LUKA 8

Abakhasi abalonda khu Yesu

1Olunyumakhwo, Yesu yachenda mumatookho nende mubikwenyi nayaalanga Amakhuwa Amalayi aka Obwami bwa Nyasaye. Abechibe ekhumi nababili nabo nibatsia ninaye. 2#Mat. 27:55,56; Mrk. 15:40,41; Luka 23:49Kata abakhasi bandi, abali nibarusibwamwo ebishieno nibahonibwa obulwale, abalangwa mbu, Mariamu (owelira mbu, Magadalene) owali nayinibwemwo ebishieno musafu, 3nende Yoana, omukhasi wa Kuza, owali omunyapara wa Herode, nende Susana, nende abandi abanji abekhoonyelanga emiandu chiabwe abeene okhukhoonya Yesu nende abeechibe.

Oluchelo lwomumiitsi weimwo

(Mat. 13:1-9; Mrk. 4:1-9)

4Ne lwomukanda omukhongo kwekhung'asia halala mana abandu okhurula mumataala kahukhane nibatsiililila okhwitsa khu Yesu, Yesu yababoolela muluchelo ari, 5“Omumiitsi weimwo yarula natsia okhumiitsa imwoye. Ne olwa yali namiitsanga, ndala yakwa khunjila niyisenachilwa hasi nabandu, mana amanyonyi kokhwikulu niketsa nikachibootsa. 6Eyindi yakwa khwiloba liokhulwanda ne olwa yamela, yaniala lwangu, shichila liloba liabula obunyifu obuchihela. 7Imwo yindi yakwa hakari mumahwa, ne amahwa ako nikakhula halala ninayo ne nikachitiiya. 8Nayo yimwo yindi yakwa mwiloba lilayi, niyikhula niyama ebiamo buli ndala ebihela eshikhumi.” .

Kho Yesu namalilisia naboola ari, “Ouli namarwi kokhuhulila, ahulile!”

Lichoomo liokhwechesia mutsinjelo

(Mat. 13:10-17; Mrk. 4:10-12)

9Ne olwa abeechi ba Yesu bamureeba eshisina shioluchelo olwo, 10#Isa. 6:9yabakalusia naboola ari, “Inywe mwahebwa obuchesi bwokhumanyilisia amabiso aka Obwami bwa Nyasaye, nebutswa abandi boosi baboolelungwa butswa mutsinjelo kho mbu, bahenjenje ne nibalalola tawe, bahulilenje ne nibalamanyilisia tawe.

Yesu yenoosia eshisina shioluchelo lwomumiitsi

(Mat. 13:18-23; Mrk. 4:13-20)

11“Shino nishio eshisina shioluchelo olwo. Imwo, nilio likhuwa lia Nyasaye. 12Eyakwa khunjila, nibo bahulilanga likhuwa, nebutswa Setani yetsa nayinia likhuwa elo mumioyo chiabwe kho mbu, baleshe okhusuubila nibahonibwa. 13Nayo eyakwa khulwanda, nibo abahulilanga likhuwa, nibalifuchilila nobusaangaali, nebutswa shibaralila ta, basuubila butswa khulweshise shituutu, ne olwa amateemo ketsa, bakosia obusuubili bwabwe. 14Imwo eyakwa mumahwa, nibo abahulilanga likhuwa lia Nyasaye, nebutswa okhuhenda, obuyinda nende okhuheela obulamu bweshialo, biikalila ebiamo biabwe okhwenga. 15Nayo eyakwa khwiloba lilayi, nibo abahulilanga likhuwa, nibalihandakhwo nemioyo emilayi khandi emihulili, ne nibesumilisia okhuula olwa baama ebiamo.

Itaha eyarenjekhwa khushichibi

(Mrk. 4:21-25)

16 # Mat. 5:15; Luka 11:33 “Abulaho ouhafinjia itaha mana achifunishila mushimwelo noho achira mulwalo mweshitali tawe. Habula achirenjekhanga khushichibi shiayo kho mbu, olwa abandu benjila munzu, balole obulafu bwayo.

