YOHANA 4

Yesu nende omukhasi Omusamaria

1Abafarisayo bahulila mbu, abandu abetsanga khu Yesu okhubatiisibwa bali abanji okhushila abaetsanga khu Yohana. 2(Kata kario, Yesu mwene shiyabatiisinjia abandu ta, habula abeechibe bonyene nibo ababatiisinjia abandu.) 3Kho olwa Yesu yahulila akali nikaboolungwa khuye, yarula mushialo shia Yudea, nakalukha Galilaya. 4Ne narulangayo, yabirila mushialo shia Samaria.

5 # Obucha. 33:19; Yos. 24:32 Mana niyola khwitookho lindi lia Samaria, elilangwa mbu, Sikari, ahambi nomukunda kwa Yakobo yahelesia Yosefu, omwanawe. 6Isebele ya Yakobo yali habwenaho, ne okhuba Yesu yali nachoonyile khulwa oluchendo, yekhala hasebele yaho. Tsiali ahambi tsisaa tsisasaba tsieshiteere.

7Mana omukhasi omusamaria niyetsa okhutaya amaatsi. Ne Yesu namuboolela ari, “Mbelesiakhwo amaatsi kokhunywa.” 8(Ebise ebio abeechi ba Yesu bali nibatsiile mwitookho okhukula ebiokhulia.)

9 # Ezira 4:1-5; Neh. 4:1,2 Kho omukhasi oyo namukalusia naboola ari, “Kali karie mbu, iwe oli Omuyahudi nasi endi Omusamaria, kho wakhaasaba isie orie mbu ekhuhelesie amaatsi onywe?” Okhuba Abayahudi shibanywelanga amaatsi khubindu bilala nende Abasamaria tawe.

10Yesu namukalusia naboola ari, “Niwakhamanyile eshihaanwa shia Nyasaye anyala okhuhaana, noho oukhusabanga amaatsi kokhunywa uno, wakhamusabile akhuhelesia amaatsi akahaananga obulamu.”

11Omukhasi oyo namuboolela ari, “Omwami, kata eshiokhutayilakhwo amaatsi tsana shioli ninashio ta, ne amaatsi kali ehale muno mwiyabo muno. Kho wakharusia hena amaatsi akahaananga obulamu ako? 12Kuuka wefwe Yakobo niye owakhuhelesia liyabo lino, ye omwene, nende abaanabe banywa amaatsi okhurula mwiyabo lino. Kata emirukochie chiosi chianywamwo. Kho nawe wakhaboola orie mbu, oli omukhongo okhushila Yakobo?”

13Yesu nakalusia naboola ari, “Omundu yesi yesi ounywakhwo amaatsi kano, obuloho bulamulia khandi. 14Nebutswa omundu yesi yesi ounywa maatsi akemuhelesia, obuloho shibulamuliakhwo khandi tawe. Ne amaatsi akemuhelesia kalaba muye shinga isebele yamaatsi akobulamu akalimuhelesia obulamu bweinziayo.”

15Omukhasi oyo namuboolela ari, “Omwami, umbelesiekhwo amaatsi ako, mana obuloho buleshenje okhundia isie, khandi endeshenje okhwitsa hano okhutaya amaatsi khandi tawe.”

16Yesu namuboolela ari, “Tsia olanje omusaatsawo mana mwitse ninaye hano.”

17Omukhasi oyo nakalusia naboola ari, “Shiendi nende omusaatsa tawe.”

Yesu nakalusia naboola ari, “Oboolile habwene mbu, shioli nomusaatsa tawe. 18Okhuba wateshibwa nabasaatsa barano, ne omusaatsa womenyile ninaye bulano, shiali omusaatsawo tawe. Umbooleele akatoto.”

19Omukhasi oyo namuboolela ari, “Omwami, ndakhalola mbu, oli omulakusi. 20Abakuuka befwe Abasamaria benamilanga Nyasaye wabwe mushikulu shino, nebutswa inywe Abayahudi, muboolanga mbu, Yerusalemu niho aha abandu bakhoyile okhwinamila Nyasaye.”

21Yesu namuboolela ari, “Mama, suubila khukekhuboolela kano mbu, eshise shiitsanga, olwa abandu shibakhenamilekhwo Papa mushikulu muno noho kata mu Yerusalemu tawe. 22Inywe Abasamaria, shimumanyile owamwinamilanga ta, nebutswa ifwe Abayahudi khwinamilanga owakhumanyile, shichila obuhonia burula khu Abayahudi. 23Nebutswa eshise shitsanga, kata shimalile okhuula bulano mbu, khulwa obunyali bwa Roho wa Nyasaye, abandu balamwinamila Papa mubwatoto nende mu Roho, okhuba nolwa akhoyile okhwinamilwa ario. 24Nyasaye niye Roho, nabo abamwinamila, bakhoyile okhumwinamila nibetsuulemwo Roho nende obwatoto.”

25Omukhasi oyo namuboolela ari, “Emanyile mbu Masihi, oulangwa mbu, Kristo, yetsanga, ne olwa aliba niyetsile, alikhufwimbulila amakhuwa koosi.” 26Yesu nakalusia naboola ari, “Isie ouboolanga ninawe uno, nisie ye.”

