Lucas 9

Chunka ishkay discïpulunkunata Jesús kachashqan

Mateo 10.5-15; Marcos 6.7-13

1Tsaypitanami chunka ishkay discïpulunkunata qayaykur munayninta Jesús qorqan runakunapita supaykunata qarqunanpaq y qeshyaqkunata aliyätsinanpaq. 2Nirkurna paykunata kacharqan Tayta Dios mandaykashqan chayamushqanta wilakärinanpaq y qeshyaqkunata aliyätsinanpaqpis. 3Kachashpanmi kayno nirqan: <<Aywar ama apapäkunkitsu tukruykita, qepikita, mirkapaykita, qellaynikita, ni trukakunaykipaq röpaykitapis. 4Pipa wayiman patsakurpis tsay markapita aywakärishqaykiyaq tsaylacho patsaräkunki. 5May markachöpis mana chaskishuptikiqa chakikicho kaykaq polvuta tapshiriykur aywakärinki. Tsayno rurapäkunki Tayta Dios castigananpaq kashqanta tantiyakärinanpaq>>.

6Tsayno niptinmi discïpulunkuna markan markan aywar Tayta Diospa ali wilakuyninta wilakärirqan. Qeshyaqkunatapis maytsaychömi aliyätsirqan.

Jesústa Herodes reqiyta munashqan

Mateo 14.1-12; Marcos 6.14-29

7Jesús rurashqankunata mayaykurmi Galileapa mandaqnin Herodes pasaypa yarpachakuyman churakarqan. Wakin runakunaqa nipäkurqan Bautizaq Juan kawarimushqanta. 8Wakin nipäkurqan profëta Elías kashqanta. Wakinnami nipäkurqan unay profëtakuna mayqanpis kawarimushqanta. 9Tsaymi Herodes kayno nirqan: <<Juanpa umanta jorquykätsiptïqa ¿piraq kanman tsay runa? ¿Pipaqtaq wiyä imaykata rurashqantapis?>>

Tsayno nirmi Jesústa imanöpapis reqiyta munarqan.

Pitsqa waranqa runakuna mikupäkunanpaq milagruta Jesús rurashqan

Mateo 14.13-21; Marcos 6.30-44; Juan 6.1-14

10Wilakärishqanpita apostolkuna kutiykamurmi lapan rurashqanta Jesústa wilaparqan. Tsaypitanami paykunata pushakurkur Betsaida marka cercancho kaykaq chunyaqman Jesús aywarqan. 11Tsaypa aywapäkushqanta musyaykurmi qepanta atska runakuna aywapäkurqan. Chayaykuptinnami Tayta Dios mandaykashqanpita Jesús yachatsirqan y qeshyaqkunatapis aliyätsirqan.

12Tardiyaptinnami chunka ishkay discïpulunkuna Jesús kaqman aywaykur kayno nipäkurqan: <<Runakunata niy mikuyninkuna y posädankuna ashiq aywapäkunanpaq. Kay chunyaqchöqa manami imapis kantsu>>.

13Tsawraqa Jesús kayno nirqan: <<Qamkuna mikuyta qarapäkuy>>.

Tsayno niptinmi kayno nipäkurqan: <<Noqakunapaqa pitsqa tanta y ishkay pescädulami kaykan. Kaytsika runakunapaqqa ¡rantimur imaraqchi aypätsishwan!>>

14Tsaycho runakuna pitsqa waranqanömi (5,000) kaykarqan. Tsawraqa discïpulunkunata Jesús kayno nirqan: <<Runakunata pitsqa chunka kamala jamatsipäkuy>>.

15Niptinmi lapanta jamatsirqan. 16Tsaypitanami pitsqa tantata y ishkay pescäduta aptarkur jana patsata rikärishpan Tayta Diosta Jesús yusulpäki nirqan. Tantata pakirirnami discïpulunkunata makyarqan runakunata aypupäkunanpaq 17Saksashqanyaq mikurkuptinnami putsushqankunata chunka ishkay canasta juntata shuntapäkurqan.

Tayta Dios kachamushqan Cristo kashqanta Pedro nishqan

Mateo 16.13-19; Marcos 8.27-29

18Juk kutichömi discïpulunkunalawan kaykar Tayta Diosta Jesús manakurqan. Manakuyta usharkurmi discïpulunkunata tapurqan kayno nir: <<¿Pï kashqätataq runakuna nirkaykan?>>

19Tsawraqa discïpulunkuna nipäkurqan: <<Wakin nipäkun Bautizaq Juan kashqaykita. Wakinnami nipäkun profëta Elías kashqaykita. Y wakinnami nipäkun mayqan profëtapis kawarimushqa kashqaykita>>.

20Nipäkuptinmi yapay tapurqan: <<Qamkunaqa ¿pï kashqätataq yarpapäkunki?>>

Tsawraqa Pedro kayno nirqan: <<Qamqa Tayta Dios kachamushqan Cristumi kaykanki>>.

