YOHANA 7

Yesu nende Abasiani babwe

1Ne olunyuma lwamakhuwa ako, Yesu yachenda mu Galilaya, ne shiyachenda mu Yudea ta, shichila abemilisi aba Abayahudi bali nibakhaabanga okhumwira. 2#Abal. 23:34; Okhuk. 16:13Ne lisabo liamatili liali nilili ahambi okhuula. 3Abasiani babwe Yesu betsa nibamuboolela bari, “Rula hano otsie mulukongo lwa Yuda, kho mbu abalondibo balole ebikhole biamakana ebiokholanga. 4Okhuba omundu shiabisanga kakholanga naba niyenya okhumanyikha obulayi tawe. Kho lwokholanga amakhuwa kano, lekha eshialo shiosi shikhumanye!” 5Okhuba kata abasiani babwe shibamusubila tawe.

6Yesu nababoolela ari, “Eshise shianje shishili okhuula. Nebutswa inywe eshise shiosi shiosi neshiahabwene. 7Abomushialo shibanyala okhumusila inywe ta, habula basilanga isie, shichila ebaboolelanga habulafu mbu ebikhole biabwe nebimayanu. 8Inywe tsie mwisabo. Isie shienzia mwisabo elo ta, shichila ebise bianje bishili okhuula.” 9Yaboola kano mana natong'a Galilaya.

Yesu mwisabo liamatili Yerusalemu

10Ne olunyuma lwa abasiani babwe okhutsia mwisabo, Yesu yesi khandi yatsia, nebutswa shiyatsia habulafu ta, yatsia mumabiswi. 11Abemilisi ba Abayahudi bali nibamukhabanga mwisabo elo, nibareeba bari, “Ali hena?”

12Abandu abanji mumikanda bamonyana aka Yesu, abandi nibaboola bari, “Omwene nomundu omulayi,” nabandi bari, “Tawe, akosinjia abandu.” 13Nebutswa abulaho owaboola khukeke habulafu, shichila bali nibarire abemilisi ba Abayahudi.

14Ne olwa lisabo liali nilili ahambi okhuhwa, Yesu yatsia niyenjila muhekalu mana nachaaka okhwechesia. 15Mana abemilisi ba Abayahudi nibahuka nibaboola bari, “Omundu uno yamanya arie amakhuwa amanji ne ashili okhutsiakhwo mumeko koosi koosi?”

16Yesu nabakalusia ari, “Aka enzechesinjia shikali akanje ta, habula karulanga khu Nyasaye owaruma isie. 17Yesi owikomba okhukhola aka Nyasaye yenya, alamanya nikakhaba mbu aka enzechesinjia karulanga khu Nyasaye noho emboolanga khubunyali bwanje omwene. 18Omundu ouboolanga khulwa obunyalibwe omwene, yekhaabilanga oluyali lulwe omwene. Nebutswa oukhabilanga owamuruma oluyali, omwenoyo abetsanga omusuubilwa, khandi shiali omubeeyi tawe. 19Musa shiyamuhelesia amalako? Ne abulaho khwinywe oulondanga amalako ako ta. Mbushiina mukhabanga okhunzira?” 20Abomukanda nibakalusia bari, “Oli neshishieno! Niwiina oukhabanga okhukhwira?”

21Yesu nakalusia naboola ari, “Ndakhola eshikhole shiamakana shilala ne mwesi nimuhuchusibwa. 22#Abal. 12:3; Obucha. 17:10Musa yamuhelesia lilako lieshishebo khubaana benywe abasiani nebutswa shikali mbu, shiarula khu Musa ta, habula abakuuka benywe nibo abashichachia, ne nenywe mushebanga omwana khunyanga eya Isabato. 23#Yoh. 5:9Nikakhaba mbu omwana omusiani ashebungwa khunyanga ya Isabato, kho mbu Amalako ka Musa kaleshe okhufunakwa, eshichilanga nimusinyishila shichila mbu ehoniliye elala omundu khunyanga ya Isabato nishiina? 24Shimulakhalachilanga omundu eshiina khulwa akamulola khuye elwanyi ta, habula mukhalachenje nimulonda obwatoto.”

Abandu bareebana okhumanya nikali mbu Yesu niye Kristo

25Abandu bandi okhurula Yerusalemu bareebana bari, “Uno shiali niye omundu wa bakhaabanga okhwira noho? 26Ne bulano lole, aboolanga butswa amakhuwake habulafu, ne abulaho ouboolangakhwo likhuwa kata elala okhumufukula ta! Kanyalikha mbu, abemilisi bamanya mbu, niye Kristo watsana noho? 27Kata kario fwesi pe khumanyile womundu uno arulanga. Nebutswa olwa Kristo alitsa, abulaho owakhamanye ewarulanga tawe.”

28Mana Yesu natsiililila okhwechesia muhekalu, nalanjilisia nomwoyo omukhongo naboola ari, “Toto mwene inywe mwamanya isie, ne khandi mwamanya werulanga? Nebutswa Shindayetsa khulwanje omwene ta. Naye owaruma isie nowatoto, nenywe shimumumanyile tawe, 29habula isie emumanyile, shichila erula khuye, khandi niye owaruma isie.”

