MARIKO 5
5
Yesu ahonia omundu webishieno
(Mat. 8:28-34; Luka 8:26-39)
1Yesu nabeechibe betsa niboola injelekha weinyanza ya Galilaya, mushialo shia Abagerasi. 2Ne olwa yali narulile muliaro, yabukaana nende omundu owalimwo eshishieno, 3owali narulile mubilindwa, wayamenyanga. Ne shiyaliho omundu owakhanyalile okhumuboha, kata neminyololo tawe. 4Ne akhandi akhanji yabohungwa nebitiili biebilenje nende eminyololo. Nebutswa yachitsanuulanga nichikabukhana nabio ebitiili biebilenje yabikhalakangamwo ebitonye. Kata shiyaliho owali namaani kokhumuhandakhwo tawe. 5Eshiteere neshilo, yahonganga mubilindwa nende mubikulu niyayula, niyekhalaka omubilikwe namachina.
6Ne olwa yalola Yesu nashili ehalekhwo, yelukha niyetsa nakwa mumakuluke namwinamila. 7Mana nalila nomwoyo omukhongo, nareeba ari, “Unzenyangakhwo shiina iwe Yesu, Omwana wa Nyasaye Omukhongo Muno? Ekhusaaya muliira lia Nyasaye mbu nochama shiolaasandiakhwo tawe.” 8Omundu oyo yaboola ario okhuba Yesu yali naboolile ari, “Rula mumundu uno iwe eshishieno.”
9Mana Yesu nareeba eshishieni eshio ari, “Eliiralio niwe wina?” Nashio nishimukalusia shiri, “Nisie Legioni,#5:9 Legioni: Mululatini mbu: omukanda kwabelihe abanji. “Khuli abanji” biali ebishieno ebinji nibiamenya muye. shichila khuli abanji.” 10Nashio nishisaaya Yesu muno mbu aleshe okhubilonda okhurula mushialo eshio.
11Ne lialiho lituuli likhongo lietsimbiitsi, eliali niliayanga mundulo weshikulu. 12Kho ebishieno ebio nibimusaaya nibiboola biri, “Khurume khutsie mu tsimbiitsi etsio, mana oleshe khwinjile mutsio.” 13Kho nabifuchilila ebishieno ebio okhutsia, ne nibirula mumundu oyo, ne nibinjila mu tsimbiitsi etsio. Mana tsimbiitsi tsiosi, etsihela ahambi ebikhumila ekhumi na bibili (12,000), nitsilukha nitsikholomokha okhwinjila munyanza, nitsiyinikha nitsimililishilamwo tsiosi.
14Abayi nibelukha nibatsia, nibatswania amakhuwa ako mwitookho liosi nende mutsingongo tsirondokhane. Mana abandu nibetsa okhulola mbu nishiina eshiene eshiali nishikholeeshe. 15Ne olwa betsa wa Yesu yali, balola omundu owalinjimwo ebishieno oyo niyekhaale, niyefwalile tsingubo, nali omulamu khandi amachesike nikali habwene. Mana nibaria muno. 16Ne abali nibalutsikhwo amakhuwa ako, baboolelakhwo abashiabwe akali nikekholeeshe khu mundu webishieno oyo nende khumbiitsi.
17Kho nibachaaka okhusaaya Yesu mbu arule mulukongo lwabwe atsie.
18Ne olwa Yesu yali niyenjilanga muliaro, omundu wali narusibwemwo ebishieno oyo yamusaaya mbu achame batsie ninaye.
19Naye Yesu naloba naboolela omundu oyo ari, “Tsia ingo khubandubo mana obaboolele aka Omwami akhukholeele nende shinga olwa akhubeeleele tsimbabasi.”
20Mana omundu owalinjimwo ebishieno oyo narulaho nakalukha ingo, ne nachaaka okhurumbula akobuloli mumataala ka Dekapoli#5:20 Dekapoli: Amataala likhumi akali mulukongo lwebukwe weinyanza ya Galilaya niwambushe omwalo kwa Yorodani., khu aka Yesu yali namukholeele, mana abandu boosi nibahuka muno.
Omukhaana wa Yairo nende omukhasi owatiila khungubo ya Yesu
(Mat. 9:18-26; Luka 8:40-56)
21Khandi olwa Yesu yali niyambushiile muliaro okhutsia injelekha weinyanza, omukanda kwabandu omukhongo kwakhung'ana ewa yali khuluchinga lweinyanza. 22Mana mulala khubakhulundu bomusinagogi, oweliira mbu Yairo, yola ewa Yesu yali, nasikama hasi ne namwinamila. 23Yasaaya Yesu muno naboola ari, “Omwana wanje omukhaana omutiiti ahuliishe, ali ahambi okhufwa. Chama witse omurekhwo amakhonoko kho mbu ahone mana abe mwoyo.”
