Mk. 3

Omundu owafwokoya kumukhono

(Mat. 12.9-14; Lk. 6.6-11)

1Nio Yesu akobola mu sinakooki mala omundu owafwokoya kumukhono abamo. 2Babaandu balala babamo benya khu sitaka Yesu khulwe khuonia omundu oyo khu ndaalo eya sabato, khwako bamuloleelela babone ne amuonia namwe tawe. 3Nio Yesu aboolela owafwokoya ali, “Yiicha ebweeni eno.” 4Mala areeba babaandu ali, “Lilaka liefwe likhufukiilila efwe khukhola siina khu ndaalo eya Sabato? Khuyeeta namwe khukhola kamabi? Khuonia bulamu bwo mundu namwe khukhwira?” Babaandu abo se bamukobosiakho siindu tawe. 5Yesu aambwa lirima abaloleelela, lundi siise esio abakholela siisa sikila khunaania ne khukorwa khwabwe, nio aboolela omundu oyo ali, “Kololosia kumukhono kwowo.” Akukololosia mala kwaona. 6Khwako Bafarisayo barura mu sinakooki mala bakhola etoloondo ne babeeka be kumukaanda kwa Herodi, mala bakhola ekwangwaani eye khukhwira Yesu.

Babaandu bakali khu nyanja

7Yesu ne babeeka bewe bacha khu nyanja eya Kalilaya, mala babaandu bakali bamuloondakho. Baba bamile Kalilaya, e Buyuda, 8e Yerusalemu, khukhwama mu sibala sia Itumeya, khukhwama mu sibala sie bukwe nooli mu Yoritani, lundi khukhwama embi ne chingoba cha Tiro ne Sidoni. Babaandu bano boosi beecha khu Yesu sikila baba bauliile niko Yesu aakholanga. 9#Mk. 4.1; Lk. 5.1-3 Babaandu baba bakali mala bakila Yesu aboolela babeeka bewe ali, barekekhe liliaaro elwachilekho ne ali khu nyanja nio babaandu bakhamumiina tawe. 10Aba aonisie babaandu bakali ne abo boosi ba baaba balwale baba balikho beyindikilisia bamwolekho mala bamutiilekho. 11Ne buli lwosi babaandu ba baba ne bisieeno nga bamubonanga bakwichanga aasi ebweeni wewe ne khukukuula bali, “Ewe oli Omwana owa Wele!” 12Yesu aboolela bisieeno ne aandalasia ali bikhaboolela omundu okundi yesi yesi bili niye ali naanu tawe.

Yesu arobora barumwa ekhumi na babili

(Mat. 10.1-4; Lk. 6.12-16)

13Nio Yesu acha khu sikulu alaanga nibo asiima, beecha niio ali 14ne arobora ekhumi na babili nibo alaanga ali Barumwa, ababoolela ali “Namuroboore enywe khuba ne nase. Lundi ndamuruma khucha khukhwilwacha burume 15ne mulaba ne bunyali bwe khurusia bisieeno.”

16Bano nibo ekhumi na babili nibo aarobora: Simoni (niye Yesu alaanga ali Petero), 17Yakobo ne wandaaye Yoana babaana ba Sebetayo (nibo Yesu alaanga ali Boanerike, sifuno bali babaandu be lueni), 18Andereya, Filipo, Baturimayo, Matayo, Tomasi, Yakobo omwana owa Alufayo, Tatayo, Simoni Omukanaani 19ne Yuda Isikarioti owachaama Yesu.

Yesu ne Beelisebuli

(Mat. 12.22-32; Lk. 11.14-23; 12.10)

20Nio Yesu acha engo. Lundi babaandu baba bakali bakila Yesu ne babeeka bewe khuba ne siise sie khulia tawe. 21Nga balebe bewe baulila bario, berusia khu muliinda sikila babaandu balomanga bali, “Alaluukhe.”

22 # Mat. 9.34; 10.25 Baandiki balalakho ba baaba ne bechile khukhwama e Yerusalemu balomanga bali, “Ali ne Beelisebuli! Sisieeno sisimeelela bisieeno bibiindi bioosi, nisio simuelesianga kamaani ke khurusia bisieeno bibiindi.” 23Nio Yesu abalaanga mala ababoolela mu Lukano ali, “Sietani anyala ariena arusia Sietani? 24Bubwami ne bukabukhanamo, se buyiindila tawe, 25enju yaaba ne kabukhanamo se yiima tawe. 26Khwako bubwami bwa Sietani bwakabukhanamo bipupu, se buyiindila tawe. Ne kakhali busalaanila mala bwoole khu siakamo.

27“Mbao yesi yesi onyala khwibwaakala enju yo mundu we kamaani mala amunuule bibiindu biewe ne akhanyoile aboa omwenenju tawe. Khukhwola aboe omwenenju nio anyale khunuula bibiindu biewe.

28“Ng'ali ese muboolela enywe ndi, babaandu banyala babeelwa bubwoni bwabwe nende ke mbelekeu koosi niko banyala balomaloma. 29#Lk. 12.10 Ne kakhali oyo okholela Roho Omutakatifu embelekeu se alibeelwa tawe. Sikila akholile bubwoni bwa mindali.” 30(Yesu aaboola kano sikila babaandu balala baba baboola bali, “Ali ne bisieeno.”)

Maawe owa Yesu ne bawandaaye ba Yesu

(Mat. 12.46-50; Lk. 8.19-21)

31Mala maawe owa Yesu ne bawandaaye boola, beema enje mala barumania likhuwa mukari khumulaanga 32sipupu sie babaandu baba bekhaale babotookheleele Yesu, mala bamuboolela bali, “Maao ne bawandaayo bali enje, benya bakhubone.” 33Nio Yesu akobosia ali, “Maayi niye naanu? Ne wandaayase niye naanu?” 34Alola babaandu bamwikhaaleo mala aloma ali, “Bano nibo maayi ne bawandaayase! 35Oyo yesi yesi okhola lilienya lia Wele niye wandaayase, omukooko wase, lundi niye maayi.”

Currently Selected:

Mk. 3: LUBUKUSU

Highlight

Copy