LUKA 4

Okhuteemwa khwa Yesu

(Mat. 4:1-11; Mrk. 1:12-13)

1Yesu yachelela okhurula mumwalo kwa Yorodani niyetsulwemwo Roho Omutakatifu, ne niyemililwa nende Roho watsana oyo okhutsia mushitsiimi, 2ewa Setani yamuteema tsinyanga amakhumi kane. Ne shiyaliakhwo eshiokhulia shiosi shiosi mutsinyanga etsio tsiosi tawe. Kho olwa tsinyanga etsio tsiali nitsihwele, inzala yamuluma.

3Setani namuboolela ari, “Noba noli Omwana wa Nyasaye, laka lichina lino mbu liikhole omukaate.”

4 # Okhuk. 8:3 Nebutswa Yesu namukalusia ari, “Kahandikwa mbu, omundu shialabetsanga mwoyo khulwa omukaate kwonyene tawe.”

5Mana Setani namuyila khushikulu, ne mubwangu namumanyisia amahanga koosi akokhushialo. 6Ne namuboolela ari, “Ndalakhuhelesia obunyali khumahanga kano koosi nende obuyinda buno bwosi, shichila bwamala okhuhaanwa mumakhono kanje, ne enyala okhukabilakhwo yesi yesi owenzenya. 7Kho noba niwakhanzinamila, amahanga kano koosi kalaba akoko.”

8 # Okhuk. 6:13 Yesu namukalusia naboola ari, “Amahandiko kaboolanga kari, ‘Omwinamilenje OMWAMI Nyasayewo nomukhalabanila ye yenyene!’ ”

9Mana Setani namwimilila okhutsia Yerusalemu, ne namura khubutenje obweihekalu, namuboolela ari, “Noba noli Omwana wa Nyasaye, ruuma okhurula hano okwe hasi, 10#Tsits. 91:11,12okhuba Amahandiko kaboolanga kari, ‘Nyasaye alalachilisia abamalaikabe okhukhulinda obulayi.’ 11Khandi kaboolanga kari, ‘Abamalaika abo balakhuchinga obulayi mumakhono kabwe kho mbu, oleshe okhwisichirala eshilenjeshio khwichina.’ ” 12#Okhuk. 6:16Nebutswa Yesu yamukalusia naboola ari, “Amahandiko kaboolanga kari, ‘Shiolamuteema OMWAMI Nyasayewo tawe.’ ”

13Ne olwa Setani yali namalile okhuteema Yesu munjila tsiosi, yamulekhakhwo khulweshise shitiiti.

Yesu achaaka obukhalabanibwe Galilaya

(Mat. 4:12-17; Mrk. 1:14-15)

14Mana Yesu nakalukha Galilaya, ne obunyali bwa Roho Omutakatifu bwali muye. Mana ifumaye niyitswana mutsingongo tsiosi tsiebweneyo. 15Kho niyechesia mutsisinagogi tsiabwe, mana abandu boosi nibamwitsoomia.

Yesu alobwa Nazareti

(Mat. 13:53-58; Mrk. 6:1-6)

16Mana Yesu niyola Nazareti, ewa yali niyakhulila, ne khunyanga eya Isabato, yatsia musinagogi shinga olwa yakholanga buli lwosi, ne nasinjila okhusooma Amahandiko. 17Mana nibamuhelesia eshitabu eshikanye shiomulakusi Isaya. Nashibambula, ne nanyoola aha kahandikwa kari;

18 # Isa. 61:1,2 “Roho owa OMWAMI Nyasaye ali mwisie,

shichila yanzahuule isie okhuyaalila

abamanani Amakhuwa Amalayi.

Yarumile okhuyaala akobulekhuulwi bwababohe,

okhutimbusia tsimoni tsiababofu nende okhulekhuula abasandibungwa.

19Khandi yarumile okhurumbula mbu,

eshise eshia OMWAMI Nyasaye okhuhonia abandube shiulile.”

20Mana Yesu nafumba eshitabu eshio, nakalusilia omukhalabani womusinagogi ne niyekhala. Abandu abali musinagogi omwo boosi nibamurangaala. 21Naye nababoolela ari, “Amahandiko ka muhuliile nikasomwa ako, leelo kosiibwe habwene.”

22Boosi nibamwitsoomia khandi nibahuchisibwa namakhuwa amalayi kayaboola. Ne nibareeba bari, “Wuno shiali niye omwana wa Yosefu?”

