Matayo 14

Akitu a Yoana Ekebatisan

(Mariko 6:14-29; Luka 9:7-9)

1Ngirwa ngulu, kiira Erode lo arai ekapolon a Galilaya ngakiro a Yesu. 2Tolimok Erode ngikasubak etich keng tama, “Erai itwaan en Yoana Ekebatisan ayaru anakitu ngesi esubea ngakitoodikinet nakailiilok nu.”

3Kainyo alimunit sek Erode atamar kirumunae Yoana, toenae a ngiriko sodi toinikinae lojela. Asubi ngesi nguna kotere Erodia, aberu a lokaatokeng alo anyaritae Pilip. 4Kainyo alimonokini sek Yoana Ekebatisan Erode tama, “Nyejoikinit iyong itiliwori Erodia aberu kon.” 5#Luk 3:19-20 Asaki Erode akiar ngesi nakaneni toem Ngiyaudi kainyo abaasi kesi Yoana erai ekadwaran a Akuj. #Lawi 18:16; 20:21

6Akolongit na etamunitere akidounet a Erode, abu nakookeng a Erodia kidonga alongaren ngipeyok daang. Talakar Erode noi. 7Kikong ngesi ebala ainakini nakookeng ibore daang ni esaki.

8Tolim ngesi loger lo alimokinitor itiokeng tama, “Nakinae tokona kona akou a Yoana Ekebatisan anatubwa!” 9Kialolong ekapolon, nakaneni kotere akichikakinet na alimuni ngesi alongaren ngipeyok keng daang, tolim ngesi atamar tosubakinae nguna asaki apese ngina. 10Sodi apon Yoana totubunoe akou alojela. 11Yaunae akou keng eyei tooma natubwa nakinae apese, sodi yaa nia itiokeng. 12Pot ngirukitos a Yoana kilepulepoosi akwaan keng, tonuka, ani erumor toloto tolimokis Yesu.

Akisimujet a Yesu ngitunga ngabunge ngakan

(Mariko 6:30-44; Luka 9:10-17; Yoana 6:1-14)

13Na eirarea Yesu ngakiro a Yoana, torotok kaneni kiwaar a atubwa tolot alopei nariet. Na eirareta ngitunga ngakiro nguna, apot toisikis ngirerea kech kiwapakis ngesi iriwokina ekwaas a anam. 14Na adokunea Yesu anatubwa, kingolik asepich a ngitunga. Kisieneto ngesi ngitunga noi dio kitojok ngulu adeakasi.

15Na anangea ebong, pot ngirukitos keng nikeng tamasi, “Awar tokona, tarai ne ariet. Kimiek ngitunga toloto nadakarin togiela akimuj na enyamete.”

16Tatachak Yesu kesi tama, “Nyechamit kesi eloose, nakisi esi kesi ibore idio ninyamat!”

17Tatachakis kesi tamasi, “Ngamugati ngakan ka ngikolia ngiarei make eya ne.”

18Tama Yesu, “Yautu nege.” 19Tolimok ngesi ngitunga atamar kiboikinos lonyia. Sodi tolem ngamugati nakan nguna ka ngikolia luarei tokienyia kidiama nadis, tobuak Akuj alakara. Tonyilinyili ngamugati nak ngirukitos keng, sodi tokorakis ngirukitos keng ngitunga. 20Kimuj itwaan daang kimwon. Sodi tolemut ngirukitos keng ngategerin ngatomon ka ngaarei na eleleba akimuj na apiyanun. 21Araakasi ngikiliok lu emujete ngabunge ngakan, peimarunitae ngaberu ka ngide.

Alosiet a Yesu alokidiama ngakipi

(Mariko 6:45-52; Yoana 6:15-21)

22Todungok Yesu ngirukitos keng atamar todokasi natubwa kingarenikis toloto ekwakaye anam eringa ngesi etinenikinit akisuruor ngitunga tolooso. 23Na arumorea alimokin ngitunga atamar toloto, todoka ngesi moru alopei akilip. Ayei Yesu alopei inaa na awaria. 24Esaa ngolo alona atubwa ayei kiding anam ebapabapate ngitoroi kainyo akutunit ekuwam anakan ana aloose kesi.

25Ani enangi ni ebayiarea bu Yesu nikech elosi alokidiama ngakipi. 26Ani ingolikinete ngirukitos keng ngesi elosi alokidiama ngakipi apot tobul, tolimut ebaasi, “Erai Ekipe,” sodi kiremasi ebulit.

27Tolimok Yesu kesi atipei tama, “Totitinyeketo. Nyieam, ayong itwaan.”

28Sodi tolim Petero tama, “Ekapolon, ani kerai iyong dir, tolimokinae ayong dang abu nikon alosi alokidiama ngakipi.”

29Tatachak Yesu tama, “Bua!” Todoku Petero anatubwa kisiak alosit nia Yesu alokidiama ngakipi. 30Na akutakinea ngesi ekuwam abu toem kisiakis ngakipi akilikor ngesi. Kikalou tama, “Toyuunae Ekapolon.”

31Atipei todol Yesu ngesi kikamu tama, “Etia ekiditeu a anupit kon ai? Nyo ingayakinitor iyong?” 32Ani edokarete Yesu ka Petero natubwa, toper ekuwam. 33Apot ngirukitos lu ayakasi natubwa kilipa Yesu tamasi, “Irai iyong dir Lokookeng a Akuj.”

Etangalekini Yesu ngitunga lu adeakasi alo Genesaret

(Mariko 6:53-56)

34Todokasi ekwakaye anam todokut anakwap a Genesaret. 35Na ayeneta ngitunga a akwap kangina Yesu, tokeikis akiroit neni atamar yaunae ngikadeakak. Apon yaunae ngikadeakak a akwap kangina daang nia Yesu. 36Sodi kimaimae ngesi tamarae kimiek lu adeakasi tatapa tani ekwaas a eworu keng. Tojokearos daang lu atapete eworu keng.

Currently Selected:

Matayo 14: ABIBILIA

Highlight

Copy