YOHANA 6

Yesu aliisia abandu ebikhumila birano

(Mat. 14:13-21; Mrk. 6:30-44; Luka 9:10-17)

1Olunyuma olwa amakhuwa ako, Yesu yambukha inyanza eya Galilaya, eyilangungwa khandi mbu ya Tiberia. 2Omukanda omukhongo kwabandu nikumulondakhwo, shichila bali nibaluutsi ebilolelo ebiamakana ebiokhuhonia abalwale. 3Mana Yesu natikulukha mushikulu niyekhalayo halala nabeechibe. 4Lisabo lia Pasaka elia Abayahudi liali nilili ahambi okhuula. 5Mana Yesu nachinguula tsimonitsie ne nalola omukanda omukhongo nikumwitsilanga, kho nareeba Filipo ari, “Nihena aha khwakhakula ebiokhulia ebihela abandu bano boosi?” 6Ne yaboola kano khulwa okhuteema Filipo. Okhuba yali omwene namanyile eshia atsia okhukhola.

7Filipo nakalusia ari, “Kata tsidinari#6:7 idinari: Kwali omurungo okwomukholi okweinyanga ndala. ebikhumi bili shitsiakhahela okhukula emikaate echia buli mulala yakhanyoolakhwo akhatonye khatiti butswa tawe.”

8Ne Andereya omusiani wabwe Simoni Petero, owali mulala wokhubechibe naboolela Yesu ari, 9“Ali hano omuraka ouli nende emikaate chirano chieishayiri nende tsinyeni tsibili. Kata kario, bino shibiakhaela abandu bano boosi tawe.”

10Yesu nababoolela ari, “Boolele abandu bekhale hasi.” Ne obunyasi bwali habundu yaho obunji. Kho abandu boosi nibekhala hasi, boosi bali ahambi ebikhumila biraano (15,000). 11Mana Yesu nabukula emikaate echio, nakhupila Nyasaye orio, nabakabila abali nibekhale. Nakhola ario khandi netsinyeni etsio, mana boosi nibalia shinga olwa benya. 12Ne olwa boosi bali nibekure, yaboolela abeechibe ari, “Mukhung'asie ebitonye bitonyile biosi, kho mbu khuleshe okhusasiakhwo eshindu shiosi shiosi tawe.” 13Kho nibakhuung'asia biosi, mana nibetsusia ebimwelo ekhumi nabibili.

14Ne olwa abandu balola eshilolelo eshiamakana eshia Yesu yali nakholile, baboola bari, “Toto mwene, uno nomulakusi owali niyasuubisia okhwitsa mushialo.” 15Mana Yesu namanya mbu benyanga okhumutiila namani mbu bamwemeshe okhuba omuruchi wabwe, kho narulaho natikulukha mushikulu yenyene.

Yesu achenda khumaatsi

(Mat. 14:22-33; Mrk. 6:45-52)

16Ne olwa eshialo bweela, abeechi ba Yesu bakholomokha nibatsia khunyanza. 17Nibenjila muliaro nibachaaka okhwambukha inyanza nibakalukha Kaperinaumu. Eshialo nishilima Yesu nashili okhwitsa ewa bali. 18Mana imbumbuyeka ikhongo niyichaka okhuhutsa, niyikhola inyanza okhwirunda. 19Ne olwa abeechi bali nibafuchile eliaro oluchendo oluhela tsimailo tsitaru noho tsine, balola Yesu nachendanga khumaatsi, niyetsa ahambi nende eliaro, nibaria muno. 20Yesu nababoolela ari, “Nisie, mularia tawe!” 21Mana nibatsaatsahala nibamwinjisia muliaro, ne niboola khuluchinga ewa bali nibatsitsanga bwangu.

Abandu bakhaaba Yesu

22Khunyanga yalondakhwo abandu bali nibasikaale injelekha undi weinyanza balola eliaro nilisikaleho elala lionyene. Ne nibamanya mbu, Yesu shiyali natsiile nabeechibe tawe, nibapaara mbu abeechi batsiile bonyene. 23Amaaro kandi ketsa okhurula Tiberia, niketsa khulukuku ahambi nende habundu aha Yesu yali nasaayile emikaate nahelesia abandu nibalia. 24Kho olwa abomukanda balola mbu Yesu shiyali naliho ta, kata abeechibe boosi khandi shibali nibaliho ta, benjila mumaaro ako nibatsia Kaperinaumu, okhukhaaba Yesu.

