LUKA 14

Yesu ahonia omulwale khunyanga eya Isabato

1Khunyanga yindi eya Isabato, Yesu yenjila munzu yomukhulundu owa Abafarisayo okhulia ebiokhulia, ne abandu baliho bamuhenjelesia muno. 2Ne omundu yaliho owali niyafimba ebilenje nende amakhono. 3Yesu nareeba abechesia bamalako nende Abafarisayo ari, “Kali habwene mumalako okhuhonia khunyanya eya Isabato noho tawe?” 4Nebutswa baholela butswa tsi. Yesu natiila khumundu oyo, namuhonia ne namuseebula. 5#Mat. 12:11Mana Yesu nababoolela ari, “Niwiina khwinywe owakhaba nende Omwanawe#14:5 nende Omwanawe: Amahandiko kakhale kahandika “Isishili” mushilenje shiomwana. noho iheyiye niyikwile mwiyabo liamatsi khunyanga eya Isabato, owakhalekha okhuchikhwesa wachirusiamwo habwene nahabwene khunyanga eyo?” 6Nebutswa shibamukalusia eshindu khumakhuwa ako ta.

Okhwitutuyia nende okhwinjisia abandu

7Yesu yalola shinga balala khubacheni bali nibeyahulilanga obwikhalo obukhulundu, kho nababoolela oluchelo luno ari, 8#Tsinj. 25:6,7“Omundu yesi nakhulanga mwisabo lieshiselelo, olekhala mubwikhalo obukhulundu tawe. Haundi oundi oukhushila iwe muluyali yakhaba yesi nalanjilwe, 9ne oumulaanjile mwesi oyo, yetsa khwiwe nakhuboolela ari, ‘helesia uno obwikhalo buno.’ Mana olafimbwa omurwe lwokalusibwa mubwikhalo obwa hasi. 10Habula nolanjilwe mubucheni, tsia wikhale mubwikhalo bwa hasi, kho mbu oukhulanjile oyo olwa yetsa, anyala okhukhuboolela ari, ‘Omwitsa wanje, yikhalakhwo hekulu hano,’ ne orio olaba noluyali imbeli wabacheni boosi aba oba niwikhale ninabo. 11#Mat. 23:12; Luka 18:14Okhuba omundu yesi owichinguula omwene, alatutuyibwa. Ne yesi owitutuyia omwene alachinguulwa.”

12Mana Yesu khandi naboolela owali namulanjile ari, “Olwa okaasia lisabo, libe liomushiteere hakari noho liomungolobe, olalanga abetsabo, kata abaana benywe, kata abekhobo kata abamenyanibo abayinda ta, shichila haundi boosi bakhakhulanga olundi, kho mana onyoole omurungo khukawabakholela. 13Nebutswa lwokaasia lisabo, olanje abamanani, abalema, abetsindieku nende ababofu; 14nawe olanyoola ikhabi, shichila bo shibanyala okhukhurunga shiosi ta. Nyasaye alikhurunga iwe khunyanga yabandu abalunjishi balilamusibwa okhurula mubafu.”

Oluchelo olwa Lisabo Likhongo

(Mat. 22:1-10)