27Mana mubise ebio, abeechi ba Yesu nibetsa, ne nibahuka muno, shichila banyoola naboolanga nomukhasi oyo. Nebutswa abulaho khubo owareeba omukhasi oyo ari, “Wenyanga shiina khuye?” Noho okhureeba Yesu mbu, “Oboolanga ninaye mbushiina?” Tawe.

28Kho omukhasi oyo nalekha isiongoye natsia mwitookho, naboolela abomwitookho elo ari, 29“Mwitse mulole omundu umbooleele amakhuwa kandakhola koosi. Anyala okhuba nali Kristo watsana noho?” 30Abomwitookho elo nibarula nibatsia ewa Yesu yali.

31Mushise shiene eshio, abeechi ba Yesu bamusaaya nibaboolela bari, “Omwechesia, yitsa olie!”

32Naye nabakalusia ari, “Endi nende eshiokhulia eshia inywe mulamanyilekhwo tawe.”

33Kho abeechi abo nibachaaka okhureebana abeene khu beene bari, “Omundu akhamureereere eshiokhulia noho?”

34Yesu nababoolela ari, “Eshiokhulia shianje, nokhukhola akokhwenya khwa oyo owaruma nende okhumala emilimochie, echia yambelesia okhukhola. 35Inywe shimuboolanga muri, ‘Chishili emiesi chine ne lichesa liula.’ Isie emuboolela mbu, chinguule tsimoni tsienywe mulole shinga olwa ebiokhulia biomumikunda chienywe bimalile okhulaba, bienyanga okhucheswa! 36Omundu ouchesa ahebungwa omurungo, ne akhung'asia ebiamo khulwa obulamu bweinziayo, kho mbu, omundu ouraka nende ouchesa, bosi babili bekhoye. 37Khulweshio akaboolwa kano kali habwene mbu, ‘Omundu mulala araaka, ne oundi achesa.’ 38Kho isie ndamuruma inywe okhuchesa mumikunda chiamulaakholamwo omulimo ta. Abandi nibo abakholangamwo emilimo, ne nenywe munyoolanga obukhala okhurula khubukhalabani bwabwe.”

39Abasamaria abanji abomwitookho elo basuubila mu Yesu, shichila omukhasi oyo yali nababoolele ari, “Yambooleele amakhuwa koosi akandakhola.” 40Kho olwa Abasamaria betsa khuye, bamusaaya mbu, amenyekhwo ninabo, mana Yesu nakonayo tsinyanga tsibili.

41Mana abandu bandi abanji nibasuubila Yesu khulwa obuyaalibwe. 42Kho nibaboolela omukhasi oyo bari, “Ifwe shikhusuubile khulwa okhubela aka iwe okhuboolile ta, habula khusuubiile shichila mbu, abeene khwitsile nikhuhulila nayaala, ne bulano khumanyile mbu, niye omuhonia wabandu boosi.”

Yesu ahonia omwana womusesia

43Olunyuma lwetsinyanga tsibili, Yesu yarulayo natsia Galilaya. 44#Mat. 13:57; Mrk. 6:4; Luka 4:24Okhuba ye omwene yali naboolile ari, “Omulakusi shiahebungwa oluyali mushialoshie shiene tawe.” 45#Yoh. 2:23Ne olwa yola Galilaya, abandu ba Galilaya bamwinjisia, okhuba bali nibabeelenje Yerusalemu khulwa lisabo lia Pasaka, ne bali nibaluutsi koosi aka yali nakholile mwisabo elo.

46 # Yoh. 2:1-11 Mana Yesu niyoola khandi mwitookho lia Kana, mulukongo lwa Galilaya, ewa yakalukhasia amaatsi nikekhula idivai. Ne yaliho omusesia undi Kaperinaumu, owomwanawe yali nalwala. 47Olwa yahulila mbu, Yesu arulile Yudea, yenjile mulukongo lwa Galilaya, yatsia ewa yali, namusaaya mbu, atsie Kaperinaumu, ahonie omwanawe owali nahuliishe. 48Mana Yesu namuboolela ari, “Abulakhwoho khwinywe ounyala okhusuubila nalaluutsi ebilolelo nende akamakana tawe.”

49Omusesia oyo namuboolela ari, “Omwami, chenda khutsie ewanje ninawe, omwana wanje nashili okhufwa.” 50Yesu namuboolela ari, “Tsia, omwanawo alahona.” Mana omusaatsa oyo nasuubila amakhuwa ka Yesu yamuboolela ne natsia ingowe. 51Ne olwa yali nakholomokhanga okhukalukha inangowe, abakhalabanibe bamwakaanila nibamuboolela bari, “Omwanawo nomulamu.”

52Naye nabareeba ari, “Nishise shiina shiomwana oyo achaachile okhuhona?” Nabo nibamukalusia bari, “Ahonile omurengo mukoloba khusaa ya musafu yeshiteere.” 53Mana samwana namanya mbu, niyo isaa yatsana eya Yesu yali namubooleele ari, “Omwanawo alahona.” Mana ye mwene nende abeinzuye boosi nibasuubila.

54Eshio nishio eshiali eshilolelo eshiamakana shiakhabili, eshia Yesu yakhola narulile Yudea, niyenjiile mu Galilaya.

Currently Selected:

YOHANA 4: OLUPR

Highlight

Copy