MATAYO 27

Yesu ayilwa imbeli wa Pilato

(Mrk. 15:1; Luka 23:1-2; Yoh. 18:28-32)

1Kho olwa bwashia mumabwibwi abesaaliisi abakhulundu boosi nende abakofu ba Abayahudi nibamuhaana mbu yerwe. 2Nibamuboha mumakhono nibamuyila khu Pilato, owali nali omukafuna.

Okhufwa khwa Yuda

(Ebikh. 1:18-19)

3 # Ebikh. 1:18,19 Mana olwa Yuda, owali nakhobile Yesu yamanya mbu, Yesu akhalachiilwe eshiina eshiokhufwa, yabelela muno, mana nakalusia ebitonye biamapesa amakhumi kataru khubesaaliisi abakhulundu nende abakofu. 4Nababoolela mbu, “Enzonoonile okhukhoba omundu oubula eshikha mbu yerwe!” Nibamukalusia bari, “Ifwe nefu khuteeba shiina khukenako? Ako kali khwiwe omwene!” 5Mana Yuda nasukuna amapesa ako hasi muhekalu, ne narula natsia niyemika.

6Mana abesaaliisi abakhulundu abo nibatoola amapesa ako nibaboola bari, “Nomusilo okhukara mwibishilo liomuhekalu, shichila namapesa keshitsayi.” 7Kho nibarecheresania mbu, bakekhoonyele okhukula omukunda kwomundu omulonji, mbu kube okwokhuyabilangamwo abandu abarende. 8Niko akachila omukunda okwo nikulangwa mbu, “Omukunda kweshitsayi” okhuula olwa leelo.

9 # Zak. 11:12,13 Kho akomulakusi Yeremia yaboola kosibwe mbu, “Babukula ebitonye biamapesa ebihela amakhumi kataru, obukusi bwabandu Abaisiraeli bali nibafuchilisania okhurunga khulwa ye, 10ne nibekhoonyela amapesa ako okhukula omukunda okwomulonji shinga OMWAMI Nyasaye yali niyandachilisia.”

Pilato areeba Yesu amareebo

(Mrk. 15:2-5; Luka 23:3-5; Yoh. 18:33-38)

11Yesu yasinjila imbeli womukafuna Omuroma, mana omukafuna oyo namureeba ari, “Iwe niwe Omuruchi wa Abayahudi noho?” Yesu namukalusia, “Niwe ouboolile.” 12Ne shiyakalusiakhwo likhuwa khu akabesaaliisi abakhulundu nende khukabakofu bamwinjililakhwo itookho tawe. 13Mana Pilato namureeba ari, “Shiohulilanga aka bakhwinjililangakhwo itookho kano koosi ta?” 14Nebutswa Yesu shiyamukalusiakhwo likhuwa kata elala tawe, kho omukafuna oyo nahuka muno.

Yesu akhalachilwa okhiirwa

(Mrk. 15:6-15; Luka 23:13-25; Yoh. 18:39–19:16)

15Buli khwisabo liemikaate echibulamwo limela, omukafuna Omuroma yaleekhuulanga omubohe mulala womukanda kwabandu kuba nikwenyile. 16Ebise ebio, yaliho omubohe mulala owali niyamanyikha muno, owalangwa mbu Baraba. 17Kho olwa bali nibakhung'anile halala, Pilato nabareeba ari, “Niwiina awamwenya mbu emulekhuulile, Baraba, noho Yesu, oulangwa mbu Kristo?” 18Okhuba yali namanyile obulayi mbu, imbalikha niyo eyichilile Abayahudi nibahaana Yesu khuye mbu akhalachilwe okhufwa.

19Olwa Pilato yali nashikhale khushifumbi eshiobuyasi, omukhasiwe yarumasia likhuwa naboola ari, “Shiolakholakhwo omundu omulunjishi oyo likhuwa liosi libi ta, shichila enyakhaane muno khulwa omundu uno mumalooro eshilo.”

20Ne abesaaliisi abakhulundu nende abakofu bakatilisia abomukanda mbu, basabe Pilato okhubalekhuulila Baraba, naye Yesu yerwe. 21Pilato nareeba abomukanda mbu, “Noulena khubabili bano owa mwenya mbu emulekhuulile?” Nibakalusia bari, “Baraba!” 22Pilato nabareeba ari, “Kho emukhole endie Yesu, oulangwa mbu Kristo?” Boosi nibakalusia bari, “Abambwe khumusalaba!” 23Pilato nabareeba ari, “Nelibi shiina eliakholile?” Ne nibameeta butswa okhuboola nomwoyo omukhongo mbu, “Abambwe!”

