LUKA 19

Yesu nende Zakayo

1Yesu yenjila mwitookho lia Yeriko, ne yali nabirangamwo. 2Ne yalimwo omusaatsa undi owalangwa mbu Zakayo, owali omukhongo wabasololi bobushuru khandi omuyinda. 3Ne yateema okhulola mbu Yesu niye wina, nebutswa shiyanyalilwa ta, shichila yali omwimbichiti khandi omukanda kwali omukhongo. 4Kho yelukha tsimbilo natsia imbeli wabandu, naniina khumukhuyu kho mbu alole Yesu, owali niyetselanga khunjila eyo. 5Ne olwa Yesu yoola habundu yaho, yahenga ikulu, namuboolela ari, “Zakayo, yikha hasi bwangu okhuba ekhoyile okhwinjila munzumwo inyanga yino.”

6Mana Zakayo niyekha bwangu niyenjisia Yesu munzu, yamwinjisia nomwikhoyo omukhongo muno. 7Ne olwa abandu boosi balola bario beyiniakana nibaboola bari, “Omundu uno achenihe munzu yomundu omwonooni!”

8Mana Zakayo nasinjila, naboolela omwami ari, “Omwami, ndalakabila abatakha inusu yemiandu chianje, ne nimba nindanuulakhwo omundu eshindu shiosi shiosi ndalamukalusilia eshindu eshio akhandi khane.” 9Naye Yesu namuboolela ari, “Inyanga yino obuhonia bwitsile munzu muno, okhuba uno yesi nowolwibulo lwa Aburahamu. 10Omwana womundu yetsa okhukhaaba nende okhuhonia abo abakora injila.”

Oluchelo lwomukholi omusuubilwa nende oulali omusuubilwa ta

(Mat. 25:14-30)

11Ne olwa abandu bali nibarecheresinjia amakhuwa ako, Yesu yababoolela oluchelo lundi. Yali nali ahambi okhuula Yerusalemu, kho abandu nibapaara mbu obwami bwa Nyasaye buli ahambi okhuula. 12Kho nababoolela ari, “Omundu undi yatsia mushialo shiehale okhwemekhwa okhuba omuruchi, ne nibakhamwemekha achelele ingo. 13Ne nashili okhutsia yalanga abakholibe ekhumi nabahelesia buli shiamulala yimina#19:13 yimina: Kwali omurungo kwemiesi chitaru mutsinyanga etsio. ndala nababoolela ari, ‘Mukholele obukhala tsimina tsino okhuula olwa ndakhachelele.’ 14Ne abandu boluyialwe bali nibamusila, kho nibaruma abarumwa munyumawe, nibaboola bari, ‘Shikhwenya omundu uno abe omuruchi wefwe tawe.’

15“Ne olwa yachelela namalile okhwemekhwa okhuba omuruchi, yalaka mbu abakholi aba yali niyahelesia amapesa tsana abo balaangwe lwangu bamumanyie eshia bali nibanyoolile mubukhala bwabwe. 16Owambeli niyetsa naboola ari, ‘Omwami ndanyoolile inganga tsimina tsindi ekhumi okhurula khu eyawambelesia.’ 17Omwami namuboolela ari, ‘wakholile obulayi, oli omukholi omulayi! Shichila wabele omusuubilwa mumakhuwa amatiiti, ndalakhwemekha okhuba omuruchi khumatookho ekhumi.’ 18Owakhabili niyetsa naboola ari, ‘Omwami ndanyoolile inganga tsimina tsindi tsirano okhurula khu eyawambelesia.’ 19Omwami namuboolela ari, ‘Olaruka amatookho karano.’ 20Omukholi undi niyetsa naboola ari, ‘Omwami bukula iminayo njieyino, ndachiboha mushitambaya nechifisa. 21Ndakhuria, shichila oli omundu omululu. Iwe obukulanga ebilaali ebibio ta, khandi okhuchesanga ebia walaaraka tawe.’ 22Omwami namuboolela ari, ‘Iwe omukholi omumayanu! Ndalakhukhalachila eshiina okhulondana namakhuwako omwene! Wamanya mbu, isie endi omundu omululu, embukulanga ebilaali ebianje ta, khandi enjesanga ebia ndalaraaka tawe. 23Kho eshiachila nolayila amapesa kanje mwibishilo elibulana nishiina? Mana ndakhanyoolile inganga olwa enjelela!’ 24Mana naboolela abo abali nibasinjiileho ari, ‘Bukule imina yiyie eyo, muhelesie oyo ouli nende tsimina likhumi!’ 25Nabo nibamuboolela bari, ‘Omwami, lwakhali netsimina ekhumi!’ 26#Mat. 13:12; Mrk. 4:25; Luka 8:18Omwami nabakalusia ari, ‘Emuboolela mbu, buli mundu ouli nende ebindu alahelesibwa ebindi ebinji, naye oubula eshindu, kata shitiiti eshiali ninashio alanuulwa. 27#Mat. 25:14-30Ne bulano khumakhuwa akabasuku banje abo, abalachama mbu embe omuruchi wabwe ta, bareere hano, mubeere imbeli wanje.’ ”

