Matayo 26

Alokito ngitunga Yesu

(Mariko 14:1-2; Luka 22:1-2; Yoana 11:45-53)

1Na arumorea Yesu akitatam ngakiro nugu daang, tolimok ngirukitos keng tama, 2#Apud 12:1-27 “Iyenete esi atamar edong ngirwa ngiarei tanang akolongit na esukukuu alo enyaritae Adeparet, sodi torikoe Lokookeng a Itwaan taramakinae napir.”

3Sodi apot ngimurok luapolok a akai a Akuj ka ngikasukou a Atuk kiriamariama aapei kai a Emuron a Loapolon enyaritae Kayapa, 4totuko eger lo irumuneta Yesu peeyenio sodi taareta. 5Tamasi kesi, “Nyejoikinit kirumuni ngesi ngirwa lu esukukuu kainyo elomakinete ngitunga ekurikur.”

Ewasakinio Yesu akimiet alo Betania

(Mariko 14:3-9; Yoana 12:1-8)

6Ayei Yesu Betania kai a Simon, a itwaan ani adeaka sek enomokere. 7Ani eringa Yesu imuji, bu aberu nikeng etingit echupa lokooyen enyaritae alabasita lo ileleba akimiet nakaakunyon na egielio a ngaropiyae anakaalak noi, dio tobukok akimiet nakou a Yesu. 8Nakaneni tongoa ngirukitos keng na engolikineta nguna. Kingitas ebaasi, “Nyo inyasunitere akimiet nakaakunyon naga kona? 9#Luk 7:37-38 Adikino akimiet na peegielario a ngaropiyae anakaalak sodi nakinae ngikebootok ngaropiyae a?”

10Kona ayenea Yesu na eruorosi kesi, kingit kesi tama, “Nyo ichaneta esi aberu na? Kasubakinea ngesi ayong etich loajokon noi. 11Irukito esi ka ngikebootok jiik, nakaneni nyikiruki ayong ka esi jiik. 12Abukokini ngesi akimiet nakaakunyon nakwaan kang sodi katonukere ayong. 13#Etal 15:11 Kalimokinit esi ngakiro na iteni atamar, wadaang ni cha itatamere Ngakiro Naajokak a Akuj anakwapea, elimorio aberu na kotere ngakiro na asub ngesi nu.”

Achamun a Yuda arikokin Yesu ngitunga

(Mariko 14:10-11; Luka 22:3-6)

14Tolot Yuda Isikariote lo erai epei a ngirukitos alutomon ka ngiarei lomurok luapolok a akai a Akuj, 15kingit kesi tama, “Kiinakinete esi ayong nyo karikok ayong esi Yesu?” Kimarut kesi ngaropiyae ngatomwon-uni sodi nakis ngesi. 16#Sek 11:12 Akolongit ngina tasak Yuda jik erot lo erikokinea kesi Yesu.

Emujete Yesu ka ngirukitos keng akimuj a esukukuu a Adeparet

(Mariko 14:12-21; Luka 22:7-13,21-23; Yoana 13:21-30)

17Akolongit na ingareni akolongit na esukukuu a Ngamugati Anapadok, pot ngirukitos a Yesu kingita ngesi tamasi, “Aliwae isaki iyong sua atoloto atosubakineta akimuj a esukukuu a Adeparet?”

18Tatachak kesi tama, “Kapesi nitwaan idio a ere, tolimokis ngesi tamasi, ‘Ebala Eketataman anang esaa lokimuja ngesi ka ngirukitos keng akimuj a esukukuu a Adeparet alokai kon.’ ”

19Tosuba ngirukitos loger lo alimokinitor Yesu, tosubakis akimuj a esukukuu a Adeparet.

20Na anangea ebong, kiboikinos Yesu ka ngirukitos lutomon ka ngiarei kimuja. 21Ani eringa imujete, tolim Yesu tama, “Kalimokinit esi ngakiro na iteni atamar, karikokini epei kus ayong ngitunga.”

22Apot ngakiro nguna tonoma ngirukitos keng na eirareta tolomakis akingitanar ngesi a ngapeipei ebalasi, “Ekapolon! Kori erai robo ayong?”

23Tatachak Yesu kesi tama, “Lo ilumokinit amugati tooma natubwa ka ayong aapei ngesi karikokini ayong ngitunga. 24#Eosio 41:9 Etoani Lokookeng a Itwaan loger lo igiritere nagiran, nakaneni etioko nginyas lu eriamuni itwaan ni erikokini Lokookeng a Itwaan ngitunga! Kejoikinit kolong itwaan ngini peidounitoe!”

25Sodi abu Yuda lokarikokinan Yesu ngitunga tolim tama, “Eketataman, kori robo ayong?” Tatachak Yesu ngesi tama, “Ilim iyong.”

Akimuj a Ekapolon Yesu

(Mariko 14:22-26; Luka 22:14-20; 1 Ngikorintoi 11:23-25)

26Ani eringa imujete, tolem Yesu amugati kilip ebuakinit Akuj alakara, sodi tonyilinyili, nak ngirukitos keng tama, “Totinga tanyama, akwaan kang ngesi na.”