30Khulweshio, bateema muno mbu bamutiile, nebutswa abulaho owanyiila omukhonokwe okhumutiilakhwo ta, shichila ebisebie biali nibishili okhuula. 31Nebutswa abandu abanji abomumukanda okwo bamusuubila, nibaboola bari, “Olwa Kristo oyo yakhetse, yakhakhole akamakana amanji okhushila akomundu uno akholanga?”

Abelihe abalindi barumwa okhutiila Yesu

32Abafarisayo bahulila abandu nibeemoonyangakhwo khumakhuwa ka Yesu. Mana bo, nende abesaaliisi abakhulundu nibaruma abelihe bandi okhumutiila. 33Mana Yesu naboola ari, “Ndalatsiililila okhubakhwo ninenywe khulweshise shituutu butswa, ne olunyuma ndalakalukha khu oyo owaruma. 34Namuukhaabe okhunyoola, ne shinamuunyoole ta, okhuba inywe shimunyala okhwitsa wa isie enzia tawe.”

35Kho abemilisi aba Abayahudi abo nibaboolelana abeene khu beene bari, “Nihena aha omundu uno yenyanga okhutsia, aha ifwe khulanyala okhumunyoola ta? Nakhabe niyenyanga okhutsia mumatookho aka Abagiriki, aha bandu befwe bamenyanga kho mbu, yechesie Abagiriki noho? 36Naboola mbu, nakhumukhaabe, ne shinakhumunyoole ta, khandi mbu, shikhwakhanyale okhutsia aha yakhabe natsiile ta, kho aba aboolanga shiina?”

Emichela chiamaatsi, akahaananga obulamu

37 # Abal. 23:36 Khunyanga yokhumalilikha yelisabo, eyalinji inyanga ikhongo yelisabo, Yesu yasinjila ne nalanjilisia nomwoyo omukhongo naboola ari, “Omundu yesi yesi owobuloho bulia, yetse khwisie, anywe amaatsi. 38#Ezek. 47:1; Zak. 14:8Amahandiko amatakatifu kaboolanga kari, ‘Omundu yesi yesi ousuubila mwisie, emichela chiamaatsi, akahaananga obulamu chilarula muye nichikholomokha.’ ” 39Yesu yali naboolanga amakhuwa ako khu Roho, owa, abali nibamusuubila bali nibatsitsanga okhunyoola. Kata kario Roho tsana oyo yali nashili okhuhaanwa ta, shichila Yesu yali nashili okhuchinguulwa muluyali.

Abandu bahukhana khu aka Yesu

40Olwa abandu bandi khubomukanda okwo bahulila naboolanga amakhuwa ako, baboola bari, “Toto mwene uno niye omulakusi watsana!” 41Nabo abandi nibaboola bari, “Uno niye Kristo watsana!” Abandi nabo nibareebana bari, “Mana Kristo anyala yarula Galilaya? 42#2 Sam. 7:12; Mika 5:2Amahandiko amatakatifu kaboolanga mbu, Kristo aliba womulwibulo lwomuruchi Daudi, khandi aliibulilwa Betselehemu, mwitaala lia Daudi yamenyangamwo.” 43Mana obwahukhani nibubaho mumukanda okwo khulwa Yesu. 44Abandi khubo benya mbu, bamutiile, nebutswa abulaho yesi yesi owanyiila omukhokwe okhumutiilakhwo tawe.

Abemilisi aba Abayahudi shibaali nobusuubili mu Yesu tawe.

45Kho olwa abelihe abo bakalukha, abesaaliisi abakhulundu nende Abafarisayo babareeba bari, “Mbushiina nimulamureerire ta?”

46Abelihe abo nibakalusia bari, “Omundu abulakhwoho owamala okhuboolakhwo shinga lwomundu oyo aboolanga tawe!”

47Abafarisayo nabo nibabareeba bari, “Mwesi khandi omundu oyo amusiluhasiye noho? 48Alikhwoho kata mulala khubemilisi noho khu Abafarisayo, ousuubiile omundu oyo? 49Kata kario abandu abanji bano shibamanyile amalako ka Musa ta, khulweshio, bali mushilaamo shiobubi.”

50 # Yoh. 3:1,2 Nikodemo, owali mulala khu Abarisayo abo, khandi owali naranjiliile okhutsia khuye, yababoolela ari, 51“Okhulondana namalako kefwe, shikhunyala okhukhalachila omundu eshiina nikhushili okhurechelesia aka ali ninako, kata nikhushili okhukhabilisia aka aba nakholile tawe.”

52Nibamukalusia nibamureeba bari, “Kho wesi khandi orulanga Galilaya noho? Nosoma Amahandiko amatakatifu obulayi, olanyoola mbu, abulaho omulakusi, ounyala okhurula Galilaya tawe.”

[ 53Mana buli mundu nakalukha nangowe.

Currently Selected:

YOHANA 7: OLUPR

Highlight

Copy