotokin tolot tomied.

6Tolemut ngimurok luapolok a akai a Akuj ngaropiyae nguna tamasi, “Eraakasi nu ngaropiyae a ngaakot, nakaneni nyechamakinitae alotal yok ebuakinio kai a Akuj.” 7Tachamakin kesi atamar kigielea ngaropiyae nguna Amana a Ekayen Ngamoti, sodi tomuranakinae ngitunga lu nyerai ngikulepek a akwap kangina. 8Ngakiro nguna ngesi enyaritere amana ngina: “Amana a ngaakot” tani tokona.

9Nakaneni kiyookin na alimuni ekadwaran Yeremia ebala, “Tolemasi kesi ngaropiyae natomwon-uni (ekimar lo achamunito Ngisirael atachakin ngesi), 10#Sek 11:12-13 togieleta amana a ekayen ngamoti, loger lo kadungokinitor Ekapolon ayong.”

Engitanari Pilato Yesu ngakiro

(Mariko 15:2-5; Luka 23:3-5; Yoana 18:33-38)

11Towo Yesu alongaren ekapolon a Ngiroma lo engitanari ngesi ebala, “Iyong irai ekapolon a Ngiyaudi a?”

Tatachak Yesu tama, “Ee, nyenguna ilimu iyong.”

12Nakaneni nyetachea Yesu ngakiro na etitaata ngesi ngimurok luapolok a akai a Akuj ka ngikasukou a Atuk.

13Sodi kingit Pilato ngesi tama, “Nyipupi iyong ngakiro nakititaare iyong nu a?”

14Nakaneni towou Yesu atachun tani akiroit apei, sodi tatalasi ekapolon a Ngiroma ngakiro nguna noi.

Akirirare a Yesu taarere

(Mariko 15:6-15; Luka 23:13-25; Yoana 18:39–19:16)

15Akolongit daang na esukukuu a Adeparet, alachanakini ekapolon a Ngiroma itwaan ipei alojela ni alimunete ngitunga atamar talachakinae. 16Ngirwa ngulu, ayei itwaan niaronon niyanat ni aenitae alojela, anyaritae ekiro keng Yesu Baraba. 17Na achunakinor asepich a ngitunga kingit Pilato kesi tama, “Ngae isakete esi atalachak, Yesu Baraba kori Yesu lo enyaritae Kiristo?” 18Ayeni ngesi dir atamar arikunito kesi Yesu nikeng ani erakaritor kesi etereku kotere Yesu Kiristo.

19Na ebooyo Pilato alokai keng ana eriras, tomeu aberu keng itwaan tama, “Kimiek itwaan ngini nyesechit, kainyo erujae ayong been nakwaare atoriab noi kotere ngesi.”

20Apot Ngimurok Luapolok a akai a Akuj ka ngikasukou a Atuk kitutuko asepich a ngitunga tolimokis Pilato atamar talachakinae Baraba sodi taarae Yesu. 21Nakaneni kingit ekapolon a Ngiroma kesi tama, “Ngae aluarei kalu isakete esi atalachak ayong?”

Tatachut tamasi, “Baraba!”

22Kingit Pilato kesi tama, “Tokona, ekokini ayong Yesu lo enyaritae Kiristo ai?”

Tatachut daang tamasi, “Taramakisi ngesi napir!”

23Nakaneni kingit Pilato tama, “Nyo niaronon esubit ngesi?”

Sodi tochalut kesi noi kiremasi tamasi, “Taramakisi ngesi napir!”

24 # Etal 21:6-9 Na engolikinea Pilato atamar nyejoikinit nabo eruoro ani edikino ngitunga elomakineta ekurikur, abu tolem ngakipi kilotarea ngakan keng alongaren ajore ebala, “Nyakapaikinio ayong akitu a itwaan ka en! Esi isubakis nu!”

25Tatachu asepich a ngitunga tama, “Kimiek eriras a akitu keng toliwor ekosi ka ngide kosi!”

26Sodi talachak Pilato Baraba, dio alimun atamar kidetae Yesu a ngamunyororoi, ani erumor, kipotoroe taramakinere napir.

Akianatar ngasigerea Yesu

(Mariko 15:16-20; Yoana 19:2-3)

27Torikosi ngasigerea a Pilato Yesu tanang kai a ekapolon a Ngiroma, tochunun asepich a ngitunga daang kiriam ngesi. 28Tobutosi ngiworui keng sodi kitanapa ngesi eworu loarengan puu. 29Kidanyakis apukot a ngiikwa kitanapa ngesi anakou, sodi kipeakis aburo nakan keng na aloteten, ani erumor toriediko alongaren keng tokienatar ngesi ebaasi, “Kimiekisi Ekapolon a Ngiyaudi kipuruunoe!” 30Kimaakis ngesi ngakimul, tolemut aburo tarama ngesi nakou. 31Na arumoreta akianar ngesi, talachasi eworu ngolo sodi kitanapa ngesi ngiworui lukeng. Dio torikosi ngesi nikalapatan aramakin napir.

Aramakinet a Yesu napir

(Mariko 15:21-32; Luka 23:26-43; Yoana 19:17-27)

32Ani eringa kesi eloose, kiriamunos ka itwaan ni abuni alo Kurene ni enyaritae ekiro keng Simon, sodi kitingakis ngasigerea ngesi akiwok apir a Yesu. 33Tanangut ni enyaritae Gologota, eger keng atamar, “Nia Akulului a Akou.” 34#Eosio 69:21 Nakis kesi Yesu kaneni emuna lo epuritoe lo imorikina ka apid. Nakaneni na eirea ngesi, towou akimat. #Eosio 22:18

35Taramakis ngesi napir, dio tokora ngiworui keng emoriate tobolos. 36Ani erumorosi nguna, kiboikinos kesi neni kiteto ngesi. 37Egiritae ngakiro na etitakinitere ngesi tatapakinae kidiama akou keng igiritae kona: “Yesu ngesi lo, ekapolon a Ngiyaudi.” 38#Eosio 22:7; 109:25 Sodi taramakis ngirukooi ngiarei ka ngesi napirio, epei lowae lo aloteten keng, epei lowae lo alokedieny keng.

