Mat. 18

Naanu omukali khukhila boosi?

(Mk. 9.33-37; Lk. 9.46-48)

1 # Lk. 22.24 Siise esio babeeka becha khu Yesu, bamureeba bali, “Naanu omukali khukhila boosi mu Bwami bwe mwikulu?”

2Yesu alanga omwana, amwimia akari wabwe, 3#Mk. 10.15; Lk. 18.17 mala aaloma ali, “Muboolela bung'ali, ne mukhakaluukhana mwaba nga babaana, se mulingilakho mu Bwami bwe mwikulu tawe. 4Yesi yesi oweboombia aaba nga omwana yuno, niye oli omukali mu Bwami bwe mwikulu. 5Yesi yesi owakaanila omwana mulala nga yuno ari, mwisina liase aba anjakaniile ese.

Kamakhako

(Mk. 9.42-48; Lk. 17.1-2)

6“Ne yesi yesi okila mulala khu batiiti babasuubila ese bano bakhola bubwoni, buli bulayi khukhila khu niye khurwa lususi luboofu mwikosi mwewe ne khusiikhwa mu lusiba lwe nyanja. 7Silaamo sili khu sibala sikila kamakhako ke khukhola bubwoni! Khukhwola kamakhako kabeo, ne kakhali omundu oreera kamakhako ako ali ne silaamo.

8 # Mat. 5.30 “Kaaba bali kumukhono kwowo namwe sikele siowo, sikila ewe wakhola bubwoni, sikhale mala osimwaate eyo; buli bulayi khukhwingila mu bulamu ne oli ne sikhuumbu namwe ne walemala khukhila khuba ne kamakhono koombi namwe ne bikele bioombi mala omwaatwe mu mulilo kwa mindali. 9#Mat. 5.29 Lundi kaaba bali emoni yowo ekila wakhola bubwoni, kitomole mala okimwaate eyo; buli bulayi khwiwe khukhwingila mu bulamu ne moni ndala khukhila ne chimoni chombi mala omwaatwe emakoombe mu mulilo kwa mindali.

Lukano lwe likheese liliatiba

(Lk. 15.3-7)

10“Mukhalekelesiakho mulala khu batiiti bano tawe. Sikila muboolela enywe ndi mwikulu malaika babwe busiele bali ebweeni wa Paapa wase we Mwikulu. [ 11#Lk. 19.10 Sikila Omwana wo Mundu echa khuonia babatiba.]#18.11 Chibibilia chindala se chili ne lunyilili luno tawe. 12Mwibaasia muli siina? Omundu aaba ne kamakheese emia, mala lilalakho liatiba, salekha kamakhumi tisa na tisa mumaayilwe mu bikulu mala acha khuyiima lilala litibile elio tawe ku? 13Ng'ali muboolela ndi, nalinyoolile aliekhoyela khukhila kamakhumi tisa na tisa kakhatibile tawe. 14Bulayi bwene se lili lilienya lia Paapa oli mwikulu mulala khu bakeekhe bano atibe tawe.

Wandaayo okhukholela kamabi

15 # Lk. 17.3 “Kaaba bali wandaayo akhukholela kamabi cha omuboolele kamabi kewe; ne muli babili mweng'ene. Kaaba bali akhuulila, aba wamuoniisie. 16#Likh. 19.15 Ne nakhakhuulila tawe, cha no mundu mulala namwe babili, nio buli likhuwa liaandalasibwe ne buloli bwe babaandu babili namwe bataru. 17Kaaba bali aloba khubaulila, boolela e kanisa yoosi. Ekhumaliilikha nakhaulila ke kanisa tawe, mubukule nga omundu okhamanyile Wele tawe, namwe orosiaanga busuuru.

Khukaania ne khufukiilila

18 # Mat. 16.19; Yn. 20.23 “Ng'ali muboolela ndi, siosi siosi nisio mukaania khu sibala aba siakaanisiibwe mwikulu, lundi siosi siosi nisio mufukiilila khu sibala siafukiiliilwe mwikulu.

19“Lundi muboolela ndi, kaaba bali babili khwinywe mufukiilisiana khu sibala khu siindu siosi siosi nisio musaba, mulakholelwa murio ne Paapa wase we mwikulu. 20Sikila niio babili namwe bataru bebuusiisie mwisina liase, aba ndi nabo abwenao.”

Lukano lwo mukholi okhaaba ne sibeelwa tawe

21 # Lk. 17.3-4 Nio Petero echa khu Yesu aamureeba ali, “Omwami, wandaayase akholela bubwoni khenga ne mubeela? Kamakhabi saba?”

22Yesu amukobosia ali, “Se khuboolela ndi khukhwola kamakhabi saba tawe, ne kakhali kamakhabi kamakhumi saba khukhwola saba.#18.22 kamakhumi saba khukhwola saba: namwe kamakhumi saba na saba. 23Khwako Bubwami bwe mwikulu bunyala khulekhasibwa no mwami owenya khumenieelesia bitabu bie chirupia bie bakholi bewe. 24Nga arakikha khubala, mulala aareerwa khu niye owaba ne likobi lie chirupia chimilioni chingali, 25ne nga nilwo akhanyala khuruunga tawe, Omwami wewe aalaka ali akusibwe, alala no mukhasi wewe ne babaana bewe nende nibio aba nabio bioosi, likobi liruungwe. 26Nio omukholi oyo aamukwa mu bikele ne khumwikoonjelela ali, ‘Omwami kholele siisa khakhuruunge choosi!’ 27Omwami amukholela siisa, amubeela likobi aamulekhuula acha.

28“Ne kakhali omukholi chana oyo, nga ne aarura enje, aanyoola mulala khu bakholi basie owaba ne likobi liewe lie chirupia emia, aamutiila enjasi ne aloma ali, ‘Nduunge likobi liase.’ 29Nio omukholi wasie oyo aamukwa mu bikele amwikoonjelela ali, ‘Kholele siisa, khakhuruunge choosi!’ 30Aaloba, mala aacha aamura niye mu siboe nabwila nga akharuunge likobi elio. 31Nga bakholi basie babona bario babiililwa lukali, mala bacha baboolela omwami wabwe kakakholekha. 32Nio omwami wewe aamulaanga amureeba ali, ‘Ewe omukholi omumayaanu! Khubeleele likobi liowo lioosi sikila unjikoonjelele! 33Ne ewe nawe andi sokholeele omukholi wasio siisa nga sesi ne khukholeele?’ 34Omwami wewe aambwa lirima amumwaata mu cheela, nabwila aliruunga likobi liewe lioosi.”

35Nio Yesu amaliilisia ali, “Akhaba Paapa wase owe mwikulu alikholela ario buli mulala khwinywe, kaaba bali se mubeela bawandaayenywe khukhwama mu miooyo kienywe tawe.”

Currently Selected:

Mat. 18: LUBUKUSU

Highlight

Copy