27Sodi tolem ngesi ekopo, kilip ebuakinit Akuj alakara, nak kesi. Tolim tama, “Tamata esi daang. 28Ngaakot kang nu na iyookinete achamunet a Akuj, eraakasi kesi ebukorosi kotere arimakino a ngasechesea a ngitunga alukaalak. 29#Apud 24:8; Yer 31:31-34 Kalimokinit esi ngakiro na iteni atamar, nyamasi nabo jik emuna lo epuritoe lo tanang akolongit ngina amasea emuna lo epuritoe lokitetet ka esi aapei Anapolou ka Apakang.”

30Sodi toeokis eos ani erumor, torotokis toloto moru lo a ngikito a akimiet.

Alimun a Yesu atamar kapegi ngesi Petero

(Mariko 14:27-31; Luka 22:31-34; Yoana 13:36-38)

31 # Sek 1:7 Tolimok Yesu kesi tama, “Nakwaare a akolongit kana, kikadakinete esi daang ngakiro kang, kitoisikis ayong bon, kainyo igiritae nagiran kona,

‘Eari Akuj ekeyokon,

sodi topetar esipanit a ngamesekin.’

32 # Mat 28:16 Nakaneni naketeyarunea Akuj ayong, kengarenikini ayong esi atolot Galilaya.”

33Tolimok Petero Yesu tama, “Nyekaisikini ayong iyong jik, tani kiisikis luche daang!”

34Tolimok Yesu Petero tama, “Kalimokinit ngakiro na iteni atamar, takae nakwaare, eringa ekokoroit nyerukino, ilimuni iyong ngalimunet ngauni atamar nyikiyeni ayong.”

35Tatachak Petero tama, “Nyalimuni ayong atamar nyakayeni iyong jik, tani ketamar kaario ayong ka iyong aapei!” Apot ngirukitos luche daang tolimut ngakiro napei nguna.

Akilip a Yesu alo Getisemane

(Mariko 14:32-42; Luka 22:39-46)

36Apot Yesu ka ngirukitos keng toloto ni anyaritae Getisemane, tolimok kesi tama, “Kiboikinos esi nege atolot ayong ama elip.” 37Toriko ngesi Petero ka talokookeng a Sebedayo luarei. Toriaba ngakiro etau keng nabo kisialolongo noi. 38Sodi tolimok kesi tama, “Kanomito ayong ngakiro nu etau edikino tani kaarete! Kiboikinos nege atokienya ka ayong aapei.”

39Torotok ngesi ngaren wadio, tadakakin kwap kijuuru, sodi kilip tama, “Apa, ani kepedor, tolema kare ekopo lo aboliaro lo anikang, nakaneni meere loger lo asaki ayong, pearai lo isaki iyong.”

40Sodi tobongu toriam ngirukitos luuni ejotoote, kingit Yesu Petero tama, “Nyo peikienyeta esi luuni ka ayong tani a esaa a epei bon? 41Tokienya, kilipa sodi nyianyunosi ka akiningo. Echamit etau nakaneni nyechamit akwaan.”

42Tolot Yesu nabo inaa kilip ebala, “Apa, ani pekelemar ekopo lo anikang, tosubakin na ichamit iyong.” 43Tobongu Yesu nabo toriam ngirukitos ejotoote. Apot kesi tokuruwo akikieny.

44Toisik Yesu kesi nabo, tolot kilip na a ngauni, elimuununi ngakiro napei nguna. 45Sodi tobongu lorukitos keng kingit tama, “Eringa esi natete ijotoote iangarito a? Kingolikisi a! Anang esaa lo erikorere tokona Lokookeng a Itwaan napolou a ngikasechak. 46Tonyoutu atoloto. Kingolikisi a! Lokarikokini ayong ngitunga ngesi lo adolu.”

Akirumunet a Yesu

(Mariko 14:43-50; Luka 22:47-53; Yoana 18:3-12)

47Ani eringa Yesu iruoro, todol Yuda lo erai epei a ngirukitos alutomon ka ngiarei. Arukito ngesi ka ajore a ngitunga alu atingito ngilengea ka ngiseboe. Ameunito kesi ngimurok luapolok a akai a Akuj ka ngikasukou a Atuk. 48Alimokinit lo arikokinit ngesi ngitunga ebala, “Itwaan ngini emalae ayong atonuak, ngesi ngolo, kirumutu ngesi!”

49Kidira Yuda jik nia Yesu tolim tama, “Eketataman, min ekisil nikon, dio tonuak ngesi.”

50Tatachak Yesu tama, “Kiburuburak mono iyong nguna ekone!”

