LUKA 20
20
Lireebo khu akobunyali bwa Yesu
(Mat. 21:23-27; Mrk. 11:27-33)
1Inyanga yindi olwa Yesu yali niyechesinjia Injiili muhekalu, abakhulundu babesaaliisi nende abeechesia bamalako halala nende abakofu betsa, 2nibamuboolela bari, “Khuboolelekhwo, nibunyali shiina obuchilanga nokhola amakhuwa kano? Owakhuhelesia obunyali buno niwiina?”
3Yesu nabakalusia ari, “Bulano leshe nasi emureebe lireebo, mboolelekhwo, 4Obubatiisi bwa Yohana bwarula hena? Bwarula khu Nyasaye noho mubandu?” 5Nabo nibachaaka okhuyingana abeene khu beene bari, “Khuboole shiina? Nikhuboola mbu, ‘bwarula khu Nyasaye’, alakhureeba ari, ‘Ne mbushiina nimulamusuubila Yohana tsana oyo?’ 6Ne nikhuba nikhuboola khuri, ‘bwarula mubandu,’ abandu boosi balakhulasa namachina shichila bamanya mbu, Yohana yali omulakusi.” 7Kho nibakalusia bari, “Shikhumanyile ewabwarula tawe.”
8Naye Yesu nababoolela ari, “Kata siesi shimuboolela mbu nobunyali shiina obuchilanga nikhola amakhuwa kano tawe.”
Oluchelo olwa abalimi abaleshelwa omukunda kwemitsabibu
(Mat. 21:33-46; Mrk. 12:1-12)
9 #
Isa. 5:1
Mana Yesu naboolela abandu oluchelo luno ari, “Omundu undi yaraka emitsabibu mumukunda, mana nahosia omukunda okwo abalimi, naye natsia mushialo shindi namenyayo tsinyanga tsinyinji. 10Olwa tsinyanga tsiola etsiokhunoka emitsabibu yaruma omukholiwe khubalimi abo mbu bamuhelesie eshitonyeshie eshielichesa lietsitsabibu. Nebutswa abalimi abo banywekha omukholiwe oyo nibamuloonda amakhono amakhaya. 11Kho naruma khandi omukholi undi, nebutswa abalimi abo bamunywekha nibamukholela akeshifimbwa murwe mana khandi nibamuloonda amakhono amakhaya. 12Naruma omukholi owakhataru, yesi khandi nibamusalisia nibamuloonda. 13Omwami mwene mukunda kwemitsabibu naboola ari, ‘Nekhole shiina? Ndalaruma omwana wanje omuheelwa; haundi omwene uno balamuhelesia oluyali!’ 14Ne olwa abalimi abo bamulola, baboolelana abeene khubeene bari, ‘Uno niye omwene obulaame bwomukunda kuno, kho chende khumwire mana emianduchie chilaba echiefwe!’ 15Kho nibamurusia mumukunda kwemitsabibu, nibamwira.”
Yesu nareeba ari, “Kho bulano omwami omwene mukunda alakhola arie abalimi abo?
16“Aletsa okhusasia abalimi abo nende okhuhelesia abandu bandi omukunda okwo.”
Ne olwa abandu bahulilakhwo ako baboola bari, “Shikalekholekha kario tawe!”
17 #
Tsits. 118:22
Mana Yesu nabahenga nabareeba ari, “Kho eshisina shia Amahandiko kano mbu,
‘Lichina liabombashi baloba,
likholile olwanzilo lwomuse’ nishiina?
18Buli omundu oukwa khwichina elo, alafinikhamwo ebitonye, naye owa lichina elo likwila, alatubushila elala.”
Lireebo khu akokhurunga obushuru khumuruchi wa Roma
(Mat. 22:15-22; Mrk. 12:13-17)
19Olwa abeechesia bamalako nende abakhulundu babesaaliisi bamanyilisia mbu, oluchelo olwo lwali olwokhubafukula, bateema okhumutiila eshise shiene eshio, nebutswa baria abandu. 20Kho nibakhaaba shinga olwa banyala okhumureka. Nibamurumila abandu, abekhola okhuba abalunjishi, khulwa okhumunonelesia mu aka aboola. Kho bamuhambe, nibamuhaana khubobunyali nende aboburuchi bwomukafuna omuroma. 21Abanonelesi abo nibaboolela Yesu bari, “Omwechesia, khumanyile mbu akoboolanga nede okhwechesia nakahabwene. Khandi khumanyile mbu, shioyekhanga olubeka lulala ta, habula wechesinjia akokhwenya okhwa Nyasaye khu abandube mubwatoto. 22Kho khuboolelekhwo; nahabwene okhurunga obushuru khumuruchi owa Roma?”
