MATAYO 12

Lireebo khukeinyanga eya Isabato

(Mrk. 2:23-28; Luka 6:1-5)

1 # Okhuk. 23:25 Mutsinyanga etsio, Yesu nabeechibe babirira mumikunda chieingano khunyanga eya Isabato; abeechibe bali inzala nibachaaka okhwimula ingano nibalia. 2Nebutswa olwa Abafarisayo babalola nibakholanga bario, baboolela Yesu bari, “Lola, abeechibo bakholanga akomusilo khunyanga eya Isabato.” 3#1 Sam. 21:1-6Yesu nabakalusia ari, “Shimwasomakhwo aka Daudi yakhola, ye halala nende aba yali ninabo olwa bali nibali inzala ta? 4#Abal. 24:9Yenjila munzu ya Nyasaye, mana ye, halala nende abandube nibalia emikaate echiahaanilwa Nyasaye. Ne lilako shiliali nibafuchilila ta, habula abesaaliisi bonyene nibo abali nibafuchililwa okhuliakhwo khumikaate echio. 5#Obub. 28:9,10Kata shimwasomakhwo mumalako ka Musa mbu, buli khunyanga eya Isabato, abesaaliisi abali muhekalu bafunakanga lilako elia Isabato, ne shibaali neshikha ta? 6Nasi emuboolela mbu, aliho hano oushila Ihekalu. 7#Mat. 9:13; Hos. 6:6Amahandiko kaboolanga mbu, ‘Enzenyanga abalolesinjia tsimbabasi, tawe abakholelanga isie emisango.’ Nimwakhamanyile eshisina shiamakhuwa kano, shimwakhakhalachiile ababula eshikha eshiina tawe. 8Okhuba Omwana womundu niye Omwami owa Isabato.”

Yesu ahonia omundu owomukhono kwafwokoya

(Mrk. 3:1-6; Luka 6:6-11)

9Yesu yarulaho niyenjila musinagogi, 10ewa omundu owomukhono kwafwokoya yali. Abandu bandi baliho abenya okhwinjilila Yesu khulwokhufunaka amalako, kho nibamureeba bari, “Amalako kafuchililanga okhuhonia omundu khunyanga eya Isabato?”

11 # Luka 14:5 Yesu nakalusia ari, “Niwiina khwinywe owakhaba nelikondi mana likwe mubwina oburambi khunyanga eya Isabato, ne nalekha okhulikhwesa nalirusiamwo? 12Omundu ashila likondi muno! Khulweshio amalako kafuchilila okhukhola akali amalayi khunyanga eya Isabato.” 13Mana naboolela omundu owomukhono kwafwokoya oyo ari, “Kololosia omukhonokwo.” Mana omundu oyo nakukololosia, ne nikuhona nikuba shinga okundi. 14Kho Abafarisayo nibarula musinagogi niberechekha shinga olwa banyala okhwira Yesu.

Omukhalabani omulobole wa Nyasaye

15Ne olwa Yesu yamanya mbu bali niberecheshe okhumwira, yarulaho, mana emikanda eminji nichimulondakhwo. Ne nahonia abalwale boosi, 16ne nabalaka mbu, baleshe okhuboolelakhwo abandu bandi aka yali nakholile. 17Yakhola ako kho mbu, aka Nyasaye yaboola okhubirira mumulakusi Isaya kosibwe mbu;

18 # Isa. 42:1-4 “Lole, uno niye omukhalabani wanje omulobole,

niye omuheelwa wanje, ounjamisinjia muno.

Ndalamuramwo Roho wanje,

naye alaboolela abamahanga boosi habulafu akobukhalachi bwanje bwahabwene.

19Shiyakhayingane kata okhulanjilisia,

noho kata omundu okhuhulila oluyokalwe khumuhanda tawe.

20Yakhabe omuholo khubateshele,

khandi wetsimbabasi khubabula oubakhoonya.

