MATAYO 21

Yesu yenjila Yerusalemu nomwikhoyo

(Mrk. 11:1-11; Luka 19:28-40; Yoh. 12:12-19)

1Olwa Yesu nende abeechibe bali ahambi okhuula Yerusalemu, boola Betsifage, hashikulu shia Miseituni. Mana Yesu naruma abeechi babili imbeliwe 2nababoolela ari; “Mutsie mwitaala elihengaane ninenywe, habwene yaho mulanyoolaho isishili niyiboyilwe nende eshimoosi shiayo halala. Mubiboholole, mubindeerere. 3Ne omundu niyakhamureeba likhuwa liosi liosi mumuboolele mbu, ‘Omwami niye oubienya.’ Ne omundu oyo alamuhelesia bwangu.” 4Ako kekholekha khulwa okhuusia akaboolwa nende omulakusi mbu:

5 # Zak. 9:9 “Muboolele abandu ba Zayuni mbu,

lole, omuruchi wenywe yetsanga ewa muli.

Nomuholo, ne yekhaale khusishili,

khushimoosi shieisishili.”

6Abeechi nibatsia, nibakhola shinga olwa Yesu yali nababooleele. 7Nibareera isishili nende eshimoosi shiayo, nibabirakhwo ebifwalo biabwe, naye Yesu niyekhala khubifwalo biali khusishili ebio. 8Abandu abanji nibaala ebifwalo biabwe khumuhanda, ne abandi nibarema amasaka kemisaala nibaala khumuhanda okwo. 9#Tsits. 118:25,26Abandu abanji abali imbeliwe nende abali inyumawe balaanjilisia bari, “Omwana wa Daudi yetsoomibwe! Noweikhabi owitsa muliira elia Omwami! Nyasaye ouli hekulu mwikulu yetsoomibwe!”

10Olwa Yesu yenjila Yerusalemu, abandu boosi bomwitookho batsaatsahala muno, nibareeba bari, “Uno niwiina?”

11Abemikanda nibakalusia bari, “Uno niye omulakusi Yesu, womwitookho lia Nazareti elili mulukongo lwa Galilaya.”

Yesu alonda abakholi bobukhala okhurula muhekalu

(Mrk. 11:15-19; Luka 19:45-48; Yoh. 2:13-22)

12Yesu yenjila muhekalu, nalonda abandu boosi abali nibakholelangamwo obukhala. Nafumamia tsimeesa nende ebifumbi biabandu abali nibafunjinjia amapesa nende abali nibakusinjia amakuuku. 13#Isa. 56:7; Yer. 7:11Ne nababoolela ari, “Kahandikwa mumahandiko mbu, Nyasaye yaboola ari, ‘Ihekalu yanje yilalaangwa mbu inzu yamasaayo.’ Nebutswa inywe muchikholile okhuba imbinga yabanuuli!”

14Ababofu nende abalema nibetsa khuye muhekalu, nabahonia. 15Nebutswa olwa abakhulundu babesaaliisi nende abeechesia bamalako balola ebiamakana bia yali nakholanga, khandi abaana nibalanjilisinjia muhekalu bari, “Omwana wa Daudi yetsoomibwe,” basinyikha muno. 16#Tsits. 8:2Kho nibareeba Yesu bari, “Ohulilanga akababoolanga?”

Naye Yesu nabakalusia ari, “Embulilanga. Inywe mushili okhusomakhwo Amahandiko kaboolanga mbu, ‘Iwe Nyasaye wakhola abaana nende kata abashinuuna okhukhwitsoomia obwitsoomi bwa habwene’ ta?” 17Mana nabalekha narula mwitookho elo natsia Betsania, niyeyalisiayo eshilo eshio.

Yesu atsuba omukhuyu

(Mrk. 11:12-14,20-24)

18Mumabwibwi olwa Yesu yali nakalukhanga mwitookho yahulila inzala niyimuluma. 19Nalola omukhuyu khundulo weinjila, natsia ewa kwali, ne nalanyoolakhwo eshiamo shiosi shiosi ta, habula amasafu konyene. Kho naboolela omukhuyu okwo ari, “Shiolaamakhwo ebiamo khandi tawe!” Habwene nahabwene omukhuyu okwo nikuniala. 20Ne olwa abeechi balola ako bahuka nibareeba bari, “Omukhuyu okwo kunialile kurie lwangu butswa kurio?”

21 # Mat. 17:20; 1 Abakor. 13:2 Yesu nabakalusia ari, “Emuboolela toto mbu, nimuba nimusuubila ne nimulakanakania mumioyo chienywe ta, munyala okhukhola aka ekholile khumukhuyu okwo. Ne shikali kano konyene ta, nebutswa munyala okhuboolela eshikulu shino mbu, ‘Yichinje wisukune munyanza,’ ne nishikhola shirio. 22Ne nimuba nimusuubila, mulanyola shiosi shiosi eshiamusaba olwa musaaya.”

