Matayo 10

Ngimeanara lutomon ka ngiarei

(Mariko 3:13-19; Luka 6:12-16)

1Tanyarau Yesu ngirukitos keng lutomon ka ngiarei tochunak wapei, sodi kitogogong kesi topedoreta akitwarakin ngipean ka akitangalekin ngidekesinei ka ngilekesinei daang. 2Ngirora a ngimeanara alutomon ka ngiarei kesi lu: lo ekingaren ngesi Simon (lo anyaritae Petero) ka lokaatokeng Andirea, Yakobo ka lokaatokeng Yoana lu araakasi ngide a Sebedayo, 3Pilip ka Bartolomayo, Tomas ka Matayo loketubukon echur, Yakobo lokookeng a Alipayo ka Tadayo, 4Simon lo a atukuoru enyaritae Salote, ta Yuda Isikariote lo arikokini Yesu ngitunga.

Amearet a Yesu ngirukitos keng lutomon ka ngiarei

(Mariko 6:7-13; Luka 9:1-6)

5Tomea Yesu lutomon ka ngiarei lugu kichikak tama, “Nyiiloto nakwapea a ngibukui alu nyerai Ngiyaudi kori lorerea a Ngisamariae. 6Erai ejoikinit iloose lotunga a Isirael lu ikote ngamesekin na echakara. 7Iloose kitatama ibalasi, ‘Aapuu Apolou a Akuj.’ 8Kitojoka lu edeakasi, kiteyarutu lukatoak, kitangalekisi lu a enomokere, kitwarakisi ngipean. Iriamut esi pas, kongina pei kipotosi esi dang pas. 9Nyiitinga ngaropiyae alochuei a ngiworui kus. 10#Luk 10:4-12 Nyiitinga echue lo ilipanarotor analosit kus, kori ngamuk, kori aburo, kori nyiilemasi eworu eche. Ejoikinit ekasuban etich einakinio ibore ni esaki. #1 Kor 9:14; 1 Tim 5:18

11“Nainangeta esi lore kori nadakar, tasaka keyei itwaan ni echamit akitepeyon esi, kiboikinos ka ngesi tanang akolongit na inyouneto kaneni. 12Na ilomareta esi kai, tamasi, ‘Min ekisil nikus’. 13Ani kitepeyon esi ngitunga a akai kangina, kitemokin emalas lota kus a ekisil. Ani pekitepeyon esi, tobuasi emalas kus. 14Nakaneni ani keya ngitunga a awi kori ere lu nyikitepeyonete kori nyikipupokinete esi, torotokisi kaneni tokurwosi ngalup a ngakejen akamaluwot kidodiu ibore ngini atamar esechito kesi. 15#Tich 13:51 Kalimokinit ngakiro na iteni atamar, akolongit na a Eriras isieniyete Akuj ngitunga a Sodom ka Gomora, kidwang ngitunga a ere kangolo. #Mat 11:24; Siak 19:24-28

Aboliaro na isidiuno

(Mariko 13:9-13; Luka 21:12-17)

16“Topupokisi, kamearit ayong esi loger a ngamesekin ana eya kiding ngipeei. Ejoikinit esi iliworosi lukachwaak loger a ngimunio nabo lukaalimok loger a ngakurio. 17Tochoikinos alotunga kainyo eya lukirumunete esi kitorikosi nitubet ngakiro nabo kibungaate kesi esi anakais a Atuk. 18Kirikorio esi kititae alokarikok ka ngikapolok sodi tolimokineta esi kesi ka lu nyerai Ngiyaudi Ngakiro Naajokak a Akuj. 19Nakirikorere esi akititare, kuriasi ngakiro nyeeriab ngitai kus atamar anukiro ilimunete, kori ilimunete kwaai. Naenangea esaa ngolo, tolimutu nakitoodikinio esi atamar tolimut. 20#Luk 10:3 Kainyo ngakiro na ilimunete esi meere ngakus, erai ngaka a Etau ka Apakus. #Mar 13:9-11; Luk 12:11-12; 21:12-15 #Mar 13:12; Luk 21:16