Yakhatsiililile ario okhuula olwa yakhakhole akahabwene okhuhula.

21Abamahanga boosi bakhabe nobunaayi muye.”

Yesu nende Belizebuli

(Mrk. 3:20-30; Luka 11:14-23)

22Mana abandu bandi nibareerera Yesu omundu omubofu, khandi oulanyala okhuboola ta, shichila yali neshishieno. Yesu nahonia omundu oyo, nikachila nachaaka okhuboola nende okhulola khandi. 23Abemikanda boosi nibang'ang'aala khuka Yesu yali nakholile. Nibaboola bari, “Uno yakhaba Omwana wa Daudi noho?”

24 # Mat. 9:34; 10:25 Ne olwa Abafarisayo bahulilakhwo kano, bakalusia nibaboola bari, “Ayininjia ebishieno shichila anyoolanga obunyali okhurula khu Belizebuli, omwami webishieno.”

25Yesu namanya aka bali nibapaaranga, kho nababoolela ari, “Buli oburuchi obukabukhana mumikanda echilwana echiene khuchiene bulasasikha. Khandi litookho noho abeinzu abakabukhana mumikanda echilwana echiene khuchiene shibalaralila tawe. 26Kho Setani naba niyakhaloonda Setani washie, aba yelwana omwene, kho oburuchibwe bwakharalila burie? 27Muboolanga mbu, isie erusinjia ebishieno khulwa obunyali bwa Belizebuli. Kali habwene, ne bulano ouhelesinjia abalondi benywe obunyali bwokhubirusia niwiina? Akabalondi benywe bakholanga kamanyisinjia mbu akamuboolanga shikali akahabwene tawe. 28Shierusinjia ebishieno khulwa obunyali bwa Belizebuli ta, habula khulwa Roho wa Nyasaye; akamasia mbu, Obwami bwa Nyasaye bumalile okhumwitsila.

29 # Tob. 8:3 “Abulaho ounyala okhwinjilila omundu owamaani munzuye mana ayaaye emianduchie, nalaranjiliile okhuboha omundu wamaani oyo, kho mana amuyaaye emianduchie tawe.

30 # Mrk. 9:40 “Omundu oulakholanga halala ninasi ta, niye oufukulanga; ne omundu oulakhoonyanga okhubunjelesia ta, niye ousalasinjia. 31Khulweshio, emuboolela mbu, abandu bakhabeelwe tsimbabasi khulwa obwonooni bwosi bwosi nende amanyeko koosi koosi khu Nyasaye. Nebutswa omundu yesi yesi naba nanyeka Roho Omutakatifu, shiyakhabeelwekhwo tsimbabasi tawe. 32#Luka 12:10Ne omundu yesi yesi oufukula Omwana womundu, yakhabeelwe tsimbabasi, nebutswa yesi yesi oufukula Roho Omutakatifu, shiyakhabeelwekhwo tsimbabasi tawe, kata mutsinyanga tsia bulano noho mutsiakhetse olunyuma.

Omusaala nende ebiamo biakwo

(Luka 6:43-45)

33 # Sira 27:6; Mat. 7:20; Luka 6:44 “Omusaala omulayi kwamanga ebiamo ebilayi, ne omusaala omubi kwamanga ebiamo ebibi. Omusaala kumanyishilanga khubiamo biakwo. 34#Mat. 3:7; 23:33; Luka 3:7; Mat. 15:18; Luka 6:45Inywe abolwibulo lwetsinzokha, mwakhanyala murie okhuboola akali amalayi olwa muli ababi? Okhuba omunwa kuboolanga aketsuule mumwoyo. 35Omundu omulayi, arusinjia mwibishilolie liebindu ebilayi, ebindu ebilayi, ne omundu omubi, arusinjia mwibishilolie liebindu ebibi, ebindu ebibi.