Lireebo khukobunyali bwa Yesu

(Mrk. 11:27-33; Luka 20:1-8)

23Yesu nakalukha muhekalu; ne olwa yali niyechesinjia, abakhulundu babesaaliisi nende abakofu betsa khuye nibamureeba bari, “Nibunyali shiina obwoli ninabwo okhukhola ebindu bino? Niwiina owakhuhelesia obunyali buno?” 24Yesu nabakalusia ari, “Ndalamureeba lireebo elala lionyene, ne nimuba nimungalusia, ndalamuboolela obunyali bwendi ninabwo obwokhukhola ebindu bino. 25Obunyali bwa Yohana bwokhubatiisia bwarula hena? Bwarula khu Nyasaye noho khumundu?”

Nibachaaka okhuyingana abeene khu beene bari, “Nikhwakhakalusia mbu, ‘Bwarula khu Nyasaye,’ alakhureeba ari, ‘Mbushiina nimulasuubilila Yohana?’ 26Ne nikhuboola mbu, ‘Bwarula khumundu,’ khuriire akabandu banyala okhukhola, shichila boosi basuubila mbu Yohana yali omulakusi.” 27Kho nibakalusia Yesu bari, “Shikhumanyile tawe.” Naye nababoolela ari, “Kata siesi shiemuboolela mbu nibunyali shiina bwekholelanga ebindu bino ta.

Oluchelo lwa basiani babili

28“Mulola murie? Yaliho omundu owali nabasianibe babili. Natsia khumukhulundu namuboolela ari, ‘Mwana wanje, tsia okhole emilimo mumukunda kwemitsabibu.’ 29Omwana oyo nakalusia ari, ‘Shinzenya okhukhola tawe,’ nebutswa olunyumakhwo nakalukhasia amapaaroke mana natsia. 30Mana samwana natsia khumwanawe undi namuboolela amakhuwa malala ako. Naye nakalusia ari, ‘Efuchilile papa, ndalatsia,’ nebutswa nalatsia tawe. 31Khubabili abo owakhola akasamwana yenya niwina?”

Nibakalusia bari, “Omukhulundu.”

Kho Yesu nababoolela ari, “Emuboolela toto mbu, abasololi bobushuru nende abatamba, bakhamuranjilila inywe okhwinjila mubwami bwa Nyasaye. 32#Luka 3:12; 7:29,30Okhuba Yohana Omubatiisi yetsa namumanyia injila inunji, ne shimwamusuubilila tawe. Nebutswa abasololi bobushuuru nende abatamba nibo abamusuubilila. Ne kata olwa mwalola ako shimwamala mwikalukhasie mumusuubilile tawe.”

Oluchelo lwabalimi bomukunda kwemitsabibu

(Mrk. 12:1-12; Luka 20:9-19)

33 # Isa. 5:1,2 Yesu naboola ari, “Rechelesie emuboolele oluchelo lundi. Yaliho omundu owaraaka omukunda kwemitsabibu, nakusirakhwo nolukaka, nayaba obwina obwokhutiinyilamwo emitsabibu, niyombakha omunaara kwabalindi. Mana nahosia omukunda okwo khubalimi, ne narula natsia mushialo shindi. 34Olwa lichesa liola, yaruma abakholibe okhutsia khubalimi abo okhunyoola omukabokwe okhurula khwichesa elo. 35Abalimi abo nibatiila abakholibe, mulala nibanywekha, oundi nibeera, noundi nibamulasa namachina. 36Khandi naruma abakholibe bandi abanji okhushila abambeli, mana abalimi abo nibabakholela malala ako. 37Olunyuma lwene yaruma omwanawe khubo, naboola ari, ‘Balahelesia omwana wanje oluyali.’ 38Nebutswa olwa abalimi abo balola omwanawe, baboolelana abeene khu beene bari, ‘Uno niye omwene obulaame bwomukunda kuno. Kho chende khumwiire, mana obulaame bulaba obwefwe!’ 39Kho nibamutiila nibamurusia mumukunda kwemitsabibu okwo nibamwiira.”

40Yesu nabareeba ari, “Bulano mwene mukunda kwemitsabibu olwa yetsa, nishiina eshia alakhola khubalimi abo?” 41Nibamukalusia bari, “Aleera abandu ababi abo, mana ahosie omukunda kwemitsabibu okwo khubandu bandi, abalamuhelesia omukabokwe kwelichesa mubise ebikhoyeele.”

42 # Tsits. 118:22,23 Yesu nababoolela ari, “Shimwasomakhwo aka Amahandiko akaboola mbu,

‘Lichina liene liabombashi baloba mbu libula inganga,

bulano liikholile olwanzilo lwomukoona.

OMWAMI Nyasaye niye owakhola ako,

nako nakokhuhuchisia muno khwifwe ta!’

43“Kho emuboolela toto mbu, Obwami bwa Nyasaye balarusibwa khwinywe nibuhelesibwa lihanga elibula ebiamo.”#21:43 Amahandiko kandi kameetakhwo olunyaali lwa 44 mbu, Ne oukwa khwichina lino alafunikhamwo ebitonye; ne lichina lino nilikwila omundu yesi yesi lilamutubulila elala

45Abesaaliisi abakhulundu nende Abafarisayo olwa bahulila tsinjelo tsia Yesu ne nibamanya mbu aboolanga khubo, 46bateema okhumutiila. Nebutswa baria emikanda, echiamulolanga okhuba omulakusi.

Currently Selected:

MATAYO 21: OLUPR

Highlight

Copy