Mk. 7

Kamekisio ke sikuuka

(Mat. 15.1-9)

1Bafarisayo balala ne babekisi be kamalaka ka Musa ba baaba ne baamile e Yerusalemu bebuusia niio Yesu ali. 2Bemenieelesia babona bali babeeka ba Yesu balalichanga ne bakhasaabile kamakhono tawe, lino liekesia kimiima kimibi sikila se baba basaabiile mu ngila niyo Bafarisayo benya tawe. 3Bafarisayo ne Bayaudi boosi baloondanga kamekisio niko banyoola khukhwama khu sikuuka, se balichanga ne bakhasaabile mu ngila eyenyibwa tawe. 4Namwe se banyala balia siosi siosi sisiamile khu sooko ne bakhasisiingile tawe. Lundi baloonda kamalaka kakaandi kamakali niko banyoola nga ke khusiinga bikoombe, bibuumba bie kumukasa ne bulili.

5Nio Bafarisayo ne babekisi abo bareeba Yesu bali, “Siina sikila babeeka bowo ne bakhaloonda kamekisio niko bakuuka bakhwekisia tawe, lundi balia ne bakhasaabile kamakhono tawe?” 6#Isa. 29.13 Yesu aabakobosia ali, “Isaya aba ng'ali, nga aang'oola liiba lienywe ali lili lie bubacha, bulayi bwene nga liaandikwa lili,

‘Babaandu bano bambelesianga efuma ne kiminwa kiabwe,

ne kakhali kimiooyo kiabwe kili aleeyi nase.

7Se lilikho ne bukhala enywe khu khusaaya ese tawe,

sikila mwekisia kamekisio ne kamalaka ko mundu busa oli manya ne kali ka Wele!’

8“Mura alubeka Lilaka lia Wele mala mufukiilila kamekisio ke babaandu.” 9Nio Yesu achiililila khuloma ali, “Muli ne ngila eye khuloba Lilaka lia Wele nio mutiile kamekisio kenywe mwabeene. 10#Khur. 20.12; 21.17; Bal. 20.9; Likh. 5.16 Sikila Musa aalaka ali, ‘Ria raraao nende maao’ ne ‘Yesi yesi okholela raraawe namwe maawe embelekeu akhoya erwa.’ 11Ne kakhali enywe mwekisia muli omundu aaba naali ne sisiindu nisio andi arumikhire khuyeeta raraawe namwe maawe mala aboole ali, ‘Sino sili Korubani.’ (Liboola lili sili sia Wele.) 12Abwenao muboola muli aba abeleelwe khuyeeta raraawe namwe maawe. 13Mu ngila yino, kamekisio niko mwekisiana kafunaka elomo eya Wele. Lundi bibiindu bibiindi biliio bikali busa nibio mukholanga, bie lukano luno.”

Bibiindu bikhola omundu aaba omunyaalu

(Mat. 15.10-20)

14Nio Yesu alaanga babaandu bakali ababoolela ali, “Ndekeeresie mweesi mala muulile. 15Se siliio sicha munda khukhwama enje sinyala siakhola omundu aba omunyaalu tawe. Ne kakhali sisiama mu mwoyo simukhola aaba omunyaalu.” [ 16Nono waaba ne oli ne kamaru ulila!]#7.16 Chibibilia chindala se chili ne lunyilili luno tawe. 17Nga alekhana ne babaandu engila munju, babeeka bewe bamureeba abenooselie sifuno sie kamakhuwa kano 18Yesu abakobosia ali, “Khane mwesi se muli ne limanya tawe. Se mubona muli sisiama enje siengila munda mwo mundu se simunyaalutia tawe? Se siliio sisiama enje siacha munda siamunyaalutia tawe 19sikila se sicha mu mwoyo tawe, ne kakhali sicha munda mala sikelao ne sirura.” (Mu khuloma khurio Yesu afukiilila biakhulia bioosi ali biolaana khuliibwa.)

20Mala achiililila khuloma ali, “Sisiama mu mwoyo nisio sikhola omundu aaba omunyaalu. 21Sikila khukhwama mu mwoyo kwo mundu, kamebaasio kamabi karangirira omundu khukhola kamamayaanu nga, khunuula, khukhwira, 22khukhola bueeyi, bulianga ne khukhola kamamayaanu ke lukano woosi nga bubeeyi, bunyaalu, khububa, khukiikha, lilielola ne busilu. 23Bibiindu biibi bino bioosi biama mu mwoyo mala bikhola omundu aaba omunyaalu.”

Omukhasi owe lisuubila

(Mat. 15.21-28)

24Khukhwama ao Yesu arekukha acha mu ngoongo cha Tiro ne Sidoni. Engila munju mala khwenya omundu yesi yesi amanye tawe, ne kakhali se anyala khukhwekisa tawe. 25Abao omukhasi owaba no mwana omukhaana owabamo ne sisieeno. Omukhasi oyo aboolelwa niko Yesu akholanga mala echa khangu akwa mu bikele biewe. 26Omukhasi oyo aba Omukiriki khukhwama mu Foenike mu sibala sia Siria. Aasaba Yesu arusie sisieeno mu mukhaana wewe. 27Ne Yesu amukobosia ali, “Lekha khuliisie babaana nio, se buli bulayi khubukula siakhulia sie babaana mala omwaatile chimbwa tawe.” 28Omukhasi oyo aamukobosia ali, “Omwami, akhaba chimbwa chichiikhalanga aasi we mesa, chilichanga bitonyi nibio babaana baliilenge ne bikwa aasi.” 29Khwako Yesu amukobosia ali, “Sikila niko olomile, kobola engo, olanyoola sisieeno esio siarurire mu mukhaana wowo!” 30Nio omukhasi oyo aakobola engo, anyoola omukhaana wewe akonile khu sitanda ne sisieeno siamururiremo.

Yesu aonia omumiinyi

31Yesu aama mu sibala siili siimbi ne Tiro mala abirira mu lukoba lwa Sidoni acha khu nyanja eya Kalilaya; khubirira Tekapoli. 32Nio babaandu babaandi bamureerera omundu omumiinyi, mala basaba Yesu amurekho kamakhono, 33Yesu amurusia mu sipupu sie babaandu baaba bong'ene, ara chinjala chewe mu maru ko omumiinyi, amuakha kamare khu lulimi. 34Yesu aalola mu ngaaki mala ekhilisia kumwoyo aboolela omumiinyi ali, “Efufata” liiboola lili, “Yikukha.” 35Ao ne nao omundu oyo ekukha khuulila mala aarakikha khulomaloma bulayi. 36Nio Yesu aatanyilila babaandu ali bakhaboolelakho omundu yesi yesi tawe. Nga atasa khubatanyilila nabo nga batasa khuboola. 37Ne boosi babaulila bauka lukali po ne khuloma bali, “Akhola buli siindu bulayi, akhaba ne khuonia bamiinyi.”

Currently Selected:

Mk. 7: LUBUKUSU

Highlight

Copy