36“Mumanyiile elala mbu, khunyanga yokhukhalachilwa eshiina, buli mundu alikhalachilwa okhulondana nende buli likhuwa liabutswa eliaboola. 37Amakhuwako niko akakhakhukhalachile eshiina nikakhukhola okhuba omulunjishi noho oweshikha.”

Abeechesia bamalako nende Abafarisayo benya eshilolelo eshiamakana

(Mrk. 8:11-12; Luka 11:29-32)

38 # Mat. 16:1; Mrk. 8:11; Luka 11:16 Mana abandi khubeechesia aba Amalako nende Abafarisayo bamureeba bari, “Omwechesia, khwenya okhukholelekhwo eshilolelo shiamakana.”

39 # Mat. 16:4; Mrk. 8:12 Nebutswa yabakalusia naboola ari; “Abolwibulo olubi khandi olwobwilaasi bareebanga mbu baheebwe eshilolelo shiamakana, nebutswa shibalamanyibwa eshilolelo shindi ta, habula eshilolelo shiomulakusi Yona. 40#Yona 1:17Shinga olwa Yona yali mukunyeni tsinyanga tsitaru eshilo neshiteere, nolwa Omwana womundu yesi yakhabe mung'ani ario tsinyanga tsitaru eshilo neshiteere. 41#Yona 3:5Khunyanga eyokhukhalachilwa eshiina, abandu ba Nineve bakhasinjile mumuse okhumukhalachila inywe eshiina, shichila bekalukhasia okhurula mubwonooni bwabwe, olwa bahulila Yona nayaala; kho emuboolela mbu, aliho hano omukhongo okhushila Yona! 42#1 Abar. 10:1-10; 2 Akak. 9:1-12Khunyanga yokhukhalachilwa eshiina, Omuruchi Mukhasi owa Sheba#12:42 Sheba: Emulambo weshialo shia Palesitina. yakhamukhalachile inywe eshiina, shichila yachenda okhurula mushialoshie niyetsa okhuhulila obwibaali bwobuchesi bwa Solomoni. Ne emuboolela mbu, aliho hano omukhongo okhushila Solomoni!

Okhukalukha khweshishieno

(Luka 11:24-26)

43“Olwa eshishieno shirulanga mumundu, shitsitsanga nishibirira khushialo eshiumu nishikhaaba aha shihuluushila. Nishilanyoola ta, 44nishiiboolela eshiene shiri, ‘Ndalakalukha munzu yali yanje.’ Ne olwa shikalukha nishianyoola mbu, inzu yatsana eyo niyikhaya, khandi mbu yeyilwe mana yikasiibwe obulayi, 45nishikalukhayo shitsia okhulanga ebishieno bindi musafu ebibi muno, nibichelela okhumenyamwo. Ne olunyuma lwokhumwinjilamwo, omundu tsana aba obubi okhushilakhwo shinga olwa yali olwambeli. Ako niko akatsia okhwikholekha khubandu bolwibulo olumayanu lwa bulano.”

Nyina Yesu nende abaana babwe

(Mrk. 3:31-35; Luka 8:19-21)

46Yesu yali nashiboolanga nabandu, ne nyina nende abaana babwe nibolaho. Basinjila elwanyi nibenya mbu baboole ninaye. 47Kho omundu mulala khubandu balimwo namuboolela ari, “Lola, mamawo nende abaana benywe basinjiile elwanyi benyanga okhuboolakhwo ninawe.” 48Yesu nakalusia ari, “Mama wanje niye niwiina? Nabo abaana befwe nibeena?” 49Kho yamala namanyia omukhonokwe khubeechibe naboola ari, “Lole! Bano nibo mama wanje nende abaana befwe! 50Omundu yesi yesi oukholanga akokhwenya khwa Papa wanje ouli mwikulu, niye omusiani wefwe, niye omukhaana wefwe khandi niye mama wanje.”

Currently Selected:

MATAYO 12: OLUPR

Highlight

Copy