Yesu yenjila mu Yerusalemu nomwikhoyo

(Mat. 21:1-11; Mrk. 11:1-11; Yoh. 12:12-19)

28Olwa Yesu yali namalile okhuboola amakhuwa ako, yatsia nabaranjilila okhwinjila Yerusalemu. 29Ne olwa yoola ahambi nende Betsifage nende Betsania, nali hashikulu eshia Miseituni, yaruma abeechibe babili baranjilile okhutsia imbeli nababoolela ari, 30“Tsie mwitaala lili imbeli wenywe, ne olwa mulaba nimushinjilangamwo, mulanyoola eshimoosi shiesishili nishiboyilwe, shiomundu yesi yesi ashili okhuninakhwo tawe. Mushibolole mwitse ninashio hano. 31Ne omundu yesi naba namureeba ari, ‘Mushibololanga mbushiina?’ Kho mumuboolele muri, ‘Omwami ashienya.’ ”

32Nabo abarume abo nibatsia, nibanyoola nikali butswa shinga olwa Yesu yali nababooleele. 33Ne olwa bali nibabololanga eshimoosi eshio, abeeneshio nibareeba bari, “Mushibololanga mbushiina?”

34Nabo nibakalusia bari, “Omwami ashienya.” 35Mana nibashireerera Yesu. Kho nibara ebifwalo biabwe khushimoosi eshio, ne nibaniiniakhwo Yesu. 36Ne olwa yali natsitsanga, baala ebifwalo biabwe khunjila.

37Ne olwa yali nali ahambi okhuula Yerusalemu, nali khushikholomokho shieshikulu shia Miseituni, abechibe abanji bachaaka okhwikhoya, ne nibetsoomia Nyasaye nomwoyo omukhongo khulwa ebikhole biamakana ebia bali nibaluutsi, nibaboola bari, 38#Tsits. 118:26“Noweikhabi omuruchi owitsa muliira elia Omwami! Omulembe mwikulu nalwo oluyali khu Nyasaye!” .

39Mana abandi khu Abafarisayo abali mumukanda okwo nibaboolela Yesu bari, “Omwechesia, laka abeechibo baholeele tsi!”

40Naye Yesu nabakalusia ari, “Emuboolela mbu, bano nibaholeela, amachina akeene kalachaaka okhwayula.”

Yesu arumbula okhusasibwa khwa Yerusalemu

41Olwa Yesu yatsia ahambi nelitookho, ne nalilola, yalila amasika, 42naboola ari, “Niwakhamanyile inyanga yino amakhuwa kakwanile okhureera omulembe! Nebutswa bulano shionyala okhukalola tawe! 43Okhuba tsinyanga tsitsanga tsiabasukubo bakhakhubotokhane nibakhwikalila tsimbeka tsiosi nende lisisi. 44Balikhusasia iwe halala nende abandu abaliba mwisisi omwo; shibalilekhakhwo mwiwe lichina kata elala ta; shichila shiwamanyilisia indukho eya Nyasaye eyokhukhununula tawe!”

Yesu yenjila muhekalu

(Mat. 21:12-17; Mrk. 11:15-19; Yoh. 2:13-22)

45Mana Yesu niyenjila muhekalu nachaaka okhurusia abali nibakulasilinjiamwo ebindu, 46#Isa. 56:7; Yer. 7:11nababoolela ari, “Kahandikwa mumahandiko mbu, Nyasaye yaboola mbu, ‘Ihekalu yanje yakhalangwe mbu inzu yamasaayo.’ Nebutswa inywe muchikholile okhuba imbinga yabanuuli.”

47 # Luka 21:37 Buli inyanga Yesu yechesinjia muhekalu. Ne abakhulundu babesaaliisi nende abeechesia bamalako nende abemilisi babandu bakhaaba shinga olwa bakhamwira, 48nebutswa shibanyoola shinga olwa bakhamwiira ta, shichila abandu boosi bali nibarecheresinjia okhwechesiakhwe, nibalenya okhuchweya okhuhulila likhuwa kata elala tawe.

Currently Selected:

LUKA 19: OLUPR

Highlight

Copy