17 # Mat. 10:26; Luka 12:2 “Shiosi shiosi eshiebisa shiakhabisulwe, kata eshifunishilwa shiosi shiakhafunulilwe nishirebwa habulafu. 18#Mat. 25:29; Luka 19:26Khulweshio, mube meeso olwa muhulila, shichila omundu yesi yesi oulikhwo nebindu, alameetwa ebindi, naye yesi yesi oubula ninabio, kata bitiiti ebiapaaranga mbu ali ninabio alanuulwa.”

Nyinamwana Yesu nende abaana babwe Yesu

(Mat. 12:46-50; Mrk. 3:31-35)

19Mana nyinamwana Yesu nende abaana babwe Yesu nibetsa, nebutswa shibanyalilwa okhuula ewa Yesu yali tawe, khulwa omukanda omukhongo kwabandu. 20Mana Yesu naboolelwa ari, “Mamawo nende abaana benywe basinjiile elwanyi, ne bekoombanga okhukhulola.” 21Naye Yesu nakalusia naboola ari, “Abo abahulilanga likhuwa lia Nyasaye ne nibalikhola, nibo mama wanje nende abaana befwe.”

Yesu yalenjeesia imbumbuyeka

(Mat. 8:23-27; Mrk. 4:35-41)

22Inyanga yindi Yesu yenjila muliaro halala nende abeechibe ne nababoolela ari, “Chenda khwambushe khutsie injelekha weinyanza.” Mana nibachaaka oluchendo okhutsia. 23Ne olwa bali nibatsitsanga, Yesu yachaaka okhukona tsindoolo. Ne omuyeka kweimbumbuyeka nikuchaaka okhuhutsa khunyanza, nalio eliaro nilichaaka okhwitsulamwo amaatsi, mana nibaba mumatinyu. 24Abeechi nibatsia nibabuusia Yesu nibamuboolela bari, “Omwami, Omwami! Khufwitsanga!” Mana Yesu nabuukha nahalabila omuyeka okwo nende amarunda kamaatsi ako, nabio nibihoonjeela, mana omulenjeelo nikubaho. 25Mana Yesu nabareeba ari, “Obusuubili bwenywe buli hena?” Nabo nibaria, nibahuka, nibareebana bari, “Kho niwiina uno, ouhalabilanga butswa kata omuyeka nende amarunda kamaatsi, ne nebimuhulila?”

Yesu ahonia omundu owebishieno

(Mat. 8:28-34; Mrk. 5:1-20)

26Yesu nende abeechibe niboola mushialo shia Gerasi, eshihengaane nende Galilaya, injelekha weinyanza. 27Ne olwa Yesu yali niyakhekha khuluchinga, yabukaana nende omundu undi okhurula mwitookho, owalimwo ebishieno. Ne khulwa oluhoono olurambi omundu oyo shiyafwalangakhwo tsingubo ta, khandi shiyamenyanga munzu tawe. Nebutswa yamenyanga mubilindwa. 28Olwa yalola Yesu, yalila obutinyu, nakwa mumakuluke niyayula naboola ari, “Yesu Omwana wa Nyasaye Omukhongo Muno! Wenyanga shiina khwisie? Ekhusaaya mbu nochama, olasaalisia ta!” 29Yaboola ario shichila Yesu yali nalachile eshishieno eshio okhurula muye. Ne akhandi akhanji nishiamutiilanga, kata niyabohungwa amakhono nende bilenje neminyololo nende ebitiili, yakhalakanga mana yelukhasibwa nende eshishieno eshio okhutsia mushitsiimi.

30Yesu namureeba ari, “Eliiralio niwe wiina?” Naye nakalusia ari, “Eliira lianje nisie Legioni,” shichila ebishieno ebinji biali nibienjila muye. 31Ebishieno ebio nibisaaya Yesu mbu, alabilaka okhwinjila mubuko tawe.

32Lituuli likhongo lietsimbitsi liali ahambi aho, niliayanga khushikulu. Kho ebishieno ebio nibimusaaya mbu afuchilile binjile mutsio, mana nabifuchilila ario. 33Ebishieno nibirula mumundu oyo mana nibinjila mutsimbitsi etsio. Lituuli lietsimbitsi elo nilikholomokha tsimbilo okhurula khulukoba nilikwa munyanza nilifwilamwo.