21“Ipotorete ngitunga ta lokaatokech taarae nabo taapa ipotorete ngide kech loger ngolo. Enyoikinete ngide ngikauriak kech kipotosi sodi taarae. 22Kiremokinosi esi ngitunga daang kotere ayong. Nakaneni ngini enaikini tanang losal, eyuunio. 23#Mat 24:9,13; Mar 13:13; Luk 21:17 Ani kiboliatar kesi esi alore a eche, toloto lore loche. Kalimokinit iteni dir atamar, nyirumorete etich kus alorerea a Isirael kadaang eringa Lokookeng a Itwaan nyebonguno. #Luk 6:40; Yoa 13:16; 15:20

24“Emam ni itatamio ni idwangit eketataman keng, kori emam ekasuban etich lo idwangit ekapolon keng. 25#Mat 9:34; 12:24; Mar 3:22; Luk 11:15 Itemokino ni itatamio ikwaanikin ka eketataman keng, kori ekasuban etich ikwaanikin ka ekapolon keng. Ani kenyaritae ekapolon a awi Beelsebul, enyarao ngitunga a awi kangina a ngirora aluaronok noi.

Ngolo ejoikinit kikeri

(Luka 12:2-7)

26“Nakaneni nyiikear ngitunga kainyo emam ibore ni erapap ni nyileereuni, kori emam ibore ni idaitae ni nyetakanuni. 27Ngakiro nakalimok ayong esi anaribu tolimosi esi anakicha, nabo nguna iirasi esi iruoroe imunonitae kikeutu esi anatuk. 28Nyikear ngulu earete akwaan bon nakaneni nyepedorete akiar etau. Ejoikinit kikeri lo epedori akinyasun akwaan ka etau ananam ana a akim. 29Egielio tanangolengor ngaarei a adurur, nakaneni emam tani ipei kech ni echakakin nalup peeyeni Apakus. 30Imarunitae tani ngitim daang anakies kus. 31#Mar 4:22; Luk 8:17 Nakaneni nyieam! Ijokak esi noi idwangito ngikieny ngulu lu elalak.

Alimor ka akipeg Kiristo

(Luka 12:8-9)

32“Itwaan cha daang ni elimori alongaren ngitunga atamar arai ngesi itwaan kang, alimori ayong dang ngesi alongaren Apakang alo eyei nadis. 33#1 Tim 2:12 Nakaneni itwaan cha daang ni epegi alongaren ngitunga atamar meere ngesi itwaan kang, apegi ayong dang alongaren Apa kang lo eyei nadis atamar nyayeni ngesi.

Meere ekisil ibore, erai arem

(Luka 12:51-53; 14:26-27)

34“Nyiitamasi robo kori abuni ayong ayaun ekisil nakwap. Mam! Nyabunit ayong ayaun ekisil pearai arem. 35Abunit ayong akiteremokin lusapa ka ta apakech, lupesur ka taito kech, ngaterak ka taata kech. 36#Mika 7:6 Ngimoe luaronok a itwaan kesi ngitunga lupei a awi keng.

37“Nyitemokino itwaan ni emina apakeng ka itiokeng noi akidwang ayong eliwor erukitos kang. Nyitemokino ni emina lokookeng kori nakookeng kesidwang ayong eliwor erukitos kang. 38Nyitemokino itwaan ni nyiwoki apir keng kewapak ayong eliwor erukitos kang. 39#Mat 16:24; Mar 8:34; Luk 9:23 Itwaan cha daang ni esaki akirichun akiyar keng, ebukori, nakaneni ni ejali akiyar keng kotere ayong, irichuni. #Mat 16:25; Mar 8:35; Luk 9:24; 17:3; Yoa 12:25

Ngibachichio

(Mariko 9:41)

40“Itwaan cha daang ni kitepeyoni esi, ketepeyon tani ayong, nakaneni ni ketepeyoni ayong, etepeyon tani lokolong kameuni ayong. 41Itwaan cha daang ni itepeyoni emeanara a Akuj ani eraakar ngesi emeanara a Akuj, emorete ka ngesi ebachit keng. Itwaan cha daang ni itepeyoni itwaan niajokon ani ejokia ngesi, emorete ka ngesi ebachit keng. 42#Mar 9:37; Luk 9:48; 10:16; Yoa 13:20 Kalimokinit ngakiro na iteni atamar, itwaan cha daang ni itamasi epei a luuchik kalu ngakipi ani eraakar erukitos kang, eriamuni ngesi ebachit keng.”

Currently Selected:

Matayo 10: ABIBILIA

Highlight

Copy