LUKA 3

Obuyaali bwa Yohana Omubatiisi

(Mat. 3:1-12; Mrk. 1:1-8; Yoh. 1:19-28)

1Mumuyika kwekhumi nakharano kwomuburuchi bwa Tiberia, omuruchi wa Roma, Pontio Pilato yali omukafuna wa Yuda. Naye Herode yali omuruchi wa Galilaya, Filipo omusiani wabwe Herode, yali omuruchi webialo bia Iturea nende Turakoniti. Ne Lisania yali omuruchi wa Abilene. 2Ne Anasi nende Kayafa nibo abali abesaaliisi abakhulundu. Mutsinyanga tsiene etsio, Nyasaye yaruma likhuwalie khu Yohana omwana wa Zakaria owali nali mushitsiimi. 3Kho Yohana natsia mutsingongo tsiosi etsiali hambi nomwalo kwa Yorodani, nayaala naboola ari, “Mwikalukhasie okhurula mubwonooni mana mubatiisibwe, naye Nyasaye alamuleshela obwonooni bwenywe.” 4#Isa. 40:3-5Shinga olwa kahandikwa mushitabu shiomulakusi Isaya mbu,

“Omwoyo kulanjilisiinjia mushitsiimi kuri,

‘Mukaasie injila eya OMWAMI Nyasaye,

mukololosie tsinjilatsie.

5Buli libanda okhuula libukwe,

nabio ebikulu biosi bikwalaasibwe.

Emihanda echiashiama okhuula chilunjisibwe,

ne tsinjila tsiamachina okhuula tsikwalaasibwe.

6Mana abandu boosi balalola obuhonia bwa Nyasaye.’ ”

7 # Mat. 12:34; 23:33 Kho Yohana naboolela abemikanda abamwitsila mbu ababatiisie ari, “Inywe olwibulo lwetsinzokha! Niwiina oumuchetsiyiyie mbu mwihonokoshe eshinyasio shia Nyasaye ali ahambi okhureera? 8#Yoh. 8:33Mumanyisie okhubirira mubikhole bienywe mbu mwikalukhasiye. Ne muleshe okhuchaaka okhwiyitsiala nimuboola muri, ‘Aburahamu niye kuuka wefwe.’ Emuboolela toto mbu, Nyasaye anyala okhubuusilia Aburahamu olwibulo okhurula mumachina kano! 9#Mat. 7:19Kata kario, ihaywa yimalile okhuyrechekhwa mushisina shiemisaala khulwokhuchirema, khulweshio buli omusaala okulaama ebiamo ebilayi ta, kularemwa nikusukunwa mumulilo.”

10Mana abemikanda nibamureeba bari, “Kho khukhole shiina?” 11Naye nabakalusia ari, “Ouli nende tsingubo tsibili akabilekhwo oubula, naye ouli nebiokhulia, yesi akhole ario.”

12 # Luka 7:29 Abasololi bobushuru bosi nibetsa mbu babatiisibwe, nibamureeba bari, “Omwechesia, nefu khukhole shiina?” 13Nabakalusia ari, “Shimulasololakhwo ebishila ebia mwalakwa okhusolola tawe.”

14Abelihe nabo nibamureeba bari, “Nefu khukhole shiina?” Nabakalusia ari, “Shimulanuulakhwo omundu yesi yesi amapesa namaani ta, kata okhwinjilila omundu yesi yesi itookho khukobubeeyi tawe. Mufuchilile mbu omurungo kwenywe nokumuhela.”

15Obunaayi bwabandu nibuchaaka okhwimeeta, ne nibachaaka okhukanakania nikakhaba mbu, Yohana niye Kristo watsana noho. 16Kho Yohana nabakalusia ari, “Isie emubatiisinjia nende amaatsi, ne oushila isie yetsanga. Isie shingwanile kata okhuboholola emikoye chiebilaarobie tawe. Ye alamubatiisia nende Roho Omutakatifu nende omulilo. 17Ne olutelulwe lwokhuseleetsa imeleye luli mumukhonokwe, alakhung'asia inganoye mushiachishie, nebutswa alasamba omukhuutsi mumulilo okulasimanga tawe.”

