LUKA 16
16
Oluchelo lwomusinjilili wemiandu omuchesichesi
1Yesu yaboolela abeechibe ari, “Yaliho omundu undi omuyinda, owali nomusinjilili wemianduchie. Omuyinda oyo naboolela omusinjililiwe oyo mbu, omusinjililiwe oyo asasinjia butswa emianduchie. 2Kho namulanga namureeba ari, ‘Nimakhuwa shiina akembulilanga khwiwe kano? Obasie buli shindu shinga lwosinjililanga emiandu chianje shichila shiolatsiililila okhuba omusinjilili wachio khandi tawe.’ 3Mana omusinjilili oyo nakanakania mumwoyokwe ari, ‘Omwami wanje atsia okhundeshesia emilimo. Nekhole shiina? Shiendi namaani akokhulima ta, khandi ndalafimbwa omurwe okhusaba. 4Bulano emanyile eshia enzia okhukhola, kho mbu olwa emilimo chianje chiobusinjilili chiba nichihwele, ndalaba nende abetsa abokhunzinjisia mutsinzu tsiabwe.’
5“Kho nalanga abandu abali namakofi akomwamiwe, mulala shia mulala, nareeba owambeli ari, ‘Likofi elia omwami wanje akhubanzanga lihela lirie?’ 6Naye nakalusia ari, ‘Amatepe eshikhumi shilala akamafura kemiseituni.’ Omusinjilili oyo namuboolela ari, ‘Bukula ibarwayo yelikofi, ohandiche bwangu ori, amatepe amakhumi karano.’ 7Khandi nareeba oundi ari, ‘Nawe oli nelikofi lihela shiina?’ Naye namukalusia ari, ‘Amatepe eshikhumi shilala akeingano.’ Omusinjilili oyo namuboolela ari, ‘Bukula ibarwayo yelikofi, ohandiche amatepe amakhumi munane.’
8“Omwami niyetsoomia omusinjilili omushiamu oyo, khulwa obuchesichesibwe, okhuba abandu bomushialo muno nabachesichesi muno mukhukhola amakhuwa kabwe okhushila abandu abobulafu.”
9 #
Tob. 4:9-11
Mana Yesu natsiililila okhuboola ari, “Emuboolela mbu, mwikhonyele obuyinda bweshialo okhwinyoolela abetsa kho mbu olwa buliba nibuhwele mulinjisibwa mubulamu bweinziayo. 10Omundu yesi yesi omwisiikwa mubindu ebitiiti, alaba omwisiikwa mubikhongo, ne yesi yesi ouli omushiamu mubindu ebitiiti alaba omushiamu mubindu ebikhongo. 11Kho, nimulaba abesiikwa mubuyinda bwomushialo shino ta, mwakhaba murie abesiikwa mubuyinda bwatoto? 12Ne nimuba nimulaabeele abesiikwa khubindu biomundu undi, kho oulamuhelesia ebienywe biene niwiina?
13 #
Mat. 6:24
“Abulaho omukhalabani ounyala okhukhalabanila abami babili tawe, okhuba alasila mulala ne naheela oundi, noho alaba omuhulili khumulala ne nalechelesia oundi. Shionyala okhukhalabanila Nyasaye khandi okhalabanile emiandu tawe.”
Tsinjelo tsindi tsia Yesu
(Mat. 5:31-32; 11:12-13; Mrk. 10:11-12)
14Olwa Abafarisayo bahulila ako koosi, batseshelela Yesu, shichila bali nibaheela amapesa muno. 15Yesu nababoolela ari, “Inywe mwikholanga abalunjishi mumoni tsiabandu, nebutswa Nyasaye amanyile emioyo chienywe. Okhuba ebihelesibwa oluyali mubandu nebikhaya mumoni tsia Nyasaye.
16 #
Mat. 11:12,13 “Amalako aka Musa nende akabalakusi bahandika kaliho okhuula mutsinyanga tsia Yohana Omubatiisi; okhurula olwene olwo, Amakhuwa Amalayi aka Obwami bwa Nyasaye kayaalungwa, ne buli mundu ateemanga okhwinjila mubwami obwo namaani.
17 #
Mat. 5:18
“Ne nobwangu likulu nende eshialo okhurulaho okhushila akhanyukuta khalala khamalako okhuyinibwaho.
18 #
Mat. 5:32; 1 Abakor. 7:10,11 “Omusaatsa yesi yesi oulekhana nomukhasiwe nateshia omukhasi undi aba naheyanga. Naye omusaatsa outeshia omukhasi owalekhana nomusaatsawe aba naheyanga.
Oluchelo lwomuyinda nende Lazaro
19“Yaliho omusaatsa undi omuyinda owefwalanga tsingubo tsiobukusi muno khandi niyamenya obulamu bwokhwisangasia buli nyanga. 20Ne omusaatsa undi omutakha yaliho oweliira mbu, Lazaro, owali namakonzo khumubilikwe kwosi, owareerungwa niyalisibwa hamuliango homuyinda oyo, 21kho mbu aliekhwo khu ebiabungulukhanga okhurula khumeesa yomuyinda oyo. Tsimbwa tsietsanga nitsikhomba amakonzoke. 22Omutakha oyo yafwa, ne omwoyokwe nikuchiingwa nende abamalaika nikuyilwa okhuba nende Aburahamu mwikulu. Omuyinda oyo yesi yafwa, ne nayabilwa. 23Ne nali emakombe nanyasibungwa muno, yahenga ikulu ne nalola Aburahamu nende Lazaro nibali halala ehale. 24Omuyinda oyo nalanjilisia ari, ‘Papa Aburahamu, umbeele tsimbabasi, mana orume Lazaro okhwina obutsunzu bwolwalalwe mumaatsi anyisiekhwo butswa olulimi lwanje, shichila esalilanga muno mumulilo kuno!’
25“Naye Aburahamu nakalusia ari, ‘Witsulile mwana wanje mbu, iwe mutsinyanga tsiobulamubwo wanyoolanga amalayiko, naye Lazaro yanyoola amabi koosi. Ne bulano yekhoyanga hano nawe otsunungwa. 26Okhumeeta khwako, hakari wefwe ninawe liliho libanda eliarebwaho mbu abenya okhwambukha okhurula hano okhwitsa ewamuli bakhaywe, khandi mbu, omundu yesi yesi shialambukhakhwo okhurula ewa muli okhwitsa ewa khuli yino tawe.’ 27Omuyinda oyo namuboolela ari, ‘Ekhusaaya papa Aburahamu mbu, orume Lazaro ingo wefwe 28okhuba endi nende abaana befwe barano, kho mbu, atsie abachetsiyie baleshe okhwitsa habundu hobutsunwi hano tawe.’
29“Aburahamu namukalusia ari, ‘Abaana benywe bali nende Amahandiko aka Musa nende abalakusi abokhubachetsiyia, bakhoyile okhuhulila aka Amahandiko ako kaboolanga.’ 30Naye omuyinda oyo naboola ari, ‘Papa Aburahamu, ako konyene shikahelile tawe! Nebutswa omundu niyakhabuukha okhurula mubafu nabatsiila, balekalukhasia.’ 31Nebutswa Aburahamu namuboolela ari, ‘Nibaba nibalahulilanga aka Amahandiko aka Musa nende abalakusi ta, kho kata omundu naba nalamukha okhurula mubafu shibalasuubila tawe.’ ”
Currently Selected:
LUKA 16: OLUPR
Highlight
Share
Copy
Want to have your highlights saved across all your devices? Sign up or sign in
