LUKA 15
15
Oluchelo lwelikondi eliakora
(Mat. 18:12-14)
1 #
Luka 5:29,30 Inyanga yindi, abasololi bobushuru nende abonooni abanji betsa okhurecheresia Yesu niyechesia. 2Mana Abafarisayo nende abeechesia ba Malako nibachaaka okhubuuluula nibaboola bari, “Omundu uno yenjisinjia abonooni nende okhulia ninabo.”
3Kho Yesu nababoolela oluchelo luno ari; 4“Nimundu shiina khwinywe owakhaba namakondi eshikhumi shilala, ne elala khuko nilikora, ne nalalekha amakhumi shienda na shienda ako mushitsiimi, watsia okhukhaaba eliba nilikorire okhuula olwa alinyoola? 5Ne olwa aba nalinyoolile alichinga khumabeka nasangalile. 6Mana olwa yola inango, alaanga abetsabe nende abamenyanibe halala nababoolela ari, ‘Mwikhoye ninasi, okhuba enyoolile likondi lianje elibele nilikorire!’ 7Emuboolela mbu, nolwa khulibaho okhwikhoya mwikulu khulwa omwonooni mulala owikalukhasia, okhushila abandu amakhumi shienda na shienda abapaara mbu bo nabalunjishi kho shibakhoyile okhwikalukhasia ta.” .
Oluchelo lweling'ondo eliakora
8“Kata nimukhasi shiina ouba nali nende amang'ondo ekhumi, ne nakosia elala khuko, oulahafia itaha mana yeeye munzu nakhaaba obulayi okhuula olwa anyoola ling'ondo elo? 9Niyakhalinyoola alalanga abetsabe nende abamenyanibe halala, nababoolela ari, ‘Mwikhoye ninasi, okhuba enyoolile ling'ondo liembeele nengosiye!’ 10Emuboolela mbu, nolwa abamalaika ba Nyasaye balekhoya muno bario khulwa omwonooni mulala owikalukhasia.”
Oluchelo lwomusiani owakora
11Yesu natsiililila okhuboola ari, “Yaliho omundu owali nende abaanabe abasiani babili. 12Omushe naboolela samwana ari, ‘Papa, wumbelesie omukabo kwanje kwokhumianduchio bulano.’ Mana samwana nakabula emianduchie khu basianibe babili. 13Olunyuma lwetsinyanga tsindiiti omusiani omushe oyo, nakusia emianduchie chiosi mana narula hango nende amapesa ako, natsia mushibala eshiehale nasasia amapesake khulwa okhwilaasia ebweneyo. 14Ne olwa yali nahwelelwe buli shindu, inzala yikhongo yamala niyibaho mushialo eshio, mana nachaaka okhutamba, inzala niyimuluma. 15Kho yatsia okhukholela omundu undi weshialo eshio emilimo, naye namuruma mubwayilobwe okhwaya tsimbitsi. 16Kho yekomba okhulia khubiokhulia bietsimbitsi etsio tsialitsanga, okhuba omundu yesi yesi shiyamuhelesiakhwo eshiokhulia tawe. 17Ne mukhumalilikha olwa yalaba tsimoni yaboola ari, ‘Abakholi bapapa boosi bali nende ebiokhulia biabalitsanga nibekura khandi balekha ebindi, nasi inzala niyinzirira hano.’ 18Ndalarula enzie khu papa wanje emuboolele endi, ‘Papa, ndonoonela Nyasaye khandi nekhwonoonela iwe. 19Kata shiekhoyile okhulangwa omwanawo khandi ta; wumbukule butswa shinga mulala khubakholibo.’ 20Kho narula okhukalukha khu samwana. Ne olwa yali nashili ehale, samwana yamulola, namulolela tsimbabasi, natsia tsimbilo, namufumbelela namutsunzuuna. 21Omusiani oyo namuboolela ari, ‘Papa, ndonoonela Nyasaye khandi nikhwonoonela iwe, shiekhoyile kata okhulangwa omwanawo khandi tawe.’#15:21 Abandi bameeta mbu, wumbukule shinga mulala khubakholibo. 22Nebutswa samwana yaboolela abakholibe ari, ‘Reere bwangu ikanzu indayi mumufwale, khandi mumufwale ingaka khulwalalwe nende ebilaaro. 23Mana mureere eshimoosi shianera musinze, khulie nikhwikhoya. 24Okhuba omwana wanje uno yali nafwile, ne bulano ulamuushe, yali niyakora ne bulano wunyooleshe.’ Mana nibachaaka okhwikhoya.
25“Ne omusianiwe omukhulundu yali nali mumukunda. Ne olwa yali nachelelanga nali ahambi nende inzuye, yahulila abandu nibemba tsinyimbo nibekhoya. 26Kho nalanga mulala khubakholi namureeba ari, ‘Nishiina eshitsiilililanga hano?’ 27Omukholi oyo namukalusia ari, ‘Omusiani wenywe acheleele ingo, kho papawo asinzile eshimoosi shianera, shichila mbu acheleele mumulembe khandi nali mwoyo.’ 28Omusiani wabwe omukhulundu nasinyikha naloba okhwinjila munzu. Samwana niyetsa namusaaya yenjilemwo. 29Nebutswa yakalusia samwana ari, ‘Lola emiyika chino chiosi, ndakhukhalabaniile shinga omukhalabani, ne eshili okhufukulakhwo amalakoko tawe. Nishiina eshia wambelesiakhwo? Shiwayambelesia kata eshimeme shieimbusi mbu ndikhoye nende abetsa banje tawe! 30Nebutswa lwomwanawo, owasasia emianduchio nende abatamba uno acheleele, omwiriile eshimoosi shianera!’ 31Samwana namukalusia naboola ari, ‘Mwana wanje, iwe obetsanga ninasi hano buli lwosi, ne biosi ebiendi ninabio nebibio. 32Nebutswa khukhoyile okhwikhoya nende okhusaangaala, shichila omusiani wenywe uno ali shinga owali niyafwa, ne bulano alamuushe, yali niyakora ne bulano anyooleeshe.’ ”
Currently Selected:
LUKA 15: OLUPR
Highlight
Share
Copy
Want to have your highlights saved across all your devices? Sign up or sign in
