MARIKO 1

Okhuyaala khwa Yohana Omubatiisi

(Mat. 3:1-12; Luka 3:1-18; Yoh. 1:19-28)

1Obuchachilo obwa Injiili ya Yesu Kristo, Omwana wa Nyasaye.#1:1 Amahandiko kandi ka khale, kalekha elwanyi amakhuwa mbu “Omwana wa Nyasaye.” 2#Mal. 3:1Kahandikwa mushitabu shiomulakusi#1:2 omulakusi: Amahandiko kandi ka khale, kasoomanga mbu “Mubitabu biabalakusi.” Isaya mbu,

“Nyasaye aboola ari, ‘Lola, eruma omurumwa wanje imbeliwo,

owakhakasie injilayo.’

3 # Isa. 40:3 Omwoyo kulanjilisinjia mushitsiimi kuri,

‘Kasie omuhanda okwa Omwami, khandi mukololosie tsinjilatsie.’ ”

4Yohana Omubatiisi nalolekha#1:4 nalolekha: Amahandiko kandi ka khale kasoomanga mbu “Yohana yali nabatiisinjia.” mushitsiimi nabatiisinjia nende okhuyaalila abandu mbu bekalukhasie nibalekha obwonooni bwabwe. 5Abandu boosi beshialo eshia Yuda nende aba Yerusalemu, batsia khuye nibabatiisibwa mumwalo kwa Yorodani, nibeyamanga obwonooni bwabwe.

6 # 2 Abar. 1:8 Ne Yohana yefwalanga tsingubo tsiobwoya bweingamia, khandi yali niyeboha mushishienjeshie olukhoba lweliselo. Ne ebiokhuliabie bialinji tsisiche nende obuushi bwomubulimo. 7Khandi yayaala naboola ari, “Oushila nobunyali yetsanga munyuma mwanje. Kata shingwanile okhwinama hasi mbu emboholole tsikhoba tsiebilaarobie tawe. 8Emubatiisia namaatsi, naye namubatiisie nende Roho Omutakatifu.”

Okhubatiisibwa nende okhuteemwa khwa Yesu

(Mat. 3:13–4:11; Luka 3:21-22; 4:1-13)

9Mutsinyanga etsio, Yesu yarula Nazareti mulukongo lwa Galilaya, naye Yohana namubatiisia mumwalo kwa Yorodani. 10Mana Yesu narula mumaatsi, ne habwene na habwene nalola likulu nilikuushe, naye Roho Omutakatifu niyekhanga khuye nafwana shinga lihusi. 11#Obucha. 22:2; Tsits. 2:7; Isa. 42:1; Mat. 3:17; 12:18; Mrk. 9:7; Luka 3:22Mana omwoyo nikurula mwikulu nikuboola kuri, “Iwe niwe Omwana wanje omuheelwa. Enjamisibungwa ninawe muno.” .

12Mubwangu bwene obwo, Roho Omutakatifu yamwimilila okhutsia mushitsiimi. 13Mana naba mushitsiimi tsinyanga amakhumi kane, Setani namuteemanga. Khandi yalimwo netsisolo nabulimo, nebutswa abamalaika bamukhalabanilanga.

Yesu alanga abanaabi betsinyeni bane okhuba abalondibe

(Mat. 4:12-22; Luka 4:14-15; 5:1-11)

14Ne olunyuma lwokhutiilwa khwa Yohana Omubatiisi, Yesu yatsia Galilaya nayaalanga Amakhuwa Amalayi ka Nyasaye, 15#Mat. 3:2naboola ari, “Bulano ebise bimalile okhuula, nabwo Obwami bwa Nyasaye busitile ahambi. Mwikalukhasie nimusuubila amakhuwa amalayi kano.”

16Kho olwa Yesu yali nachendanga khulukuku lweinyanza ya Galilaya, yalola abanaabi betsinyeni babili, Simoni nende omusiani wabwe oulangwa mbu, Andereya, nibafubanga tsikhanda tsiabwe munyanza, shichila bali abanaabi betsinyeni. 17Mana Yesu nababoolela ari, “Munondekhwo, nasi ndalamukhola okhuba abanaabi babandu.” 18Habwene nahabwene, balekha tsikhanda tsiabwe mana nibamulondakhwo.

19Ne olwa Yesu yatsiakhwo hambeli hatiiti, yalola Yakobo omwana wa Zebedayo nende Yohana omusiani wabwe, nibali muliaro nibakasinjia tsikhanda tsiabwe. 20Olwa Yesu yabalola, yabalanga mbu bamulondekhwo, ne nibalekha Zebedayo sabwe nende abakholi babwe, ne nibamulondakhwo.

Yesu ahonia omusaatsa owali neshishieno

(Luka 4:31-37)

21Kho Yesu nende abeechibe nibatsia nibenjila mwitaala lia Kaperinaumu. Mana khunyanga eya Isabato, niyenjila mu Sinagogi ne nachaaka okhwechesia. 22#Mat. 7:28,29Ne olwa abandu bahulila obwibaalibwe bahuka muno, okhuba yabeechesia shinga ouli nobunyali, nalabeechesia shinga abahandichi bamalako bechesinjia tawe.

