Matayo 13

Ngakitadapet a eketan

(Mariko 4:1-9; Luka 8:4-8)

1Akolonngit napei ngina topudo Yesu alokai kangina, tolot kiboikin lokwaas a anam. 2Kotere asepich a ngitunga na achunakina neni, todoka ngesi kiboikin natubwa, towo asepich ngina alokwaas a anam. 3Kitatam ngesi kesi ngakiro nakaalak a ngakitadapet tama,

“Ayei kolong eketan lo alosi akitare. 4Na ealakinea ngikinyam mana, apot ngikinyam ngiche kialakin lorot, sodi kidepasi ngikieny. 5Apot ngiche kialakin nalup na ewarawarakina kidiama natabab. Toruput ngikinyam atipei kainyo pealalak ngalup. 6Ani erirauni akolong, tonom ngimomwa luuchik ngulu, nabo kotere nipeapisitotor ngaten apot tooniyosi. 7Apot ngikinyam ngiche kialakin tooma lookwa. Ani erupunete ngiikwa torida ngimomwa lu arupunito. 8#Luk 5:1-3 Nakaneni kialakinos ngikinyam ngiche nalup naajokak, toruput ngimomwa topolout, tokoniut ngiche amiat apei, ngiche ngitomwon-kapei, ngiche ngitomwon-uni.”

9Na arumorea Yesu, tolim tama, “Ani keya ngaki kiira robo.”

Eger a ngakitadapet

(Mariko 4:10-12; Luka 8:9-10)

10 # Mat 25:29; Mar 4:25; Luk 8:18; 19:26 Sodi pot ngirukitos a Yesu nikeng kingita ngesi ebaasi, “Nyo isuruorea iyong ngitunga a ngakitadapet?”

11Tatachak Yesu kesi tama, “Kidodikin esi aosou a ngakiro a namunonoe a Apolou a Akuj, nakaneni nyidodikinitae kesi. 12Kainyo itwaan cha daang ni eyei ibore, einakinio ni elal, sodi talalaror ibore keng noi. Nakaneni itwaan ni emam ibore eyei, edemario tani nidiochichi ni etingit. 13Esuruori ayong kesi a ngakitadapet, toliwor iteete nakaneni nyebwangasi ngitamen toyena ngakiro, nabo epupete nakaneni nyechoiyarete kori nyeyenunete. 14Etemokin anikech nakolong alimuni ekadwaran a Akuj Isaya ebala:

‘Ipupokinete lokojokon, nakaneni nyiyenunete.

Ingolikinete lokojokon, nakaneni nyebwangasi ngitamen toyena ngakiro.

15 # Isa 6:9-10 Kainyo earit ngitunga lu abangaanut.

Egolito ngaki kech,

nabo arapa ngakonyen kech.

Arai nyikote neni,

kingolikinito a ngakonyen kech.

Kori kiirarito a ngaki kech,

nabo kitamunito alotamen kech.

Ebala Akuj, kereuna kesi nikang,

nabo ketangalekinit ayong kesi’. #Luk 10:23-24

16“Etia ekeny lo eyei esi ai? Iteete ngakonyen kus nabo epupete ngaki kus. 17Kalimokinit ngakiro na iteni atamar ngikadwarak a Akuj ngikaalak ka ngitunga a Akuj, asakete noi akingolikin na ingolikis esi, nakaneni nyingolikina, nabo asakete akiirar na ipupete esi, nakaneni nyiirara.

