YOHANA 14
14
Yesu niye injila eyitsia khu Papa
1Yesu yaboolela abeechibe ari, “Muleshe okhubeyabeya nende okhuhenda emioyo chienywe. Suubile mu Nyasaye khandi musuubile mwisie. 2Munzu mwa Papa wanje, mulimwo ebimenyo ebinji, okhuba enzitsanga okhumukaasilia habundu. Nikalakhabeele kario ta, shindakhamubooleele ako tawe. 3Olwa ndakhabe nenziile, khandi nebakaasiliye eshimenyo, ndakhakalushe okhumwenda inywe kho mbu, mwesi mube aha endi. 4Inywe mumanyile injila eyitsia aha isie enzitsanga.”
5Tomasi namureeba ari, “Omwami, shikhumanyile ewa otsitsanga tawe. Kho khwakhamanya khurie injila eyitsiayo?” 6#Bar. 3:13,14Yesu namukalusia naboola ari, “Isie nisie injila, abwatoto khandi obulamu. Abulaho ounyala okhutsia khu Papa nalabiriire khwisie tawe. 7Nimwakhabeele mbu, mwamanya isie, mwakhabeele nimwamanya Papa wanje. Ne okhuchaaka bulano, mumumanyile khandi mumuluutsi.” 8Filipo namuboolela ari, “Omwami, khumanyie Papa tsana oyo, elo nilio eliakhwenya lionyene.”
9Yesu namukalusia naboola ari, “Filipo, ndabelenje ninenywe khulwa oluhoono olurambi, ne khane shiwumanyile tawe? Omundu yesi yesi oundola isie, alutsi Papa. Kho nishiina eshichila noboola mbu, ‘Khumanyie Papa?’ 10Filipo, shiosuubilanga mbu isie endi mu Papa, naye Papa ali mwisie ta?” Yesu naboolela abeechibe ari, “Amakhuwa kandamuboolela inywe, shinakanje tawe. Papa ouli mwisie, niye oukholanga emilimochie omwene. 11Musuubile mbu, Isie endi mu Papa naye Papa ali mwisie. 12Emuboolela toto mbu, omundu yesi yesi ousuubila mwisie, yesi alakhola aka isie ekholanga. Khandi anyala okhukhola kata amakhongo okhushila kano, shichila enzitsanga khu Papa. 13Ne ndalakhola likhuwa liosi liosi eliamulasaba muliira lianje kho mbu, oluyali lwa Papa lulolesibwe okhubirira mu Omwana. 14Nimuba nimusaba eshindu shiosi shiosi muliira lianje, ndalashikhola.
Yesu asuubisia okhuruma Roho Omutakatifu
15 #
Obuch. 6:18
“Nimuba nimuuheela, mulakhola kamalako kanje kenya. 16Nasi ndalasaba Papa, naye alamuhelesia Omuhabini undi, oulabetsanga ninenywe buli lwosi. 17Niye Roho oufwimbulilanga abandu obwatoto bwa Nyasaye. Abomushialo shibanyala okhumwinjisia ta, okhuba shibanyala okhumulola kata okhumumanya tawe. Nebutswa inywe mwamumanya, okhuba amenyanga ninenywe khandi ali mwinywe.
18“Olwa enzia, shindalamulekha butswa shinga ababisandu tawe, ndalakalukha khandi khwinywe. 19Khulwa eshise shitiiti, abomushialo shinibandolekhwo khandi ta, nebutswa inywe namundole. Ne khulwa okhuba isie endi omulamu, mwesi khandi mulaba abalamu. 20Ne khunyanga eyo, mwakhamanye toto mbu, endi mu Papa wanje, khandi mbu inywe muli mwisie shinga olwa nasi endi mwinywe.
21 #
Obuch. 6:12,18; Sira 4:14 “Omundu yesi yesi oufuchilila amalako kanje nakakhola, niye owaheela isie. Naye Papa wanje alaheela oyo owaheela isie, nasi siesi ndalamuheela owatsana oyo nindifwimbula khuye.”
22Yuda (oulali Yuda Isikarioti ta) namureeba ari, “Omwami, kanyalikha karie mbu, iwe wifwimbule omwene khwifwe, ne nolefwimbula khubomushialo ta?”
23Yesu namukalusia ari, “Omundu yesi yesi ouheela isie alakhola akamechesio kanje kaboola. Naye Papa wanje alamuheela, khandi khuletsa nende Papa wanje khuye mana khumenye ninaye. 24Omundu yesi yesi oulaheela isie ta, shiahulilanga amechesio kanje tawe. Nako amechesio akamwahuliile khwisie shikali akanje ta, nebutswa karulanga khu Papa, owaruma isie.
25“Isie emubooleele ako olwa eshili ninenywe. 26Omuhabini, ouli Roho Omutakatifu, owa Papa alaruma muliira lianje, alamwechesia amakhuwa koosi mana khandi alamwitsusia koosi akandamuboolela inywe.
27“Omulembe nikwo kwemuleshela. Emuhelesia omulembe kwanje. Shiekuhaananga shinga olwa eshialo shikuhaananga khubandu tawe. Mulahenda emioyo noho okhubeelela tawe, khandi mularie tawe. 28Mwahuliile nimuboolela mbu, ‘Enzitsanga, nebutswa ndalakalukha khwinywe khandi.’ Nimuba nimwaheela isie, mwakhekhoyile, okhuba enzitsanga ewa Papa, shichila ye nomukhongo okhushila isie. 29Emubooleele ako nikashili okhwikholekha kho mbu, olwa kaba nikekholeeshe, musuubile mbu akemubooleele nakatoto. 30Shindalaboola ninenywe khulwa oluhoono olurambi ta, shichila omuruchi weshialo shino yetsanga, ne shiali nobunyali khwisie tawe. 31Nebutswa abomushialo okhuula bamanye mbu, ndamuheela Papa, niko akachila nekholanga koosi akayandaka okhukhola.”
Chende bulano khurule habundu hano.
Currently Selected:
YOHANA 14: OLUPR
Highlight
Share
Copy
Want to have your highlights saved across all your devices? Sign up or sign in