18Kho, Yohana yayaala Amakhuwa Amalayi natsuuba abandu okhwikalukhasia okhulekha obwonooni bwabwe. 19#Mat. 14:3,4; Mrk. 6:17,18Nebutswa yahalabila omukafuna Herode, shichila yali niyateeshia Herodia, omukhasi womusiani wabwe, ne khandi niyakhola amabi kandi amanji. 20Ne okhumeeta khumabi kandi koosi aka Herode yali niyakhola, yatiila Yohana namura mumbohe.

Okhubatiisibwa khwa Yesu

(Mat. 3:13-17; Mrk. 1:9-11)

21Olwa abandu boosi bali nibamalile okhubatiisibwa, Yesu yesi yabatiisibwa. Ne olwa yali nasaayanga, likulu liekukha. 22#Obucha. 22:2; Tsits. 2:7; Isa. 42:1; Mat. 3:17; Mrk. 1:11; Luka 9:35Mana Roho Omutakatifu oufwana shinga lihusi niyekha namuyelakhwo. Ne Omwoyo okhurula mwikulu nikuboola kuri, “Iwe niwe omwana wanje omuheelwa. Enjamisibungwa ninawe muno#3:22 Amahandiko kandi kakhale kasoomanga kari, “Ekhunyoolile olwaleelo”..”

Aka Tsinzibulo tsiabakuukanyene Yesu Kristo

(Mat. 1:1-17)

23Yesu yachaaka emilimochie nali nemiyika ahambi amakhumi kataru. Abandu bapaaranga mbu, nomwana wa Yosefu, omwana wa Heli. 24Heli yali omwana wa Matsati, owali omwana wa Lawi, owali omwana wa Meliki, owali omwana wa Yanai, owali omwana wa Yosefu. 25Naye Yosefu yali omwana wa Matatsia, owali omwana wa Amosi, owali omwana wa Nahumu, owali omwana wa Hesili, owali omwana wa Nagai. 26Naye Nagai yali omwana wa Maatsi, owali omwana wa Matatsia, owali omwana wa Semeini, owali omwana wa Yoseki, owali omwana wa Yoda. 27Naye Yoda yali omwana wa Yoanani, owali omwana wa Resa, owali omwana wa Zerubabeli, owali omwana wa Shealitieli, owali omwana wa Neri. 28Neri yali omwana wa Meliki owali omwana wa Adi, owali omwana wa Kosamu, owali omwana wa Elimadamu, owali omwana wa Eri. 29Eri yali omwana wa Yoshwa, owali omwana wa Eleazari, owali omwana wa Yorimu, owali omusaini wa Matsati, owali omwana wa Lawi. 30Lawi yali omwana wa Simoni, owali omwana wa Yuda, owali omwana wa Yosefu, owali omwana wa Yohana, owali omusaini wa Eliakimu. 31Eliakimu yali omwana wa Melea, owali omwana wa Mena, owali omwana wa Matatsa, owali omwana wa Natsani, owali omwana wa Daudi. 32Daudi yali omwana wa Yese, owali omwana wa Obedi, owali omwana wa Boazi, owali omwana wa Salimoni, owali omwana wa Nashoni. 33Nashoni yali omwana wa Aminadabu, owali omwana wa Adimini, owali omusaini wa Arini, owali omwana wa Hezironi, owali omwana wa Faresi, owali omwana wa Yuda. 34Yuda yali omwana wa Yakobo, owali omwana wa Isaka, owali omwana wa Aburahamu, owali omwana wa Tera, owali omwana wa Nahori. 35Nahori yali omwana wa Serugi, owali omwana wa Reu, owali omwana wa Pelegi, owali omwana wa Eberi, owali omwana wa Shela. 36Shela yali omwana wa Kenani, owali omwana wa Arapakhashadi, owali omwana wa Shemu, owali omwana wa Noa, owali omwana wa Lemeki. 37Lemeki yali omwana wa Metsusela, owali omwana wa Enoka, owali omwana wa Yaredi, owali omwana wa Mahalaleli, owali omwana wa Kenani. 38Kenani yali omwana wa Enoshi, owali omwana wa Setsi, owali omusaini wa Adamu, omwana wa Nyasaye.

Currently Selected:

LUKA 3: OLUPR

Highlight

Copy