24 # Okhuk. 21:6-9 Olwa Pilato yalola mbu shianyala okhukhola eshindu shiosi shiosi ta, okhuba indiri yinyala okhubaho, yabukula amaatsi, nasaaba amakhonoke imbeli womukanda okwo naboola ari, “Shiendikhwo neshikha khushitsayi shiomundu omulunjishi uno tawe! Ako nakenywe abeene!” 25Omukanda kwosi nikukalusia mbu, “Eshitsayishie shibe khwifwe nende khubaana befwe!” 26Mana Pilato nabalekhuulila Baraba, nalaka mbu, Yesu anywekhwe, mana namuhaana mbu abambwe.

Abelihe Abaroma batseshelela Yesu

(Mrk. 15:16-20; Yoh. 19:2-3)

27Mana abelihe ba Pilato, nibayila Yesu mulwanyi olukhongo lwomuruchi, mana omukanda kwabelihe kwosi nikumubotokhana. 28Nibamufwalula tsingubotsie nibamufwala eshifwalo eshiaranzayi. 29Mana nibakaasia olusimbi lwamahwa nibamufwala khumurwe, ne nibara indabushi mumukhonokwe omusaatsa. Kho nibasikama hasi imbeliwe, nibamutseshelela nibaboola bari, “Oyindile, iwe omuruchi wa Abayahudi!” 30Nibamufutsakhwo amare, nibabukula indabushi eyo nibamunyweshela khumurwe. 31Ne olwa bali nibamalile okhumutseshelela bario, bamufwalula eshifwalo eshio, nibamufwala khandi tsingubotsie omwene, ne nibamuyila okhubambwa.

Yesu abambwa khumusalaba

(Mrk. 15:21-32; Luka 23:26-43; Yoh. 19:17-27)

32Ne olwa bali nibarulanga mulwanyi olwo, bakaana nende omundu wokhurula Kirene, oulangwa mbu Simoni; abelihe nibamulunyia okhuchinga omusalaba kwa Yesu. 33Niboola habundu ahalangwa mbu, Goligotsa, eshisina mbu, “Habundu aheshihanganga.” 34#Tsits. 69:21Habwenaho nibahelesia Yesu idivai eyitsokasibwemwo eshindu eshilulu; ne olwa yatsamilekhwo, yaloba okhuchinywa. 35#Tsits. 22:18Olwa bali nibamubambile, bakabana ebifwalobie khulwa okhukhupa ikha. 36Olunyuma lwako, bekhalaho okhumuhenhelesia. 37Nibara lihandiko hekulu homurwekwe niliboola aka yenjililwekhwo itookho mbu, “Uno niye Yesu, Omuruchi wa Abayahudi.” 38Mana nibabamba abanuuli babili halala nende Yesu, mulala khumukhonokwe musaatsa noundi khumukhonokwe mukhasi.

39 # Tsits. 22:7; 109:25; Sira 12:17,18; 13:7 Abandu abali nibabirangaho nibaresia emirwe chiabwe nibanyeka Yesu. 40#Mat. 26:61; Yoh. 2:19Nibaboola bari, “Iwe ounyala okhulikulula Ihekalu nochiumbakha khandi mutsinyanga tsitaru, wihonie omwene! Noba noli Omwana wa Nyasaye, yikha hasi okhurula khumusalaba.”

41Munjila ndala eyo, abesaaliisi abakhulundu nende abeechesia bamalako nende abakofu bamutseshelela, nibaboola bari, 42“Yahonia abandi, ne shianyala okhwihonia omwene ta! Shiali niye Omuruchi wa Abaisiraeli? Naba niyekha hasi okhurula khumusalaba, khuba khulamusuubila! 43#Tsits. 22:8; Obuch. 2:18-20Yesikanga Nyasaye, naboola mbu, nomwana wa Nyasaye. Kho, lekha khulolekhwo Nyasaye naba namuhonia bulano!” 44Kata abanuuli ababambwa halala ninaye abo, boosi khandi bamunyeka bario.