23Omundu owali nebishieno yenjila mu Sinagogi eyo, ne nayiiba obutinyu ari, 24“Eshia okhwenyangakhwo nishiina iwe Yesu Omunazareti? Okhetsile okhukhumulula ifwe noho? Khukhumanyile iwe, okhuba oli Omurumwa Omutakatifu wa Nyasaye!”

25Nebutswa Yesu yahalabila eshishieno eshio nashilaka ari, “Holeela tsi! Khandi orule mumundu uno!” 26Eshishieno eshio nishimupabasia, nishiayula nomwoyo omukhongo mana nishimurulamwo. 27Kho abalimwo boosi nibang'ang'aala, nibareebana abeene khu beene bari, “Kano kakhali makhuwa shina? Buno bukhali obwechesia obuyiakha noho? Okhuba omundu uno ali nobunyali bwokhukondeshela ebishieno nabio nibimuhulila.” 28Mana ifumaye niyitswana mulukongo lwa Galilaya nende ebikwenyi tsirondokhaneho.

Yesu ahonia abandu abanji

(Mat. 8:14-17; Luka 4:38-41)

29Ne olwa barula musinagogi, Yesu nende abeechibe nibali halala nende Yakobo nende Yohana, benjila munzu yabwe Simoni nende Andereya. 30Ne nyakhufialanyene Simoni oweshikhasi yali nakonile mushitali nalwala omurengo. Ne olwa Yesu yenjila munzu, bamuboolela akobulwale bwa nyakhufialanyene Simoni oyo. 31Mana Yesu niyetsa natiila omulwale oyo omukhono namubusia, mana nahona lwangu lwene olwo. Mana nyakhufialanyene Simoni tsana oyo nabakasilia ebiokhulia.

32Khubwile bweinyanga eyo, eliuba niliakhayeela, abandu bareerera Yesu abandu abali nibalwala boosi, kata abali nebishieno. 33Abandu bomwitookho elo bali nibakhung'anile boosi imbeli weinzu. 34Naye Yesu nahonia abanji abali nibalwala obulwale bwetsimbia tsiahukhane nende okhurusia ebishieno ebinji. Ne shiyahelesiakhwo ebishieno obwiyangu bwokhuboola ta, okhuba biali nibiamumanya.

Yesu ayaala mu Galilaya

(Luka 4:42-44)

35Inyanga yaloondakhwo, mumabwibwi eshialo nibushili okhushia, Yesu yabuukha natsia mushitsiimi yenyene. Ne nali ebweneyo yasaaya. 36Ne Simoni nende abashie batsia okhumukhaaba. 37Ne olwa bamunyoola, bamuboolela bari, “Buli mundu akhukhaabanga.” 38Naye Yesu nabakalusia ari, “Leshe khutsie mumatookho kandi, mbu mana eyaalekhwo ebweneyo khandi, shichila ako niko akachila nenzitsa.” 39#Mat. 4:23; 9:35Mana Yesu natsia niyenjila mu tsisinagogi mulukongo lwa Galilaya nayaala nende okhurusia ebishieno.

Yesu ahonia omundu wobuchele

(Mat. 8:1-4; Luka 5:12-16)

40Khandi omundu undi owali nobuchele yetsa khu Yesu, nasikama hasi imbeliwe naboola ari; “Noba nochama usiiye embone.” 41Khulwa tsimbabasi tsinyinji,#1:41 tsimbabasi tsinyinji: Amahandiko kandi aka mulugiriki kaboola mbu, yatiilwa noburuma. Yesu yanyiila omukhonokwe namutiilakhwo, ne naboola ari, “Efuchiliile, osiiyishe.” 42Mana habwene nahabwene obuchele nibuhwa, naye owobuchele oyo nasiiyikha. 43Kho Yesu namulachilisia obutinyu, namuseebula bwangu, 44#Abal. 14:1-32ne namuboolela ari, “Hulila, shiolaboolelakhwo omundu yesi yesi amakhuwa kano tawe. Habula tsia wilolesie khumwisaaliisi afuchilile okhusiiyikhakhwo. Nawe ohaanile Nyasaye eshihaanwa eshia Musa yalaka mbu yesi yesi ousiiyikha ahaaneneje, shibe eshilolelo khubandu boosi mbu toto osiiyishe.”#1:44 Khubandu: Amahandiko kandi kolugiriki kaboola mbu khubo.

45Nebutswa omundu oyo yarulaho natsia elwanyi ne nachaaka okhutswania buli habundu aka Yesu yali namukholeele. Yatswania amakhuwa kano habulafu, nikachila nibuba obutinyu khu Yesu okhwinjila mwitookho habulafu. Habula yekhala butswa elwanyi welitookho yenyene, ne kata kario abandu betsa khuye okhurula mumbeka tsiosi.

Currently Selected:

MARIKO 1: OLUPR

Highlight

Copy