MATAYO 8

Yesu Yahonia Omundu Wobuchele

(Mrk. 1:40-45; Luka 5:12-16)

1Ne olwa Yesu yali nakholomooshe okhurula khushikulu, emikanda emikhongo chiamulondakhwo. 2Ne lola, omundu wobuchele yamwitsila nasikama hasi namwinamila, naboola mbu; “Omwami, noba nochama onyala okhusiiya.”

3Naye Yesu nanyiila omukhonokwe namutiilakhwo ne naboola ari, “Enjamile, siiyikha.” Habwene nahabwene obuchele nibuhwa, naye nasiyiikha. 4#Abal. 14:1-32Mana Yesu namukaania naboola ari, “Hulila, olaboolelakhwo omundu yesi yesi likhuwa tawe. Ne otsie wilolesie imbeli womwisaaliisi, afuchilile okhusiiywakhwo, nawe ohaane eshihaanwa eshia Musa yalaka, shibe obuloli bwokhuhonakhwo khubo.”

Yesu ahonia omukhalabani womusesia Omuroma

(Luka 7:1-10)

5Ne olwa Yesu yenjila mwitookho lia Kaperinaumu, omusesia Omuroma yamwitsila namusaaya naboola ari, 6“Omwami, omukhalabani wanje ali ingo akonile mushitali, ne afwokoye mana atsunungwa obululu.” 7Yesu namuboolela ari, “Nenzitse okhumuhonia.” 8Omusesia oyo nakalusia namuboolela ari, “Omwami, iwe shiokhoyile okhwinjila munzu yanje ta, nebutswa laka butswa likhuwa, ne omukhalabani wanje alahona. 9#Bar. 3:33-35Shichila nasi siesi endi omundu ouli hasi woburuchi, khandi endi nende abelihe abali hasi wanje; nindaka mulala khubo mbu; ‘Tsia,’ natsia. Ne nimboolela oundi mbu, ‘Yitsa’ niyetsa, kata nende omusumba mbu, ‘Khola lino,’ ne alikhola.”

10Ne olwa Yesu yahulilakhwo ario yahuka; mana naboolela abali nibalondananga ninaye ari, “Emuboolela toto mbu, eshili okhunyoolakhwo omundu mu Isiraeli owobusuubili shinga buno tawe. 11#Luka 13:29Khandi emuboolela mbu, abanji bakharule ebukwe nende mumbo nibekhala halala nende Aburahamu, Isaka nende Yakobo, mubwami bwa Nyasaye. 12#Mat. 22:13; 25:30; Luka 13:28Nebutswa beene obwami balisukunwa elwanyi mushiilima aha bakhalilile nibalumasia ameeno mubutsunwi.” 13Mana Yesu naboolela omusesia oyo ari, “Tsia ingowo, ne kalekholekha shinga lwosuubiile.” Ne omukhalabaniwe nahona khushise shieneshio.

Yesu yahonia abandu abanji

(Mrk. 1:29-34; Luka 4:38-41)

14Ne olwa Yesu yenjila munzu mwa Petero, yalola nyakhufialanyene Petero nakonile, nalwala omurengo. 15Yesu namutiila omukhonokwe ne nahona omurengo okwo, naye nabuukha nachaaka okhumukhalabanila.

16Khubwile eliuba niliakhayeela, abandu bareerera Yesu abali nende ebishieno boosi, naye nalaka ebishieno ebio okhubarulamwo. Mana nahonia boosi abali abalwale. 17#Isa. 53:4Kano kekholekha khulwa okhuusia akomulakusi Isaya yaboola mbu; “Ye omwene yebukulila obulwale bwefwe mana niyetuukha obuteshele bwefwe.”

Abakhoyile okhuba abalondi ba Yesu

(Luka 9:57-62)

18Ne olwa Yesu yalola omukanda nikumubotokhaane, yalaka abeechibe okhutsia injelekha weinyanza. 19Mana omwechesia wamalako undi namwitsila naboola ari, “Omwechesia, ndalakhulondakhwo hosi hosi aha otsia.” 20Yesu namukalusia naboola ari, “Amabwe kali nende obwina bwako, amanyonyi akokhwikulu nako koosi kali nebitsu biako, nebutswa Omwana womundu shialikhwo nende ahokhuhulushila tawe.” 21#Tob. 4:3,4Ne oundi owokhubechibe namuboolela ari, “Omwami, chama enzie emuyabile papa wanje mbeli.” 22Nebutswa Yesu yamukalusia naboola ari, “Nondakhwo, lekha abafu bayabilane.”

Yesu yalenjeesia imbumbuyeka

(Mrk. 4:35-41; Luka 8:22-25)

23Yesu yenjila muliaro, abeechibe nibamulondakhwo. 24Ne lola imbumbuyeka ingali niyichaaka okhuhutsa munyanza, mana eliaro niliba ahambi okhwiyinikha khulwa amarunda. Naye Yesu yali nakonanga. 25Abeechi nibatsia khuye nibamubuusia nibaboola bari, “Omwami okhuhonie; khuli ahambi okhusikha.”

26Nabareeba ari, “Nishiina eshichila nimuria murio? Inywe muli abobusuubili obututu?” Mana nabuukha, ne nahalabila omuyeka namarunda, mana omulenjeelo omukhongo nikubaho. 27Abandu boosi bahuka, nibaboola bari, “Uno naye nomundu wambia shiina? Okhuba kata omuyeka namarunda bimuhulilanga.”

Yesu ahonia abandu babili abali nebishieno

(Mrk. 5:1-20; Luka 8:26-39)

28Ne olwa Yesu yola injelekha mushialo eshia Abagerasi, yabukaana nende abandu babili abali nebishieno, nibarulanga mubilindwa. Bali abahalaba muno, mbu kata abulaho omundu yesi owabirilanga khunjila eyo tawe. 29Ne lola, bayiiba nibaboola bari, “Okhwenyangakhwo shiina iwe Omwana wa Nyasaye? Witsile okhukhusandia indukho niyishili?” 30Ne lialiho lituuli lietsimbitsi tsinyinji nitsiayanga ahambi ninabo. 31Ebishieno ebio nibimusaaya Yesu nibiboola biri, “Noba nokhurusia, okhurume khutsie mwituuli lietsimbitsi etsio.” 32Ne Yesu nabiboolela ari, “Tsie.” Nabio nibirula nibitsia mumbitsi etsio, ne lola, lituuli lietsimbitsi elo niliminina nilikholomokha munyanza nilisishilamwo liosi pe.

33Abaayi betsimbitsi etsio belukha nibatsia mwitookho, nibaboola amakhuwa koosi akali nikekholeshe khubebishieno. 34Ne lola, abomwitookho elio boosi nibarula okhwakanila Yesu, ne olwa bamulola, bamusaaya mbu arule mulukongo lwabwe olwo.

Currently Selected:

MATAYO 8: OLUPR

Highlight

Copy