Pot kesi kirumut Yesu totinga lokojokon. 51Tout epei kangulu arukito ka Yesu ekileng totubo akit a ekedalan a Emuron a Loapolon a akai a Akuj. 52Tolimok Yesu ngesi tama, “Kirepak ekileng kon nakiroru, kainyo daang lu elemunete ekileng etoanikinete lokileng. 53Nyiyeni iyong atamar apedori ayong alimokin Apakang atamar kingarakinae sodi tomeu ngesi atipei ngajoresio a ngimalaikae ngatomon ka ngaarei a? 54Ani kikokis neni, ikokinete ngagiran iyookin na ebalasi, ejoikinit nu esubakin ai?” 55Tolimok Yesu ajore ngina tama, “Nyo tokona iponitotor esi itingito ngilengea ta ngiseboe akirumun ayong ikwa ibore esibit arai ayong erukoot? Ngirwa daang eboyeene ayong alokai a Akuj etatami nakaneni nyirumuna esi ayong. 56#Luk 19:47; 21:37 Nakaneni asubakin nugu daang kiyookinotor na egirete ngikadwarak a Akuj nagiran.”

Sodi tamataros ngirukitos daang toisikis ngesi.

Yesu Anatuk

(Mariko 14:53-65; Luka 22:54,55,63-71; Yoana 18:13,14,19-24)

57Apot ngitunga lu erumunete Yesu torikosi ngesi kai a Kayapa alo arai Emuron Loapolon a akai a Akuj. Achunakina ngiketatamak a etal ka ngikasukou a Atuk neni. 58Kiwap Petero Yesu echadakina tanang nalaar a akai a Emuron a Loapolon a akai a Akuj. Toloma ngesi tooma nalaar kiboikinos ka ngasigerea, idarunit na esubakinosi. 59Toripa ngimurok luapolok a akai a Akuj ka ngikasukou a Atuk daang ngakiro na alioko na itinganakinete Yesu, sodi taareta ngesi. 60Nakaneni emam na aanyut kesi, tarai bo anyounete lukaalak kisudioto ngesi ngakiro. Ekisidi tonyout ngitunga ngiarei 61#Yoa 2:19 tamasi, “Abala itwaan en, apedori akibwang akai a Akuj atodukok nabo a ngirwa nguuni atorumo.”

62Tonyou Emuron Loapolon a akai a Akuj kingit Yesu tama, “Eya ngakiro isaki iyong atachun alotitas alo kititakinitere iyong kalo a?” 63Nakaneni kililing Yesu chek. Kisuruorik nabo Emuron Loapolon a akai a Akuj ngesi tama, “Kotere ekiro a Akuj ana eyari, kesikongi ayong iyong, tolimokinae sua kirai iyong Kiristo, Lokookeng a Akuj.”

64 # Dan 7:13 Tatachak Yesu ngesi tama, “Kesi nguna ilimu iyong. Nakaneni kalimokinit ayong esi daang atamar, napei tokona jik, ingolikinete esi Lokookeng a Itwaan ibooyi alowae alo aloteten a Akuj Anaapolon Noi, nabo ebuni alotooma ngidowon a Adis.” #Lawi 24:16

65Na eirarea Emuron Loapolon a akai a Akuj ngakiro nu, tochilichili ngiworui keng tama, “Kiirasi ngimeny keng! Nyeringa nabo kisaki ngikaanyunak ngiche! Iirasi tokona esi ngimeny keng. 66#Isa 50:6 Ibalasi tokona esi ai?” Tatachut tamasi, “Esechit ngesi, ejoikinit eario.”

67Sodi kimaanakis ngakimul loreet keng, nabo kideta ngesi. Kingita lu ebapanarete ngesi tamasi, 68“Todwar chene Kiristo! Tolimokinae sua itwaan ni kirami iyong!”

Apeget a Petero Yesu

(Mariko 14:66-72; Luka 22:56-62; Yoana 18:15-18,25-27)

69Na ebooyo Petero alotooma alaar, kitoru apese neni na arai akasuban etich a Emuron a Loapolon a akai a Akuj, tolimok ngesi tama, “Irukito iyong dang ka Yesu lo a Galilaya?”

70Nakaneni topeg ngesi alongaren kech kadaang. Tatachak tama, “Nyayeni ayong ngakiro na iruoro iyong.” 71Tolot ngesi lokidor a alaar. Kingolik nabo apese ache nakasuban etich ngesi sodi tolimok ngitunga luka neni tama, “Awaasi ngesi ka Yesu lo a Nasaret.”

72Topeg nabo Petero tama, “Ekong jik, nyayeni ayong itwaan ngini!”

73Adaunet a esaa alodiochichi, pot ngitunga lu awaasi kaneni nia Petero tamasi, “Irai iyong dang epei kech dir, kainyo idodiunit tani ekiruor kon.”

74Sodi tama Petero, “Ekong jik kataar ibore, eruoro ayong ngakiro na iteni! Nyayeni ayong itwaan ngini.”

Toruk ekokoroit esaa lopei ngolo. 75Dio kitam Petero ngakiro nasek alimokinit ngesi Yesu Abala: “Ani eringa ekokoroit nyerukino, ilimuni iyong ngalimunet ngauni atamar nyikiyeni ayong.” Topudo ngesi nikalapatan, kikalou lokojokon.

Currently Selected:

Matayo 26: ABIBILIA

Highlight

Copy