Esisauni Yesu eger a ngakitadapet a eketan

(Mariko 4:13-20; Luka 8:11-15)

18“Topupokisi, sodi toyeneta eger a ngakitadapet a eketan. 19Lu iirarete akiroit a Apolou a Akuj nakaneni nyechoiyasi, ikwaan ka ngikinyam lu ealakinosi lorot. Ani ebuni Ekipe tolema akiroit na eyei lotai kech. 20Isikwaanitae ngikinyam lu ealakinosi natabab, ka ngitunga lu iirarete akiroit tonupa a alakara napei iirareta. 21Nakaneni nyelomari akiroit lotai kech lokojokon kori nyenupete akiroit ngina nikooyen. Na ichanere kesi kori na eboliare kotere akiroit ngina, sodi toisikis kesi atipei. 22Isikwaanitae ngikinyam lu ealakinosi tooma lookwa ka ngitunga lu iirarete akiroit, nakaneni ngichan a eboyor a akwap ka aminakinit ebari, nyisirichakinete kesi akiroit ngina, nakaneni tongopa ngakiro naajokak anakiroit kangina. 23Ngikinyam lu ealakinosi nalup naajokak, ikote ngitunga lu iirarete akiroit tochoiasi, tokoniut ageor ngiche amiat apei, ngiche ngatomwon-kapei, ngiche ngatomwon-uni.”

Ngakitadapet a edoan

24Tolimok Yesu kesi ngakitadapet ngache ebala, “Ikoni Apolou a Akuj ne. Etakini itwaan ngikinyam luajokak mana keng. 25Ani nakwaare, ejotoe itwaan daang, bu emoit kitak edoan kiding ngakanoi, sodi tolot. 26Na arupuneta ngikinyam kibutungiasi ngakanoi, abu edoan dang tatakanu. 27Pot ngikasubak etich a itwaan kangini tolimokis ngesi tamasi: ‘Ekapolon, be ajokak bo ngikinyam lu ngoon itakini iyong mana kon, aliwae abunio edoan lo?’ 28Tatachak tama: ‘Emoit ngesi kesubi ngakiro nu.’ Kingita ngikasubak etich ngesi nabo tamasi, ‘Isaki tokona iyong sua atorutosi edoan a?’ 29Tatachak tama, ‘Mam, kimiekisi, kainyo kilomasi esi akirut edoan ipedorete arutun tani ka ngakanoi aapei. 30Kimiekisi ngakanoi ka edoan toruput daang aapei tanang ngirwa lu elemere. Sodi atolimok ayong ngikalemak atamar, torutut mono edoan sodi totukonokis a ngaenet kinomae, ani erumor tochunakinae ngakanoi kikachakinae lokeru kang.’ ”

Akitadapet a echokit a ekoropus

(Mariko 4:30-32; Luka 13:18-19)

31Tolimok Yesu kesi akitadapet ache ebala, “Ikoni Apolou a Akuj ne. Alemuni itwaan echokit a ekoropus kitak mana keng. 32Edit echokit a ekoropus noi idwangit ngichok daang nakaneni ani kerupu, topoloor noi kidwang ngikito luuchik daang. Eliwor ekitoe pot ngikieny toduko ngakais naten keng.”

Akitadapet a ekitoe alo itubui ngamugati

(Luka 13:20-21)

33Tolimok Yesu kesi nabo akitadapet tama, “Ikoni Apolou a Akuj ne. Alemuni aberu ekitoe lo itubui ngamugati kimorik ka ngakiria anadepe tanang ebui wadaang.”

Akitatamet a Yesu a ngakitadapet

(Mariko 4:33-34)

34Esuruori Yesu asepich a ngitunga ngakiro nugu daang a ngakitadapet nyelimuno ngesi akiroit tani apei na nyerai ngakitadapet. 35#Eosio 78:2 Asubi ngesi kona kiyookinotor nakolong alimuni ekadwaran a Akuj ebala:

“Esuruori kesi a ngakitadapet.

Alimokini kesi ngakiro na nyeyenuna napei kolong

anakisiakinet a akwap.”

