OBUCHACHILO 29
29
Yakobo yoola mungo mwa Labani
1Mana Yakobo natsiililila noluchendolwe, ne niyoola mushialo shiabandu bebukwe. 2Ne olwa yahenga, yalola liyabo liamaatsi mumukunda, na lola, amatuuli kataru ka amakondi kali nikakonile ahambi neliyabo elo, okhuba amakondi kanywesibungwa amaatsi okhurula mwiyabo elo, 3Buli olwa amakondi ketsanga okhunywa amaatsi mwiyabo elo, abaayi bako barusinjia lichina eliafuunikhanga khwiyabo elo, bakanywesia mana khandi bakalusia lichina elo khwiyabo tsana.
4Kho Yakobo nareeba abaayi abo ari “Abasiani befwe, murulanga hena?” Ne nabo nibamukalusia bari, “Khurulanga Harani.” 5Kho Yakobo nabareeba ari, “Mwamanyakhwo omundu mbu, Labani, omusiani wa Nahori?” Nabo nibakalusia bari, “Khwamumanya.” 6Naye nabareeba ari, “Nomulamu?” Nabo nibakalusia nibaboola bari, “Nomulamu, ne lola, omukhaanawe oulangwa mbu, Raeli ngwoyo yetsanga namakondi!” 7Yakobo nababoolela ari, “Shishili eshiteere, shibili ebise biebiayo okhukhung'asibwa halala tawe. Nywesie amakondi amaatsi mana mutsie mwaye.” 8Nebutswa bamukalusia bari, “Shikhunyala okhutsia ta, okhuula olwa amakondi koosi ka khung'ana halala, mana lichina liserenjesibwe okhurula khwiyabo, kho khunywesie amakondi.”
9Ne olwa Yakobo yali nashiboolanga nabaayi ario, Raeli yetsa namakondi ka samwana, shichila ye niye owakaayanga. 10Ne bulaano olwa Yakobo yalolakhwo Raeli, omukhaana wa Labani khotsanyene, Yakobo yatsia khwiyabo naserenjesia lichina elo okhurula khwiyabo elo. Kho nanywesia amakondi ka Labani, omusiani wabwe nyinamwana. 11Khandi Yakobo nafumbeelela Raeli ne nalila nomwoyo omukhongo. 12Kho Naboolela Raeli mbu, ye nomwikho wa Labani, shichila yali omwana wa Rebeka. Naye Raeli niyelukha natsia okhuboolela samwana.
13Olwa Labani yahulila amakhuwa ka Yakobo omusiani womukhana wabwe yaboola, yelukha natsia okhumwakaanila. Mana namufumbeelela nende okhumutsunzuuna, ne namureera munzumwe. Mana Yakobo namuboolela amakhuwa ako koosi, 14Naye Labani namuboolela ari, “Toto mwene oli likumba lianje khandi inyama yanje.” Kho Yakobo namenya ninaye khulwa oluhoono lwomwesi mulala.
Yakobo akhalabanila Labani khulwa okhuteeshia Raeli nende Lea
15Mana Labani naboolela Yakobo ari, “Iwe oli omwikho wanje, nebutswa shiokhoyile okhuukholela emilimo butswa tawe. Mboolelakhwo mbu, omurungokwo kulaba shiina?” 16Labani yali nabaanabe abakhaana babili. Owambeli yali Lea, naye omushe yali Raeli. 17Lea shiyali owokhuchamisia ta, nebutswa Raeli yali nelikondo lilayi muno. 18Yakobo yaheela Raeli, kho naboolela Labani ari, “Ndalakhukholela emilimo khulwemiyika musaafu khulwa omukhaanawo omushe mbu Raeli.” 19Naye Labani nakalusia Yakobo ari, “Nobulayi okhukhuhelesia iwe okhushila okhuhelesia omusaatsa undi butswa. Menya ninasi.” 20Kho Yakobo nakholela Labani emilimo khulwemiyika musaafu. Nebutswa chialolekha khuye shinga tsinyanga tsindiiti butswa, khulwa obuheeli bwa Yakobo yali niyaheela Raeli. 21Kho Yakobo naboolela Labani ari, “Mbelesia omukhasi wanje emuteeshie, shichila tsinyanga tsiokhukhola emilimo khulwa okhumuteeshia ndakholile ndatsimalile.” 22Kho Labani nakhung'asia abasaatsa bahabundu yaho boosi nende okhukaasia lisabo. 23Nebutswa nibwakheela, Labani yabukula omukhaanawe Lea narerera Yakobo, ne Yakobo nakona ninaye. 24(Labani yabukula omukholiwe Zilipa, nahelesia Lea okhuba omukholiwe). 25Mana mumabwibwi, Yakobo nanyoola mbu, owa yali nakonile ninaye yali Lea. Kho Yakobo nareeba Labani ari, “Eshiokholile shino nishiina? Shindaakhola emilimo khulwa Raeli? Ne mbushiina niungatia?” 26Labani nakalusia Yakobo ari, “Mushialo shiefwe shino, shikakholungwa kario, mbu ohaane omukhaana omushe omukhulundu nashili okhuteekha tawe. 27Iwe mala lichuma elala lino noli nende Lea shinga olwa amalako kalaka khubateshianiye. Mana khulakhuhelesia Raeli khulwa okhuukholela emilimo khulwemiyika chindi musaafu.” 28Yakobo yamala akhole ario. Ne olunyuma lwa Yakobo okhuba nende Lea khulwa lichuma elala, Labani yamala ahelesie Yakobo Raeli okhuba omukhasiwe. 29(Labani yabukula omukholiwe Biliha, nahelesia Raeli okhuba omukholiwe). 30Kho Yakobo nakona nende Raeli khandi, ne naheela Raeli okhushilakhwo shinga olwa yali niyaheela Lea. Mana nakholela Labani emiyika chindi musaafu.
Abaana ba Yakobo
31Ne olwa OMWAMI Nyasaye yalola mbu, Lea shiyaheelwa ta, yamwikulila okhwibula. Nebutswa Raeli yatong'a nali omukumba. 32Mana Lea nahela inda, ne niyebula omwana omusiani. Namukulikha mbu, Rubeni, shichila yaboola ari, “Okhuba OMWAMI Nyasaye aluutsi obusandibwi bwanje. Bulaano, omusaatsa wanje alaaheela isie.” 33Khandi Lea nahela inda yakhabili. Ne niyebula omwana omusiani khandi. Kho naboola ari, “OMWAMI Nyasaye yambelesiye omwana omusiani shichila ahuliile shinga olwa ndasilwa.” 34Khandi nahela inda, ne niyebula omwana omusiani, kho naboola ari, “Bulaano, omusaatsa wanje alahambaana ninasi shichila emwibuliile abaana abasiani bataru.” Khulweshio, yamukulikha mbu, “Lawi.” 35Khandi Lea nahela inda ne niyebula omwana undi omusiani khandi. Naboola ari, “Olwene luno, nditsa okhwitsoomia OMWAMI Nyasaye.” Khulweshio, namukulikha eliira mbu, Yuda. Kho nasinjila okhwibula.
Currently Selected:
OBUCHACHILO 29: OLUPR
Highlight
Share
Copy
Want to have your highlights saved across all your devices? Sign up or sign in
