YOHANA 3
3
Yesu nende Nikodemo
1Yaliho omukhulundu owa Abayahudi, owalangwa mbu, Nikodemo, owali mulala khubomukanda okwa Abafarisayo. 2Omukhulundu oyo yetsa khu Yesu mushilo, namuboolela ari, “Omwechesia, khumanyile shinga lwoli omwechesia, owa Nyasaye yaruma. Shichila shialiho omundu yesi yesi ounyala okhukhola akamakana kokholanga ako, Nyasaye nalali halala ninaye tawe.”
3Naye Yesu namukalusia naboola ari, “Ekhuboolela toto mbu, omundu yesi yesi shianyala okhulolakhwo Obwami bwa Nyasaye, nalebulwa obuyia tawe.”
4Naye Nikodemo namureeba ari, “Omundu omukofu anyala arie okhwibulwa obuyia? Anyala toto okhukalukha munda mwa nyinamwana, mana yebulwa khandi olwakhabili noho?”
5Yesu nakalusia naboola ari, “Ekhuboolelanga toto mbu, abulaho ounyala okhwinjila mubwami bwa Nyasaye, nalebuulwe khulwa amaatsi nende khulwa Roho Omutakatifu tawe. 6Eshiibulwa nomubili, shibetsanga eshiomubili, nashio eshibulwa nende Roho, shibetsanga eshia Roho. 7Shiolachenya shichila mbu ekhubooleele wibulwe obuyia tawe. 8Omuyeka kuhuutsanga aha kwenya, nawe nohulila oluyoka lwakwo, nebutswa shiomanya ewakurula kata ewakutsia tawe. Nolwa buli mundu owibulwa khulwa Roho ali ario.”
9Nikodemo nareeba ari, “Amakhuwa kano kakhanyalikha karie?”
10Yesu naye nakalusia naboola ari, “Iwe oli omwechesia omukhongo owa Abaisiraeli, ne shiomanyile kano ta? 11Ekhuboolela toto mbu, khuboolanga khukakhumanyile, nikhumurumbulila khukenako akakhwaluutsi. Nenyu shimufuchililanga oburumbusi bwefwe tawe. 12#Obuch. 9:16,17Isie nemuboolela amakhuwa komushialo inywe shimusuubilanga tawe. Kho kata mwakhasuubila murie nemuboolela amakhuwa komwikulu? 13#Bar. 3:29Ne abulaho owatsiakhwo mwikulu ne nakalukha ta, habula Omwana womundu yenyene, niye owekha narula mwikulu.”
14 #
Obub. 21:9; Obuch. 16:5-7 Ne shinga olwa Musa yachinguula inzokha yomukasa khumusaala mushitsiimi, nolwa Omwana womundu akhoyile okhuchinguulwa ario, 15kho mbu, omundu yesi yesi oumusuubila, abe nobulamu bweinziayo. 16Okhuba Nyasaye yaheela muno abomushialo, okhuula khukhuhaana omwanawe omutelwa, kho mbu, omundu yesi yesi oumusuubilila aleshe okhufwa, habula abe nobulamu bweinziayo. 17Okhuba Nyasaye shiyaruma Omwanawe mushialo okhukhalachila abomushialo eshiina ta, habula mbu, abe omuhonia wabomushialo.
18Omundu yesi yesi ousuubilila Omwana oyo, shiakhalachilwa eshiina ta, nebutswa yesi yesi oulamusuubilila ta, amalile okhukhalachilwa eshiina, shichila shiyasuubilila mumwana Omutelwa wa Nyasaye tawe. 19Ne obukhalachilwi bweshiina bwatsana mbwobuno mbu, obulafu bwa Nyasaye bwetsa mushialo, nebutswa abandu baheela eshiilima okhushila obulafu obwo, shichila ebiima biabwe nebimayanu. 20Okhuba buli mundu yesi yesi oukholanga akobumayanu, shiyenyanga obulafu ta, khandi shiyetselanga mubulafu ta, okhuba ebikholebie ebimayanu ebio biakhetsukhana bialolekha habulafu. 21Ne oukholanga akatoto, yetselanga mubulafu kho mbu, obulafu obwo bulolesie mbu, akholile munjila yokhuria Nyasaye.
Yohana aboola khu aka Yesu
22Olunyuma lwamakhuwa ako, Yesu nabeechibe batsia mulukongo lwa Yudea, ewa yali ninabo khushise eshituutu nabatiisinjiayo. 23Yohana yesi yali nabatiisinjia abandu mulukongo lwa Ayenoni, ahambi nende Salimu, okhuba amaatsi kali amanji ebweneyo. Abandu batsia wa Yohana yali, naye nababatiisia. 24#Mat. 14:3; Mrk. 6:17; Luka 3:19,20Ako kekholekha Yohana nashili okhubohwa mumbohe tawe.
25Ne abandi abokhubechi ba Yohana bali nibayingananga nende Omuyahudi undi khumwima kweshiyahudi, kwokhwisiiya. 26Kho Abeechi ba Yohana nibakalukha khuye nibamuboolela bari, “Omwechesia, witsulilanga omundu oyo, owali ninawe ebukwe womwalo kwa Yorodani, owa waboolakhwo khumakhuwake? Bulano abatiisinjia, nabo abandu abanji batsiitsanga khuye!”
27Yohana nakalusia naboola ari, “Abulaho ounyala okhunyoola eshindu shiosi shiosi, nalahesibwe nende Nyasaye tawe. 28#Yoh. 1:20Inywe abeene muli abaloli banje khu aka ndaboola mbu, ‘Shiendi nisie Kristo mwenoyo ta, habula ndarumwa okhumuranjilila.’ 29Omwene shiselelo niye oubetsanga mwene omweha, nebutswa omwitsa wa mwene shiselelo, asinjilangaho butswa narecheresia, ne yekhoyanga muno olwa ahulila omwoyo kwa mwene shiselelo. Niko akachila, okhwikhoya khwanje khuno nikhuba okhwitsuule. 30Ye okhuula achinguushe muluyali, nasi okhuula ndituutuyie.”
Ourula mwikulu nomukhongo okhushila boosi
31Ourula mwikulu nomukhongo okhushila abandu boosi. Ne ouli mushialo, abetsanga oweshialo khandi aboolanga akeshialo, nebutswa ourula mwikulu, abetsanga ikulu wa boosi. 32Arumbulanga kamalile okhulola nende okhuhulila, nebutswa abulaho oufuchililanga oburumebwe tawe. 33Nebutswa oufuchilila oburumebwe amanyisia khulwa okhukhola ario, mbu, Nyasaye nowatoto. 34Shichila omwenoyo owa Nyasaye yaruma, aboolanga amakhuwa ka Nyasaye, okhuba Nyasaye niye oumuhelesinjia Rohowe mu bwitsulu bwosi. 35#Mat. 11:27; Luka 10:22Samwana omwana yaheela Omwanawe, ne nara ebindu biosi hasi wobunyalibwe. 36Ousuubililanga Omwana oyo, ali nobulamu bweinziayo, ne oulahelesia Omwana oluyali nende okhumuhulila ta, shialaba nobulamu ta, habula eshinyasio shia Nyasaye shilaba khuye inziayo.
Currently Selected:
YOHANA 3: OLUPR
Highlight
Share
Copy
Want to have your highlights saved across all your devices? Sign up or sign in