23Naye nababoolela ari, “Emanyile toto mbu, mwakhambooleele oluchelo luno muri, ‘Omusilishi, wihonie omwene.’ Khandi mwakhambooleele muri, ‘Khukholelekhwo mwitaala mwefwe muno akakhwahulila mbu, okholanga Kaperinaumu.’ 24#Yoh. 4:44Emuboolela toto embu, ‘Abulaho omulakusi oufuchililungwa mwihanga lia yebulwamwo tawe.’

25 # 1 Abar. 17:1 “Nebutswa emuboolela toto mbu, abakhasi abalekhwa abanji baliho mutsinyanga tsia Eliya, olwa eshimiyu shialiho khulwemiyika chitaru neyinusu, mana inzala niyibaho ikhongo mushialo shiosi. 26#1 Abar. 17:8-16Ne Eliya shiyarumwakhwo khumundu undi yesi yesi mu Isiraeli ta, habula khumukhasi omulekhwa, owali niyamenya Zarefatsi mushialo shia Sidoni. 27#2 Abar. 5:1-14Khandi bali nibaliho abobuchele abanji abamenya mu Isiraeli, mutsinyanga tsiomulakusi Elisha, ne shialikhwoho awahonibwa obuchele ta, habula Namani womushialo shia Siria.”

28Mana boosi abali musinagogi olwa bahulilakhwo amakhuwa ako, batiilwa noburuma. 29Nibasinjila nibakhwesa Yesu nibamurusia mwitaala elo, nibamuyila hashikholomokho khubutenje bweshikulu shielitaala liabwe liali niliombakhwakhwo. Benya okhumusindikha mbu akwe mafumama mwibanda, 30nebutswa yabirila hakari mubo natsia butsia.

Yesu ahonia omundu owali nebishieno

(Mrk. 1:21-28)

31Mana Yesu nakholomokha niyoola Kaperinaumu, litaala lia Galilaya, ewa yechesia abandu khunyanga eya Isabato. 32#Mat. 7:28,29Abandu boosi nibahuka muno khukhwechesiakhwe, shichila yechesia nobunyali. 33Ne musinagogi omwo yalimwo omundu owebishieno biali muye, ne omundu oyo nayiiba nomwoyo omukhongo naboola ari, 34“Eshiokhwenyangakhwo nishiina, iwe Yesu omunazareti? Witsile hano okhukhwiira ifwe noho? Ekhumanyile, okhuba oli omurumwa omutakatifu wa Nyasaye!”

35Naye Yesu nahalabila eshishieno eshio nashiboolela ari, “Holeela tsi! Khandi rula mumundu uno!” Eshishieno eshio nishikwisia omundu oyo hasi imbeli wabwe, ne nishimurulamwo nishilamusaalisiakhwo tawe.

36Abandu boosi nibang'ang'aala nibareebana abeene khubeene bari, “Kano nimakhuwa shiina? Okhuba omundu uno, mubunyali nende amaani alakanga ebishieno, nabio nibirula nibitsia!” 37Mana amakhuwa ka Yesu nikatswana mutsingongo etsio tsiosi.

Yesu ahonia abandu abanji

(Mat. 8:14-17; Mrk. 1:29-34)

38Kho Yesu narula musinagogi, ne niyenjila munzu ya Simoni. Naye nyakhufialanyene Simoni yali nalwala omurengo, ne nibaboolela Yesu akomulwale oyo. 39Yesu natsia nasinjila aha yali nakonile ne nalaka omurengo okwo mbu kumurulemwo. Omurengo nikumurulamwo ne habwene nahabwene nabuukha, nachaaka okhubakhalabanila khumeesa. 40Khubwile eliuba nilishili okhuyeela, boosi abali nabalwale bobulwale bwahukhane babareera, naye Yesu nabarakhwo emikhonochie, nabahonia boosi pe. 41Khandi ebishieno biarula mubandu abanji nibiyiiba biri, “Iwe niwe Omwana wa Nyasaye!” Yesu nahalabila ebishieno ebio khandi nalabifuchililakhwo okhuboola ta, shichila biamanya mbu niye Kristo.

Yesu ayaala mulukongo lwa Yudea

(Mrk. 1:35-39)

42Ne olwa bwashia, Yesu yarula natsia mushitsiimi habundu aha abandu babula ne nabayo yenyene. Abandu nibachaaka okhumukhaaba, ne olwa bamunyoola nibateema okhumwikalila mbu aleshe okhutsia. 43Nebutswa nababoolela ari, “Ekhoyile khandi okhuyaala Amakhuwa Amalayi kobwami bwa Nyasaye mumataala kandi, shichila niko aka Nyasaye yaruma okhukhola.”

44Kho nayaala mutsisinagogi tsiomulukongo lwa Galilaya tsiosi.

Currently Selected:

LUKA 4: OLUPR

Highlight

Copy