OBUCHACHILO 20
20
Aburahamu nende Abimeleki
1Okhurula Mamure, Aburahamu yahuuya natsia Negebu. Kho namenya hakari wa Kadeshi nende Shuri. Ne olunyuma yahuuya natsia Gerari. 2#Obucha. 12:13; 26:7Olunyuma nali ebweneyo, yaboola mbu, Sara omukhasiwe nomukhaana wabwe. Kho Abimeleki, omuruchi wa Gerari narumana mbu, Sara areerwe. 3Nebutswa Nyasaye yaloleshela Abimeleki mumalooro mushilo ne namuboolela ari, “Lola, iwe olafwa, shichila omukhasi wobukuule oyo nowabeene.” 4Nebutswa Abimeleki yali nashili okhukona nende Sara tawe. Kho naboolela OMWAMI Nyasaye ari, “OMWAMI Nyasaye, olamulula isie nende abandu banje noho? Shiendikhwo neshikha ta! 5Aburahamu mwene niye owaboolile ari, ‘Sara nomukhaana wefwe?’ Naye Sara mwene naboola ari, ‘Aburahamu nomusiani wefwe?’ Ekholile endio nende omwoyo omweleleshe khandi nendamanyile mbu, enzonoonanga tawe.”
6Mana mumalooro ako Nyasaye namukalusia naboola ari, “Emanyile mbu, okholile orio nomwoyo omulekhuule, khandi nisie oukhwikaliile okhutiila khu Sara kho mbu, oleshe okhunzonoonela isie. 7Khulweshio bulano kalusilia Aburahamu omukhasiwe. Aburahamu nomulakusi, ne alakhusaayila kho mbu, obe mwoyo. Nebutswa nolamukalusilia ta, manya toto mwene mbu, iwe nende abandubo mwesi, mulafwa.”
8Kho Abimeleki nabuukha mumabwibwi, ne nalanga abakhalabanibe boosi, nababoolela amakhuwa ako koosi, mana nibaria muno. 9Olunyuma Abimeleki nalanga Aburahamu ne namureeba ari, “Nishiina eshiokhukholeele shino? Ne khandi neshionoono shiina eshia isie ekhukholeele, eshichila niundeerera isie nende lihanga lianje obwonooni obukhongo buno? Ukholeele akalakhoyile okhukholwa tawe.” 10Khandi Abimeleki nareeba Aburahamu ari, “Wabeele nopaaranga shiina, kho niukholela amakhuwa kano?”
11Aburahamu nakalusia naboola ari “Ndakholile endio shichila ndapaarire mbu, abandu bano shibariitsanga Nyasaye ta, ne banyala okhunzira khulwa omukhasi wanje. 12Kata kario nomukhaana wefwe toto, nomukhaana wa papa wanje, nebutswa banyinefwe bahukhaane, mana isie ndamuteeshia. 13Ne olwa Nyasaye yaarusia munzu wa papa wanje nenzia mushialo eshicheni, ndaboolela omukhasi wanje Sara endi, ‘Okhumanyia mbu oli omwisikwa khwisie, habundu hosi hosi aha khutsia, oboolenje mbu, isie endi omusiani wenywe.’ ”
14Mana Abimeleki nabukula amakondi, tsing'ombe, nende abasumba beshisaatsa nende abeshikhasi, nahelesia Aburahamu, ne namukalusilia Sara omukhasiwe. 15Abimeleki naboolela Aburahamu ari, “Eshialo shianje shiosi njieshino. Omenyekhwo hosi hosi ahakhuchamisiye.” 16Ne naboola Sara ari, “Ehelesiye omusiani wenywe ebitonye bieifetsa ebihela eshikhumila shilala, shibe eshihaanwashio, okhumanyisia abandu boosi aboli ninabo mbu, shioli nende eshikha ta, khandi mbu, shiolikhwo nobwonooni bwosi bwosi tawe.” 17Mana Aburahamu nasaaya Nyasaye, mana Nyasaye nahonia Abimeleki, khandi nahonia omukhasi wa Abimeleki halala nende abakhalabanibe beshikhasi kho mbu, bebule abaana khandi. 18Mukhuchaaka Nyasaye yali niyekala olubeleshelo lwa buli mukhasi womunzu ya Abimeleki, sichila Abimeleki yali niyabukula Sara omukhasi wa Aburahamu.
Currently Selected:
OBUCHACHILO 20: OLUPR
Highlight
Share
Copy
Want to have your highlights saved across all your devices? Sign up or sign in