Okhufwa khwa Yesu

(Mrk. 15:33-41; Luka 23:44-49; Yoh. 19:28-30)

45Okhurula khusaa yakhasasaba eshiteere okhuula khusaa yashienda, eshialo shiosi shielima. 46#Tsits. 22:1Mana ahambi khuisaa yashienda eshiteere, Yesu yaboola nomwoyo omukhongo ari, “Eli, Eli, lama sabakitsani?” Eshisina mbu, “Nyasaye wanje, Nyasaye wanje, undeshile mbushiina?” 47Balala khubandu abali nibasinjiileho bahulila, ne nibaboola bari, “Alanganga Eliya!” 48#Tsits. 69:21Ne habwenaho mulala khubo natsia tsimbilo nabukula eshiangwe, niyenikha mudivai, nashira khulikata liolusi, namuha mbu anywe. 49Ne abandi nibaboola bari, “Leshe khulole nikakhaba mbu, Eliya aletsa okhumuhonia!” #27:49 Amahandiko kandi kakhale kameetangakhwo mbu: ne oundi yabukula lifumo, namufumira mumbafu, ne amaatsi namatsayi nikarula.

50Mana Yesu naboola khandi nomwoyo omukhongo, ne nakwisia omwoyo. 51#Okhur. 26:31-33Ne lola, ingubo yomuhekalu niyirandukhamwo ebitonye bibili, okhurula ikulu okhuula hasi. Eshialo nishirenga, tsinyanda nitsiatikha, 52ebilindwa nibiikukha. Abandu ba Nyasaye abanji abali nibafwa nibalamusibwa. 53Barula mubilindwa, ne olwa Yesu yali niyakhabuukha okhurula mubafu, abandu abo batsia mwitookho litakatifu, ewa abandu abanji babalola. 54Olwa omwimilisi wabelihe halala nende abo abali ninaye, nibalindile Yesu, balola okhurenga khweshialo nende akandi koosi akekholekha, baria muno nibaboola bari, “Toto mwene uno abeele Omwana wa Nyasaye!” 55#Luka 8:2,3Khandi baliho abakhasi abanji abali nibasinjiile ehale nibahenganga, ne nibo abali nibalondanenje nende Yesu okhurula Galilaya nibamukhalabanila. 56Khubo, balimwo, Mariamu Magadalene, Mariamu nyinamwana Yakobo nende Yosefu, nende nyinamwana abasiani ba Zebedayo.

Okhuyabilwa khwa Yesu

(Mrk. 15:42-47; Luka 23:50-56; Yoh. 19:38-42)

57Olwa eshialo bwela, omusaatsa undi omuyinda owokhurula Arimatsaya, oweliira mbu Yosefu, owali khandi omwechi wa Yesu yetsa. 58Natsia khu Pilato namusaba omubili kwa Yesu. Mana Pilato nalaka mbu, aheebwe. 59Mana Yosefu nabukula omubili okwo nakubohela musanda indafu, 60nakwalisia mung'ani yiyie omwene imbia, eya yali niyayaba mulwanda. Mana naselenjesia lichina likhongo nalira khumuliango kweing'ani eyo, ne niyenyokha. 61Mariamu Magadalene nende Mariamu undi baliho nibekhale nibahengane nende ing'ani.

Abelihe baliinda hashilindwa

62Inyanga yalondakhwo eyali eya Isabato, abesaaliisi abakhulundu nende Abafarisayo bakhung'anila ewa Pilato, 63#Mat. 16:21; 17:23; 20:19; Mrk. 8:31; 9:31; 10:33,34; Luka 9:22; 18:31-33nibaboola bari, “Omwami, khwitsulila mbu, omubeeyi oyo olwa yali nashili mwoyo yaboola ari, ‘Ndalalamusibwa olunyuma lwetsinyanga tsitaru.’ 64Kho laka mbu, ing'aniye yilindwe obutinyu okhuula khunyanga yakhataru, kho abeechibe baleshe okhwitsa okhwiba omubilikwe, mana baboolele abandu mbu, ‘Alamusibwe okhurula mubafu.’ Obubeeyi bwokhumalilikha buno, bwakhaba obubi muno okhushilakhwo obwambeli.” 65Pilato nababoolela ari, “Muli nabalindi, tsie mulinde ing'ani eyo obutinyu shinga olwa munyala.”

66Kho nibatsia nibalinda ing'ani eyo obutinyu, nibara khwichina elo eshibalikho mana nibalekhaho abelihe okhulinda.

Currently Selected:

MATAYO 27: OLUPR

Highlight

Copy