Zacarías 9
9
Israel nacionpa vecïnun nacionkunapaq wilashqan
1Kaychömi qelqaraykan Tayta Diospa wilakuynin Hadrac markacho y Damasco markacho taq runakunapaq.#Isa. 17.1-3; Jer. 49.23-27; Amós 1.3-5. Lapan trïbu Israel runakuna imano kawapäkushqanta Tayta Dios rikashqannömi Siriacho taq runakunatapis rikaykan. 2Damascupa lindëruncho taykaq Hamat runakunata, Tiro runakunata y Sidón runakunatapis mayjina yachaq kaptinpis paymi juzgananpaq rikaykan.#Isa. 23.1-18; Eze. 26.1—28.26; Joel 3.4-8; Amós 1.9-10; Mat. 11.21-22; Luc. 10.13-14.
3Tiro runakunaqa markanta tsapananpaq altu murällatami sharkatsipäkushqa. Pasaypa rïcuyashpanmi alpatanöraq qellayta shuntapäkushqa y shalatanöraqmi qoritapis shuntapäkushqa. 4Tsayno kaykaqtami Tayta Dios waktsayätsinqa. Imaykantapis lamarman jitarirmi markankunata chipyaq rupatsinqa.
5Tsayta rikarmi Ascalón markacho taq runakuna fiyupa mantsakanqa. Gaza runakunapis fiyupa lakikärishpanmi siksikyanqa. Pipis yanapananpaq manana kaptinmi Ecrón runakunapis fiyupa lakikärinqa. Gaza markapa mandaqnintapis wanutsipäkunqami. Ascalón markapis chunyaqmi rikakunqa. 6Asdod markachöpis jäpa runakunami tanqa.
Tayta Dios kaynömi nin: <<Ali chölu tukärishqanpitami filisteo#9.6 Ascalón, Gaza, Ecrón y Asdod markakunaqa filisteo runakuna tashqan markami karqan. runakunata castigashaq.#Isa. 14.29-31; Jer. 47.1-7; Eze. 25.15-17; Joel 3.4-8; Amós 1.6-8; Sof. 2.4-7. 7Yawartashqa aytsata mikurkaykashqantapis shiminpitami qechushaq. Ïdulukunapaq kankashqan sacrificiuta mikurkaykaptinmi qechushaq.
<<Kawaykar quëdaq runakunaqa noqatana sirvimashpanmi Judá runakunanöna kanqapaq. Ecrón runakunaqa jebuseo#9.7 Jebuseo runakunaqa Jerusaléncho tarqan Israel runakuna tsaycho manaraq taptinmi. Jebuseo runakunata ushakätsinanpa trukanqa Israel runakuna kacharirqan paykunawan juntu tänanpaq. Tsaypita masta musyanaykipaq liyinki 2Sam. 5.6-7; 24.18; 1Rey. 9.20-21. runakunanömi kapäkunqa.
8<<Templüta pipis mana atacananpaq kikïmi tsapäshaq. Kuyashqä runakunata pipis mana nakatsinanpaq kikïmi rikashaq>>.
Siónman rey chayaptin alabashqan
9<<¡Sión runakuna, pasaypa kushikäriy!
¡Jerusalén runakuna, kushishqa cantapäkuy!#Sof. 3.14-15.
Rikapäkuy mandaqniki rey aywaykämuqta.
Paymi alilata ruraq salvashuqniki kaykan.
Humildi karmi bürrun muntashqa aywaykämun.
Manta bürrun muntashqami aywaykämun.#Mat. 21.5-6; Juan 12.14-15.
10<<Paymi Efraín runakunapa guërra carrëtankunatapis ushakätsinqa.
Jerusaléncho guërrapaq kaq cawallukunatapis ushakätsinqami.
Guërrata rurapäkunanpaq flëchankunatapis lapantami ushakätsinqa.
Paymi maytsay nacioncho taq runakunapaq ali kawayta apamunqa.
Lamarpa jukaq kuchunpita jukaq kuchunyaqmi kay patsacho taqkunata mandanqa.
Tsaynöpis mandanqa Éufrates mayupita kay patsa kuchunyaqmi.#Sal. 72.8.
11<<Jerusalén runakuna, yawarta jichar pactu rurashqantsita yarparmi yanapashaykipaq.#Éxo. 24.8; Mat. 26.28; Mar. 14.24; Heb. 9.20.
Yakuynaq jatun pözuchöno prësu kaykashqaykipitami jorqamushaykipaq.
12¡Jäpa nacioncho tarpis kutimuyta yarparqa nacionnikiman kutikamuyna!
Aläpa nakashqaykipita ishkay kuti mastami bendicionnïta churamushaq.
13Judá runakuna, flëcha arcünömi kankipaq.
Efraín runakuna, flëchänömi kankipaq.
Sión runakuna, espädänömi kankipaq.
Qamkunatami kachashayki Grecia runakunata munaynikiman churapäkunaykipaq>>.
14Kuyashqan runakunaman Tayta Dios shamurmi flëchankunatapis räyutanöraq contrankunaman jitanqa.
Munayniyuq Tayta Diosmi cornëtanta tukar sur kaq lädupita löcu wayrano shamunqa contrankunata ushakätsinanpaq.
15Kuyashqan runakunatami lapanta mandaq Tayta Dios tsapanqa.
Tsapaptinmi contrankuna warakarpis mana chayatsinqatsu.
Tsaymi kuyashqan runakuna kushikushpan shinkashqa runanöraq büllata rurapäkunqa.
Contrankunata wanutsirmi yawarninwan pichukärinqa.
Sacrificiupaq shuntashqan yawar tazoncho junta winaraykaqnömi y altarpa waqrankunacho yawar pichuraykaqnömi contrankunapa yawarninwan pichushqa kanqapaq.
16Tsay junaqqa Tayta Diosmi kuyashqan runakunata salvanqa.
Mitsikuq runa uyshankunata salvashqannömi paykunatapis salvanqa.
Kuyashqan runakunaqa corönacho kuyaylapaq adornunömi nacionnincho kanqapaq.
17Tashqan nacionmi maypis täkuypaq y kuyaylapaq kanqa.
Trïgupis y mushuq vïnupis atskami kanqa.
Tsaychömi olqu wamrakunapis y warmi wamrakunapis kuyaylapaq winapäkunqa.#Jer. 31.12.
Currently Selected:
Zacarías 9: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