Yesu niye omukaate kwobulamu

25Ne olwa abandu banyoola Yesu nali injelekha weinyanza, bamureeba bari, “Omwechesia wetsile hano liina?”

26Naye Yesu nabakalusia ari, “Emuboolela toto mbu, muukhabanga shichila mwalile emikaate nimwikura; shimuukhabanga shichila mumanyile eshisina shiebikhole bianje biamakana tawe. 27#Sira 24:19-22Shimulakhalabana khulwa okhunyoola ebiokhulia ebisikhanga tawe, habula mukhalabane khulwa ebiokhulia ebibetsangaho okhuula inziayo. Bino nibio ebiokhulia ebia Omwana womundu alamuhelesia, shichila niye owa Nyasaye ouli Samwana yarakhwo eshibalikho eshiokhumufuchilila.”

28Kho nibamureeba bari, “Nefu khwakhakhola shiina kho khukhole aka Nyasaye yenyanga mbu khukhole?”

29Yesu nabakalusia ari, “Aka Nyasaye yenyanga mbu mukhole, nokhusuubila mu oyo owa yaruma.”

30Nabo nibamureeba bari, “Neshilolelo shiina eshiamakana, shionyala okhukhola mbu khulole mana khukhusuubile iwe? Nishikhole shiina eshia wakhakhola? 31#Okhur. 16:4,15; Tsits. 78:24; Obuch. 16:20,21Abakuuka befwe balia imana mushitsiimi, shinga olwa kahandikwa mbu, ‘Yabahelesia emikaate okhurula mwikulu mbu balie.’ ”

32Mana Yesu nababoolela ari, “Emuboolela toto mbu, emikaate echia Musa yamuhelesia shichiali emikaate okhurula mwikulu ta, habula Papa wanje niye oumuhelesinjia inywe omukaate kwatoto okhurula mwikulu. 33Okhuba omukaate kwa Nyasaye ahaana niye oyo owekha hasi okhurula mwikulu ouhelesia abomushialo obulamu.”

34Kho nibamuboolela bari, “Omwami okhuhelesinjie omukaate okwo buli lwosi.”

35Yesu nababoolela ari, “Nisie omukaate okwobulamu. Yesi owitsa khwisie shialalumwakhwo inzala tawe; naye ousuubila mwisie shialalibwakhwo nobuloho tawe. 36Nebutwa, ndamuboolela mbu mwandola ne shimwasuubilila tawe. 37Omundu yesi owa Papa yambelesia aletsa khwisie. Ne yesi yesi owitsa khwisie, shindalamwikana kata nahatuutu ta, 38shichila shindayetsa okhurula mwikulu mbu ekhole akokhwenya khwanje ta, habula akokhwenya okhwa oyo owaruma. 39Ne oyo owaruma yenyanga mbu, ndalakosiakhwo kata mulala khwabo boosi aba yambelesiiye tawe, habula ebalamusie boosi khunyanga eyobumalilishi. 40Okhuba okhwenya khwa Papa wanje khuli mbu boosi abalola Omwana nibasuubila muye banyoole obulamu obulahwaho ta. Khandi mbu ndakhabalamusie khunyanga eyobumalilishi.”

41Mana Abayahudi nibachaaka okhubuluula abeene khu beene shichila yali naboolile mbu, “Nisie omukaate okwekha okhurula mwikulu.” 42Kho nibaboola bari, “Omundu uno shiali niye Yesu omwana wa Yosefu? Khumanyile samwana nende nyinamwana. Kho aboolanga arie bulano mbu, yekha okhurula mwikulu?”