24Mana Yesu nende Yairo nibachaaka okhutsia. Ne omukanda omukhongo kwabandu, okwali nikuloondanga khu Yesu, kwamutiya mutsimbeka tsiosi.
25Mumukanda tsana okwo, yalimwo omukhasi undi owali niyerulutsanga khulwa oluhoono lwemiyika ekhumi nachibili. 26#Tob. 2:10Kata yali yasilikhwa nabasilishi abanji habula shiyahonanga ta, nebutswa yali natsiilililanga butswa okhuba obubi. 27Yali niyahulilakhwo ifuma ya Yesu, ne yali mumukanda okwo, naloondanga Yesu munyuma, mana natiila khungubo ya Yesu. 28Yakhola ario shichila yayililisia mumwoyokwe naboola ari, “Nimba nindakhatiilakhwo butswa kata khunguboye, ndalahona.”
29Kho olwa yatiila khungubo ya Yesu, habwene nahabwene okhwirulutsakhwe okhwo nikhwakama. Naye nahulila mumubilikwe mbu amalile okhuhona okhurula mubulwalebwe. 30Mana habwene nahabwene Yesu niyehulila obunyali bwokhuhonia nibumurulamwo, naye nashiukhanila abomukanda, ne nabareeba ari, “Niwiina outiilile khungubo tsianje?”
31Ne abeechibe nibamukalusia bari, “Ololanga shinga lwomukanda kwabandu kukhutiyanga, ne khandi oreebanga mbu, ‘niwiina oundililekhwo?’ ”
32Mana Yesu nahenga eyi nende eyi okhulola owali namutiililekhwo. 33Nebutswa okhuba omukhasi oyo yali namanyile akali nikamwikholeeshekhwo, yetsa natechelanga nende oburi obunji, nasikama mumakulu ka Yesu, namuboolela obwatoto bwosi. 34Naye Yesu namuboolela ari, “Omukhaana wanje, obusuubilibwo bukhuhoniye. Otsie nomulembe, ne ohonele elala okhurula mubulwalebwo.”
35Olwa Yesu yali nashiboolanga, abandu okhurula mungo wa Yairo betsa nibaboolela Yairo bari, “Omukhaanawo amalile okhufwa. Eshichila notsiililila okhunyasia omwechesia nishiina?”
36Nebutswa Yesu yalechelesia butswa aka bali nibaboolile, ne naboolela omukhulundu weisinagogi oyo ari, “Shiolaria ta, suubila busuubila.” 37Mana Yesu nalafuchilila omundu yesi yesi okhumulondakhwo khandi ta, okhurusiakhwo Petero, Yakobo nende Yohana omusiani wabwe Yakobo bonyene. 38Olwa boola munzu mwa Yairo, Yesu yalola abandu abanji nibakholanga obuyoka obunji, nibekhuulanga nibakhupa tsimbungu muno. 39Ne olwa yenjilamwo, yabareeba ari, “Mwikhuulanga nimukhupa tsimbungu mbushiina? Omwana uno shiafwile ta, habula akonanga butswa tsindoolo.”
40Nabo nibamutseshelela butswa. Mana Yesu nabalonda boosi okhurula munzu omwo. Ne nabukula samwana omwana oyo, nyinamwana omwana nende abeechibe bataru abo, nibenjila mushisika shiomwana yali niyalisiibwemwo. 41Yesu yatiila omwana oyo omukhono, ne naboola ari, “Talitsa kumu,” eshisina mbu, “Iwe omukhaana omutiiti, buukha osinjile!”
42Ne habwene nahabwene omukhaana oyo nabuukha nachaaka okhuchenda. (Yali owemiyika ekhumi nachibili). Olwa amakhuwa ako kekholekha, habwene nahabwene abandu boosi bahuka muno. 43Yesu yabakaania obutinyu mbu omundu yesi yesi alamanyakhwo likhuwa elo tawe. Ne nababoolela mbu, bahelesiekhwo omukhaana oyo eshiokhulia alie.
Currently Selected:
MARIKO 5: OLUPR
Highlight
Share
Copy
Want to have your highlights saved across all your devices? Sign up or sign in