23Nebutswa Yesu yalola obubatsa bwabwe mana nababoolela ari, 24“Manyiekhwo lipesa; obukondo buno nende eliira lilikhwo lino nebia wina?” Nibakalusia bari, “Nebia Omuruchi owa Eburoma.”
25Kho Yesu naboola ari, “Nikali kario ebindu biomuruchi owa Abaroma mumurunjenje; nabio ebia Nyasaye mumurunjenje Nyasaye.”
26Nabo nibakhaywa okhutiilakhwo likhuwa liosi mukhuboolakhwe okhwo mana nibaholeela butswa nibachenyanga khwikalusio lilie elo.
Lireebo khukokhulamukha okhurula mukhufwa
(Mat. 22:23-33; Mrk. 12:18-27)
27 #
Ebikh. 23:8
Mana abandi khuba Sadukayo, ababoolanga mbu abandu shibalilamukha okhurula mubafu ta, betsa khu Yesu nibamureeba bari, 28#Okhuk. 25:5“Omwechesia, Musa yakhuhandichila lilako mbu, ‘Omundu nafwa, ne nalekha omukhasi ne nalalekhakhwo omwana ta, omusiani wabwe okhuula akalusie omukhasi omulekhwa oyo, yebulile omusiani wabwe oyo abaana.’ 29Kho baliho abasiani musafu abomunzu ndala; omukhulundu yateshia omukhasi, ne nafwa nashili okhunyoolakhwo abaana. 30Mana owakhabili nakalusia omukhasi omulekhwa oyo, 31khandi owakhataru ario. Kekholekha kario khuboosi musafu, boosi bafwitsanga nibashili okhunyoolakhwo omwana nomukhasi oyo. 32Mukhumalilikha, omulekhwa oyo yesi nafwa. 33Bulano khunyanga eya abafu balibuukha nibalamukha okhurula mukhufwa, omukhasi oyo aliba owawina khumusafu abo? Shichila abasiani abo boosi bateshia omukhasi oyo.”
34Yesu nabakalusia ari, “Abasaatsa nende abakhasi bolwibulo luno bateshinjia nende okhuteshibwa, 35nebutswa abasaatsa nende abakhasi abanyoolekha nibakwanile okhulamusibwa okhurula mubafu mana bamenye mutsinyanga tsiolunyuma, shibaliteshia noho okhuteshibwa tawe. 36Bakhabe shinga abamalaika abalanyala okhufwa tawe. Nabo baliba abaana ba Nyasaye, shichila balamusibwe okhurula mukhufwa. 37#Okhur. 3:6Kata Musa akhumanyinjia habulafu mbu, abafu balilamusibwa. Mutsinyali tsieshitsakha shiakha omulilo, Musa yaboola khu Omwami ari, ‘Niye Nyasaye wa Aburahamu, khandi niye Nyasaye wa Isaka, khandi Nyasaye wa Yakobo.’ 38Kho niye Nyasaye owa abalimwoyo, shiali Nyasaye wabafu tawe; shichila khuye boosi balimwoyo.”
39Abandi khubechesia bamalako nibamukalusia bari, “Omwechesia oboolile obulayi!” 40Okhuba shibatsaalikha okhumureeba lireebo lindi liosi liosi khandi tawe.
Lireebo khu Kristo
(Mat. 22:41-46; Mrk. 12:35-37)
41Kho Yesu nabareeba ari, “Kho baboolanga barie mbu, Kristo aliba omwana wa Daudi? 42#Tsits. 110:1Okhuba Daudi omwene yaboola mushitabushie shietsitsabuli ari,
‘OMWAMI Nyasaye yaboolela Omwami wanje ari,
yikhala khumukhono kwanje omusaatsa,
43okhuula olwa era
abasukubo hasi wamakuluko babe shinga eshifumbishio.’
44Daudi omwene yamulanga ‘Omwami’, kho Kristo yakhaba arie Omwana wa Daudi?”
Yesu akhalachila abeechesia bamalako eshiina
(Mat. 23:1-36; Mrk. 12:38-40)
45Ne olwa abandu boosi bali nibamurechelesinjia, Yesu yaboolela abeechibe ari, 46“Mube meeso khubechesia bamalako abachamanga okhuchenda nibefwalile tsikanzu tsirambi, nende okhushiesibwa noluyali mubiiro; bachama okhwikhala khubifumbi bieimbeli mutsisinagogi nende okhwela habundu aholuyali mumasabo. 47Abasandinjia abakhasi abalekhwa nende okhubanuula ebindu, nibekaatia khulwa okhusaaya amasaayo amarambi! Abo balihelesibwa eshinyasio eshikhongo okhushila!”
Currently Selected:
LUKA 20: OLUPR
Highlight
Share
Copy
Want to have your highlights saved across all your devices? Sign up or sign in