Esisauni Yesu eger a ngakitadapet a edoan

36Na asikinea Yesu asepich a ngitunga toloma tooma kai, pot ngirukitos keng nikeng tamasi, “Tolimokinae sua ngakitadapet a edoan alomana atamar ngesi nyo.” 37Tatachak Yesu tama, “Itwaan ni etakini ngikinyam luajokak ngesi Lokookeng a Itwaan. 38Amana ngesi akwap. Ngikinyam luajokak kesi ngitunga lu a Apolou a Akuj. Edoan kesi ngitunga lu a Ekipe. 39Emoit lo etakini edoan ngesi Ekipe. Akilem ngesi esal a akwap. Ngikalemak kesi ngimalaikae. 40Loger lo echunakinere edoan kinomae anakim, esubakinosi na ikote neni akolongit na a esal. 41Emeuni Lokookeng a Itwaan ngimalaikae keng tochunakis daang lu itosechenete luche ka ngikasechak daang, kipudunoe Anapolou a Akuj. 42Sodi tachakakis kesi nakim nakariran, kigoro kaina tokiricha ngikel. 43Min akicha na ikoni na akolong lotunga a Akuj Anapolou ka Apakech. Ani keya ngaki, kiira robo!

Ngakitadapet a ibore anikaalan a ngaropiyae ani eweitae

44“Ikoni Apolou a Akuj ibore nikaalan a ngaropiyae emurakina mana. Kiyookin itwaan sodi tonuk nabo. Talakar noi, tolot, togiela ibore daang ni etingit ngesi. Ani erumor, tobongo togiel amana ngina.

Ngakitadapet a ngamoru anakaalak a ngaropiyae enyaritae ngalului

45“Ikoni Apolou a Akuj ne. Esaki emuchurut ngamoru a ngaropiyae enyaritae ngalului. 46Na eanyunea ngesi apei naajokon noi, tolot, togiela ibore keng daang. Ani erumor bu togiel amoru nakaalan a ngaropiyae enyaritae alulu ngina.

Ngakitadapet a epuute

47“Ikoni nabo Apolou a Akuj ne. Achakakinete ngikechiemak ngiche epuute kech nanam lo erumuni ngikolia ngigelagelae. 48Na ilelebunor epuute ngikolia, kiriut kesi lokwaas, kiboikinos sodi totiakatiakata ngikolia. Kiwaanakis luajokak nasaaja kech ani luaronok tochakanasi. 49Ikokinete ngakiro neni akolongit na a esal. Eloose ngimalaikae totiakut ngitunga luaronok alotunga alu ajokak 50sodi tachakakinae kesi nakim ni igorotor tokiricha ngikel.”

Ngakiro na iteni nakiteat ka nangorok

51Kingit Yesu kesi tama, “Iyena esi ngakiro nu a?”

Tatachakis tamasi, “Ee, kiyen.”

52Tatachak Yesu tama, “Idodiunito ngakiro nu atamar, eketataman a etal daang lo itatama Anapolou a Akuj, ikoni elope a akai lo ipuduni ngiboro lukiteat ka lungorok alopem.”

Angerete ngitunga Yesu alo Nasaret

(Mariko 6:1-6; Luka 4:16-30)

53Na arumorea Yesu akisisaun ngakitadapet nguna, abu torotok kaneni, 54tobongo lore lokolong apolounio. Kitatam alokai a Atuk, nakaneni daang lu apupete ngesi apot toiliilikis ngakiro keng. Kingitas ebaasi, “Aliwae aanyunea itwaan en aosou na ka ngakitoodikinet nakailiilok nu? 55Meere ngesi lokookeng a ekile alo kechian ngiboro a? Nyerai Mariam itiokeng a? Nabo ikwa meere talokaatokeng kesi Yakobo ka Yosep ka Simon ta Yuda a? 56Ikwa meere tanakaatokeng na elomito ne a? Aliwae aanyunea ngakiro nu daang?” 57Apot tongero ngesi jik kanguna.

Tolimok Yesu kesi tama, “Ipuruunitoe ekadwaran awadaang pearai lore keng ka ngitunga a awi keng make nyipuruunete.” 58#Yoa 4:44 Aloger amamakar kesi anupit, nyesuba Yesu ngakitoodikinet nakailiilok alalak kaneni.

Currently Selected:

Matayo 13: ABIBILIA

Highlight

Copy