43Yesu nakalusia ari, “Leshe okhubuluula abeene khubeene. 44Abulaho omundu ounyala okhwitsa khwisie nalakhwesilwe nende Papa owaruma ta; ne nasi ndilimulamusia khunyanga yobumalilishi. 45#Isa. 54:13Abalakusi bahandika mbu, ‘Buli mundu aliechesibwa nende Nyasaye.’ Kho oyo yesi ouhulilanga aka Papa nende okhweka okhurula khuye, yetsa khwisie. 46Ne shikali mbu buli mundu yamulola Papa ta; habula oyo owarula ewa Nyasaye, niye yenyene owalola Papa. 47Emuboolela toto mbu, omundu yesi ousuubila ali nobulamu obulahwaho ta. 48Isie nisie omukaate okuhaananga obulamu. 49Abakuuka benywe balia imana mushitsiimi, nebutswa bafwa. 50Kuno nikwo omukaate okwekha okhurula mwikulu, ne omundu yesi yesi ouliakhwo shianyala okhufwa ta. 51Isie nisie omukaate okwobulamu okwekha okhurula mwikulu. Omundu yesi yesi ouliakhwo omukaate kuno, alamenya inziayo. Omukate kwemuhelesia nomubili kwanje, kwehaana kho mbu abomushialo babe abalamu.”

52Kho Abayahudi nibayingana abeene khubeene nibareebana bari, “Omundu uno yakhakhuhelesia arie omubilikwe mbu khulie?” 53Mana Yesu nababoolela ari, “Emuboolela toto mbu, nimuba nimulalia khumubili okwa Omwana womundu nende okhunywa khumabangake ta, shimulikhwo nobulamu mwinywe tawe. 54Oyo Oulitsanga omubili kwanje khandi nanywa amabanga kanje ali nende obulamu obulahwaho ta; nasi ndilimulamusia khunyanga eyobumalilishi. 55Okhuba omubili kwanje nikwo eshiokhulia shiatoto, nako amabanga kanje niko eshiokhunywa shiatoto. 56Oyo oulia omubili kwanje khandi nanywa amabanga kanje nomulamu mwisie, nasi endi omulamu muye. 57Shinga Papa ouliho mwoyo yaruma isie, kho khululwe siesi khandi endi omulamu. Kho yesi ysei ouliakhwo omubili kwanje alaba omulamu khulwanje. 58Kuno nikwo omukaate okwekha okhurula mwikulu. Shikuli shinga omukaate okwabakuuka benywe balia mana olunyuma nibafwa ta. Oyo oulia khumukate kuno alabetsangaho omulamu inziayo.”

59Yesu yaboola amakhuwa kano olwa yali niyechesinjia musinagogi Kaperinaumu.

Amakhuwa akareeranga obulamu bweinziayo

60Abanji khubeechibe bahulila amakhuwa kano nibaboola bari, “Lino neliechesio litinyu. Niwiina ounyala okhulihulila?”

61Yesu kata nashili okhuboolelwa mbu abeechibe bali nibabuluulanga khulwa amakhuwa ako, yabareeba ari, “Amakhuwa kano kamusinyisiye noho? 62Ne kakhaba karie nimuba nimulola Omwana womundu nakulukha nakalukha ewa yalinji olwambeli? 63#Obuch. 9:13-18Roho wa Nyasaye niye ouhaananga obulamu; omundu namundu shianyala okhukhola ario tawe. Amakhuwa akemuboolele niko Roho wa Nyasaye khandi niko obulamu. 64Nebutswa balala mwinywe shibasuubilanga tawe.” Okhuba Yesu yamanya okhurula khukhuchaaka abo abalasuubila ta, nende oyo owitsa okhumukhoba. 65Mana naboola ari, “Shino nishio eshifune eshichilile nimuboolela mbu, abulaho ounyala okhwitsa khwisie nalanyalilwe nende Papa.”

66Khulwa amakhuwa kano, abanji abokhubalondibe bakalukha inyuma nibalamulondakhwo khandi tawe. 67Kho Yesu nareeba abeechibe ekhumi na babili abo ari, “Nenyu mwesi mwikomba okhundekha noho?”

68 # Mat. 16:16; Mrk. 8:29; Luka 9:20 Naye Simoni Petero namukalusia ari, “Omwami, khwakhatsia khuwina? Iwe niwe ouli nende amakhuwa akobulamu bweinziayo. 69Ne bulano nefu khusuubile khandi khumanyile mbu iwe niwe Omutakatifu owarula khu Nyasaye.”

70Yesu nakalusia ari, “Shindamwahula inywe ekhumi nababili noho? Nebutswa mulala khwinywe neshishieno!” 71Ne yali naboolanga khu Yuda omwana wa Simoni Isikarioti. Okhuba Yuda, kata niyali mulala khubeechi ekhumi nababili, niye owali natsitsanga okhumukhoba.

Currently Selected:

YOHANA 6: OLUPR

Highlight

Copy