39Kimungumunga lu etorununete neni ngakies kech, iyenyete Yesu 40#Mat 26:61; Yoa 2:19 ebaasi, “Ibala ngoon iyong ibwangi akai a Akuj sodi todukok nabo ache a ngirwa a nguuni! Toyuun chene kirai iyong Lokookeng a Akuj! Totiyaun tokona anapir!”

41Tokienatar ngimurok luapolok a akai a Akuj ka ngiketatamak a etal ta ngikasukou a Atuk, apot tokienatar Yesu loger lopei ngolo ebalasi, 42“Ayuuni ngoon luche, nakaneni nyeyuun ngesi elope! Nyerai ngesi ekapolon a Ngisirael a? Ani ketiyaun ngesi anapir tokona, kinupi ngoni ngakiro keng. 43#Eosio 22:8 Enupit ngesi Akuj, nabo ebala arai ngesi Lokookeng a Akuj. Ataanyutu chene kesaki Akuj ayuun ngesi tokona!”

44Tani ngirukooi lu aramakinio ka Yesu napirio, kiyenya ngesi loger ngolo.

Akitu a Yesu

(Mariko 15:33-41; Luka 23:44-49; Yoana 19:28-30)

45Na anangea naparan lotingilan, toribok akwap daang chuch tanang adaunet a ngisaae a nguuni. 46#Eosio 22:1 Na anangea ngisaae ngikan-koomwon, kikalou Yesu kirema tama, “Eloi, Eloi, lema sabakisani.” Eger keng atamar, “Akuj kang, Akuj kang, nyo kiisikinea?”

47Kiirasi ngitunga ngiche lu awaasi kaneni tamasi, “Enyarit ngesi Elija!” 48#Eosio 69:21 Tamatar ipei kech tolem ibore niyebuk kirepak tooma lomuna loadwaran lo epuritoe todupak ngaren akitoe, sodi tasak atamar tamat ngesi.

49Nakaneni tamasi luche, “Ataanyutu chene kebuni Elija ayuun ngesi!”

50Kirema Yesu kirurumak totoan.

51Toberes awaru nakooyen na eneno alokai a Akuj ngaarei napei alokidiama tanang kwap. Tamaranik akwap sodi tapakas ngatabab. 52Tangaar ngalielin kiteyarunae ngitunga a Akuj lukaalak lu atoakito. 53#Apud 26:31-33 Torotokis kesi analielin, ani na ayarunea Yesu anakitu, toloto ngitunga ngulu Lore Lo italeunitoe, kingolikis ngitunga lukaalak kesi kaneni.

54Na anyungareta ekarikon a ngasigerea ka ngasigerea na arukito ka ngesi iyokiyete Yesu eger lo amaranikinea akwap, ka ngakiro nache daang asubasi, tobul kesi noi tamasi, “Kerai itwaan en Lokookeng a Akuj dir!”

55Eteete ngaberu nakaalak na achadakina kaneni Yesu. Ewapuunete kesi Yesu alo Galilaya ingaranakinete ngesi. 56#Luk 8:2-3 Araakasi kesi Mariam Magadalene, ka Mariam itiokeng a Yakobo ka Yosep ta itiokech a ngide a Sebedayo.

Anuket a Yesu

(Mariko 15:42-47; Luka 23:50-56; Yoana 19:38-42)

57Na anangea ebong, todol itwaan nikabaran a akwap a Arimatea enyaritae ekiro keng Yosep, arai ngesi dang erukitos a Yesu. 58Tolot ngesi nia Pilato dio atamar asaki akwaan a Yesu. Todung Pilato atamar nakinae Yosep akwaan a Yesu. 59Sodi tolema Yosep akwaan a Yesu, toenik loworu lodapal lokitetet loajokon. 60Kitoperik tooma naliel nakeng a elope, na aringa ngesi ebokakini nataaba. Sodi kikokorik amoru naapolon nakituk a aliel, torotok ngesi. 61Ebooyete Mariam Magadalene ka Mariam nache kaneni, iteete aliel.

Akiyok aliel

62Na ewalarea akolongit nache, na erai Sabato kiriama ngimurok luapolok a akai a Akuj ka Ngiparisayo ta Pilato 63tamasi, “Ekapolon, kitamunit atamar ngoon eringa ekaliokon ngolo eyari, eruoro ebala keteyarunio ngesi ekisidi a ngirwa a nguuni. 64#Mat 16:21; 17:23; 20:19; Mar 8:31; 9:31; 10:33,34; Luk 9:22; 18:31-33 Todung iyong atamar kiyokoi aliel keng lokojokon tanang akolongit na a ngauni, sodi nyepedoreta ngirukitos keng alosit akokoyar akwaan keng, ani erumor tolimokis ngitunga atamar eteyarun ngesi. Eroner alioko na esal idwangi tani na ekingaren.”

65Tolimok Pilato kesi tama, “Torikosi ngasigerea kiteto aliel lokojokon.”

66Sodi torotokis kesi togolo aliel kimuleleasi, kimiekis ngasigerea iteete.

Currently Selected:

Matayo 27: ABIBILIA

Highlight

Copy