15Olwa mulala khu abali nibaliitsanga ninaye khumeesa yahulilakhwo amakhuwa ako, yaboolela Yesu ari, “Noweikhabi oulilia ebiokhulia mubwami bwa Nyasaye!” 16Naye naboolela omundu oyo ari, “Yaliho omundu owakaasia lisabo likhongo, mana nalanga abandu abanji. 17Olwa eshise shielisabo shiola, yaruma omukholiwe okhuboolela abandu abali nibalanjilwe ari, ‘Mwitse, okhuba buli shindu shiirechekhwe!’ 18Nebutswa buli mulala khubo yachaaka okhuhaana eshifune eshichila aleshe okhwitsa mwisabo elo. Owambeli naboolela omukholi oyo ari, ‘Ndakulile omukunda, ne okhuula enzie ekulambuule, ekhusaaya nochama ofuchilile endeshe okhuba mushiselelo.’ 19Ne oundi naboola ari, ‘Ndakulile tsing'ombe tsiokhulima khumachoki karano, kho enzitsanga okhutsiteema, ekhusaaya nochama ofuchilile endeshe okhuba mushiselelo.’ 20Naye oundi naboola ari, ‘Ndateshiye omukhasi, khulweshio shinyala okhwitsa tawe.’ 21Kho omukholi oyo nakalukha naboolela omwamiwe amakhuwa ako koosi. Mana omwami oyo nasinyikha muno naboolela omukholiwe ari, ‘Rula bwangu otsie khumihanda nende khutsinjila tsiomwitookho, oreere hano abamanani, abalema, ababofu nende abetsindieku.’ 22Omukholi oyo namuboolela ari, ‘Omwami akolachilisiye koosi kamalile okhukholwa, ne obwiyangu bushiliho!’ 23Kho Omwami naboolela omukholi oyo ari, ‘Rula otsie khandi khumihanda emikhongo nende khutsinjila tsinyelele, onichilisie abandu betse benjile, inzu yanje yitsule. 24Okhuba emuboolela mwesi mbu, abulaho khubalangwa abo oulaliakhwo lisabo lianje tawe!’ ”

Akenyekha khulwa okhuba omwechi wa Yesu

(Mat. 10:37-38)

25Bulano emikanda emikhongo chiabandu chiali nichilondananga nende Yesu, naye nashukhana, nababoolela ari, 26#Mat. 10:37“Omundu yesi naba niyetsa khwisie, shianyala okhuba omwechi wanje, naba nalaheela isie okhushila shinga olwa yaheela samwana nende nyinamwana tawe Khandi okhushila shinga olwa yaheela omukhasiwe nende abaanabe, abaana babwe abasiani nende abakhaana kata okhushila shinga olwa yeheela ye omwene tawe. 27#Mat. 10:38; 16:24; Mrk. 8:34; Luka 9:23Ouletuukha omusalabakwe omwene niyanondakhwo ta, shianyala okhuba omwechi wanje tawe. 28Kho niwiina khwinywe niyakhenya okhumbakha omunaara, oularanjilila okhwikhala nabala obukusi bwokhumbakha omunaara okwo, okhulola naba nali namapesa akahela okhumala omulimo okwo noho ta? 29Nalakhola ario ta, haundi anyala okhumbakha omuse ne nakhaywa okhumala omunaara okwo, mana boosi abamulola balamutseshelela nibaboola bari, 30‘Omundu uno yachaaka okhumbakha ne bulano shianyala okhumala omulimo tsana ta!’ 31Kata nomuruchi shiina owakharula nabandu ebikhumila ekhumi (10,000) okhulwana nende omuruchi undi owitsa okhumuseera nali nabandu ebikhumila amakhumi kabili (20,000). Okhuula aranjilile okhwikhala ayililisie naba nanyala okhulwana nende owitsa okhumuseera oyo noho ta. 32Nalanyala ta, alaruma oburume nareebanga omuruchi washie oyo nashili ehale mbu, bakasie omulembe.” 33Kho Yesu namalila naboola ari, “Kho kali kario, mbu abulaho khwinywe ounyala okhuba omwechi wanje nalalekha ebindu biosi ebia ali ninabio tawe.

Omunyu okwatsinziba

(Mat. 5:13; Mrk. 9:50)

34“Omunyu nomulayi, nebutswa nikuba nikutsinziba, shionyala okhukukalusilia eshinosi shiakwo tawe. 35Shikukasila kata liloba noho imbolela tawe, abandu bakusukunanga elwanyi. Kho oyo ouli namarwi kokhuhulila lekha aulile!”

Currently Selected:

LUKA 14: OLUPR

Highlight

Copy