OBUCHACHILO 25

Abolwibulo lwa Aburahamu bandi

(1 Akak. 2:32-33)

1Aburahamu yateeshia omukhasi undi oulangwa mbu, Ketura. 2Ketura namwibulila Zimurani, Yikishani, Medani, Midiani, Ishibaki nende Shuha.

3Yokishani yali samwana Sheba nende Dedani, nabo abolwibulo lwa Dedani bali Ashurimu, Letushimu nende Leumumimu. 4Abasiani ba Midiani bali Efa, Eferi, Hanoki Abida nende Elida. Abo boosi bali abolwibulo lwa Ketura.

5Aburahamu yahelesia Isaka ebindu biosi ebia yali ninabio. 6Nebutswa Aburahamu yabahelesia abaana babakhasi ababikha ebihaanwa bionyene butswa. Ne olwa yali nashili mwoyo, yabarusia khumwanawe Isaka, nabayila mushialo shiebukwe, ehale okhurula khu Isaka.

Okhufwa nende okhuyabilwa khwa Aburahamu

7Aburahamu yamenya emiyika eshikhumi shilala nende amakhumi musaafu nachirano. 8Mana Aburahamu nafwa nali omukofu omuyindifu muno, nalonda khubekhobe abafwa. 9Abasianibe Isaka nende Ishimaeli nibamuyabila mung'ani ya Makipela, eyali ebukwe wa Mamure, mumukunda kwali kwa Efuroni, omusiani wa Zohari, Omuhiti. 10#Obucha. 23:3-16Omukunda okwo nikwo okwa Aburahamu yali niyakula okhurula khu Abahiti. Mana Aburahamu nayabilwa ahambi nende aha omukhasiwe Sara yali niyayabilwa. 11Olunyuma lwokhufwa khwa Aburahamu, Nyasaye yahelesia Isaka ikhabi, ne Isaka namenya Beerilahairoi, eshisina mbu, “Liyabo elia oyo ouliho mwoyo, oundolanga isie.”

Abetsinzibulo tsia Ishimaeli

(1 Akak. 1:28-31)

12Abalondakhwo bano, nibo abolwibulo lwa Ishimaeli omusiani wa Aburahamu, owa Hagari Omumisiri, owali omukholi wa Sara yebulila Aburahamu. 13Ameera kabasiani ba Ishimaeli okhulondokhana nende okhwibulwa khwabwe, owambeli okhuula khu owokhumalilikha kali, Nebayotsi, Kedari, Adibeeli, Mibisamu. 14Mishima, Duma, Masa, 15Hadadi, Tema, Yeturi, Nafishi, nende Kadema. 16Abo nibo abali abasiani ba Ishimaeli, abali abakuka betsimbia ekhumi natsibili. Ebimenyo biabwe nende tsingongo etsia bamenyangamwo tsiali tsiakulikhwa ameera kabwe. 17Ishimaeli yafwa nali nemiyika eshikhumi shilala nende amakhumi kataru namusaafu ne nayabilwa halala nende abekhobe. 18Abolwibulo lwa Ishimaeli bamenyanga mushialo eshili hakari ha Habila nende Shuri, eshili ahambi khu lwakho lwa Misiri, elubeka wa Ashuri. Bamenyayo nibalarecheresaninjia nende abasiani babwe bandi abolwibulo lwa Aburahamu tawe.

Okhwibulwa khwa Esau nende Yakobo

19Abalondakhwo bano nibo abolwibulo lwa Isaka omusiani wa Aburahamu. Aburahamu yali samwana Isaka. 20Naye Isaka yali nemiyika amakhumi kane, olwa yateeshia Rebeka omukhaana wa Betsweli Omuaramia wa Mesopotamia, omukhaana wabwe Labani. 21Rebeka yali omukhasi omukumba, nikachila Isaka nasaaya OMWAMI Nyasaye, naye OMWAMI Nyasaye nahulila okhusaayakhwe, mana Rebeka nahela inda. 22Rebeka nashili okhwibula yamanya mbu, alebula amakhwana, shichila yahulila nikatuyananga mundamwe, mana niyereeba ari, “Mbushiina kano nikanzikholekhakhwo?” Kho natsia okhureeba OMWAMI Nyasaye eshifune, 23#Abaro. 9:12naye OMWAMI Nyasaye namukalusia ari, “Oli nabaana abasiani babili mundamwo. Babili abo bakhabe amahanga kabili akahukhaane.

Ne omushe khu babili abo, yakhabe owamaani okhushila omukhulundu

ne omukhulundu yakhakhalabanile omushe.”

24Olwa tsinyangatsie tsiokhwibula tsiola, yebula amakhwana. 25Owaranjilila okhurula yafwana shinga ipala ne omubilikwe kwosi kwali namaswa kho nibamukulikha mbu, Esau. 26Ne olunyuma omusiani wabwe nalondakhwo, omukhonokwe kwali nikutiilile eshisisilo shia Esau, kho nibamukulikha mbu, Yakobo. Olwa Isaka yabeebula, yali nemiyika amakhumi kasasaba.

Esau akusilia Yakobo obukhulundubwe bwokhwibulwa

27Olwa abasiani abo bakhula nibaba abakhogo, Esau yamala abe omuyiimi owamachesi khandi owachama obulamu bwomubulimo. Naye Yakobo yali omuholelefu, omwayi wamakondi owachama okhwikhala hango. 28Isaka yaheela Esau shichila yalitsangakhwo inyama indai yeisolo, eya Esau yayiimanga, nebutswa Rebeka naye yali yaheela Yakobo.

29Inyanga yindi Yakobo yali nateekhanga eshiokhulia, Esau niyenjila narula mukhuyiima nachonyile khandi nahulilanga inzala. 30Mana Esau naboolela Yakobo ari, “Nochama, lekha endiekhwo eshiokhulia shioteekhanga eshio, shichila enjonyile muno.” (Kho nibamulanga mbu, Edomu#25:30 Edomu: Eshisina mbu, omupala.) 31Yakobo namukalusia ari, “Ndalakhuhelesia eshiendekhanga nikaba mbu, olangusia obukhulundubwo bwokhwibulwa.” 32Esau namuboolela ari, “Inzala yenya okhunzira, obukhulundu bwanje buli nabukhoonyi shiina khwisie?” 33#Abaheb. 12:16Yakobo namuboolela ari, “Ranjilila hunziitsubile mbu, olambelesia obukhulundubwo inyanga yino.” Kho Esau niyetsuba ne nahelesia Yakobo obukhulundubwe bwokhwibulwa. 34Mana Yakobo nahelesia Esau obusuma nende eshitiani. Yalia khandi nanywa ne nasinjila narula natsia. Nolwa Esau yalechelesia ario obukhulundubwe bwokhwibulwa.

Currently Selected:

OBUCHACHILO 25: OLUPR

Highlight

Copy