34Olwa abaayi betsimbitsi etsio balola akali nikekholeshe, belukha, nibatswania amakhuwa ako mwitookho liosi nende mulukongo olwo. 35Abandu nibarula nibatsia okhulola akali nikekholeshe, ne olwa boola ewa Yesu yali, banyoola omundu owebishieno biali nibirulilemwo niyekhaale ahambi nende Yesu nafwalile tsingubo amapaaroke nikali habwene, mana boosi nibaria. 36Ne abo abali nibaluutsi amakhuwa ako, benoosia abandu shinga lwomundu owali nebishieno oyo yahonibwa. 37Mana abandu boosi abeshialo shia Gerasi nibaboolela Yesu mbu arule atsie, okhuba bali noburi obunji. Kho Yesu niyenjila muliaro narulayo natsia. 38Ne Omundu owebishieno biarulamwo oyo nasaaya Yesu ari, “Lekha enzie ninawe.” Nebutswa Yesu yamukaya naboola ari, 39“Kalukha ingowo oboole obuloli khuka Nyasaye akhukholeele.” Mana omundu oyo narula natsia mwitookho mwosi natswania aka Yesu yali namukholeele.

Yesu ahonia omukhaana wa Yairo nende omukhasi owatiila khunguboye

(Mat. 9:18-36; Mrk. 5:21-43)

40Olwa Yesu yakalukha injelekha undi weinyanza, abandu bamwinjisia, shichila boosi bali nibamulindanga. 41Ne omundu oulangwa mbu Yairo yetsa. Yali omwimilisi omukhongo womusinagogi, ne nakwa hasi mumakulu ka Yesu namusaaya mbu yetse munzuye, 42shichila omukhaanawe omutelwa, owemiyika ekhumi nachibili, yali nanyiranga. Ne olwa yali natsitsanga, abandu bamwibumbakhwo okhurula mutsimbeka tsiosi. 43Ne mubo yalimwo omukhasi owali niyerulutsanga khulwa oluhoono lwemiyika ekhumi nachibili, niyamala emianduchie chiosi. Ne shiyaliho owanyalilwa okhumuhonia tawe. 44Yetsela enamukongo wa Yesu, natiila khuluhanda lweingubo ya Yesu, ne habwena nahabwene okhwirulutsakhwe nikhuhwa. 45Yesu nareeba mbu, “Niwiina oundililekhwo?” Buli mundu niyekaana naye Petero naboola ari, “Omwami, abandu bakhubotokhaane bakhwitisinjiakhwo.”

46Ne Yesu naboola ari, “Omundu yandililekhwo, shichila embuliile obunyali bwanje bwokhuhonia niburulamwo.” 47Ne lwomukhasi oyo yalola mbu shianyala okhwibisa ta, yetsa natechelanga, nakwa mumakulu ka Yesu, naboola imbeli wabandu boosi amakhuwa akali nikachilile namutiilakhwo nende shinga olwa yali nahoniibwe habwene nahabwene. 48Yesu namuboolela ari, “Omukhaana wanje obusuubilibwo bukhuhoniye, otsie mumulembe.”

49Olwa Yesu yali nashiboolanga amakhuwa ako, omurumwa yetsa okhurula enanzu wa Yairo naboolela Yairo ari, “Omwanawo afwile, olamunyasia omwechesia tawe.” 50Nebutswa Yesu yakahulila, ne naboolela Yairo ari, “Shiolaria ta, suubila butswa, omwana alahona.” 51Ne olwa yenjila munzu, shiyafuchilila omundu yesi okhwinjila ninaye ta, habula Petero, Yohana, Yakobo, nende samwana omukhaana halala nende nyinamwana bonyene. 52Boosi abaliho bali nibekhuulanga nibalila amasika khulwa omwana oyo. Yesu nababoolela ari, “Shimulekhuula tawe, omwana shiafwile ta, akonanga butswa tsindoolo.” 53Nabo nibamutseshelela okhuba bamanya mbu afwile. 54Mana Yesu namutiila omukhono naboola ari, “Omwana, buukha!” 55Omwana oyo nalamukha, ne nabuukha lwangu, mana Yesu nabalaka mbu, bamuhelesie eshiokhulia alie. 56Abebusibe nibahuka, naye Yesu nabakaania mbu, shibalaboolelakhwo omundu yesi yesi akali nikekholeeshe tawe.

Currently Selected:

LUKA 8: OLUPR

Highlight

Copy