Wanutsinanpaq kashqanta Jesús wilakushqan

Mateo 16.20-28; Marcos 8.30—9.1

21Tsayno niptinmi discïpulunkunata Jesús nirqan pitapis mana wilapänanpaq.#9.21 Tsay witsan Israel runakuna yarparqan Cristuta Tayta Dios kachamuptin Roma runakunata guërracho vincinanpaq kashqantami. Tsayno yarpaptinpis Jesucristo manami guërrata rurananpaqtsu shamurqan, sinöqa noqantsi rayku cruzcho wanunanpaqmi. Tsaymi discïpulunkunata Jesús nirqan pay Cristo kashqanta pitapis mana wilapänanpaq. Wanushqanpita kawarirkamurmi itsanqa nirqan pïmaytapis wilapänanpaq (Mat. 17.9; 28.19). 22Nirkurmi kayno nirqan: <<Runapa Tsurintami pasaypa nakatsipäkunqa. Mayor runakuna, mandaq cürakuna y ley yachatsiqkunami contran sharkur wanutsipäkunqa. Tsaypita kimsa junaqtaqa kawarimunqami>>.

23Nirkurmi lapan runakunata kayno nirqan: <<Pipis discïpulü kayta munarqa kikin munashqanno ama kawatsuntsu, sinöqa waran waran cruzninta apaqno noqata qatirämätsun.#9.23 Jesucristo kawashqan witsanqa pipis cruzninta aparqan wanutsishqa kananpaqmi. Tsaymi cruzninta apaqno noqata qatirämätsun nirqa jutsa ruraypaq wanushqano kar Jesucristuta qatiränanpaq kashqanta niykan.#Mat. 10.38; Mar. 8.34; Luc. 14.27; Juan 12.25. 24Kawayninta salvayta munaqkunaqa kawayninta oqranqami. Kawayninta noqa rayku oqraqkunami itsanqa kawayninta salvanqa.#9.24 Tsayno nirqa Jesucristo kaynömi nirqan: <<Kikin munashqanno luta kawakuqkunaqa manami salvakunqatsu. Noqa munashqäno kawaqkunami itsanqa salvakunqa>>.#Mat. 10.39; Mar. 8.35; Juan 12.25.

25<<Infiernuman qaykushqa kananpaq kaptinqa ¿imapaqtaq välin intëru munduta munaynincho tsararashqanpis? 26Pipis noqapita y wilakuynïpita penqakuptinqa Runapa Tsurinpis Tayta Diospa, santu angilkunapa y kikinpa chipchipyayninwan shamurmi paypita penqakunqa. 27Rasunpami kayno nï: Manaraqpis wanurmi wakinniki rikapäkunki Tayta Dios mandaykashqanta>>.

Jesús chipchipyaykaq rikakushqan

Mateo 17.1-8; Marcos 9.2-8

28Tsaypita pusaq junaqtanönami Pedruta, Juanta y Santiaguta pushakurkur Tayta Diosta manakunanpaq juk jirkaman Jesús witsarqan. 29Tayta Diosta Jesús manakuykaptinmi qaqlanpis chipchipyarqan y röpanpis pasaypa yoraq rikakur chipchipyarqan. 30Tsaychömi Moisés y Elías Jesúswan parlarkaykarqan. 31Paykunapis chipchipyarraqmi Jerusaléncho Jesús wanunanpaq kashqanta parlarkaykarqan.

32Tsay hörami Pedro ishkay discïpulu mayinkunawan pasaypa pununarkaykashqanchömi rikapäkurqan Jesús chipchipyaykaqta y ishkay runakuna paywan kaykaqta. 33Moisés y Elías aywakurkaykaptinmi mana yarpachakuypa Jesústa Pedro kayno nirqan: <<Alipaqmi kaycho karkaykä, tayta. Kimsa tsuklata rurapäkushaq: jukta qampaq, jukta Moiséspaq y jukta Elíaspaq>>.

34Tsayno parlaykaptinmi pukutay tsapakurkurqan. Tsaymi discïpulukuna fiyupa mantsakarqan. 35Tsawraqa pukutay rurinpitami Tayta Dios kayno nimurqan: <<Paymi akrashqä#9.35 Wakin griego copiakunachöqa kuyay ninmi. Tsurï. Pay nishushqaykita wiyakäriy>>.

36Tsayno parlayta usharkuptinnami discïpulunkuna Jesúslatana rikapäkurqan. Jirkacho rikashqantaqa manami pitapis tsay witsan wilaparqantsu.

Juk mözuta Jesús aliyätsishqan

Mateo 17.14-21; Marcos 9.14-29

37Tsaypita jukaqnin junaqnami jirkapita kutirkaykämuptin atska runakuna Jesústa tariparqan. 38Tsay runakunapa chawpinpitami juk runa kayno qayakamurqan: <<¡Rabí, kay tsurïta kuyapaykulay! Pay japalanmi tsurï kaykan. 39Supaymi payta elaqpita qaparätsin, fiyupa siksikyätsin, poqshaytapis aqtutsin. Mana kachaypami pasaypa nakatsin. 40Tsaymi supayta qarqunanpaq discïpuluykikunata ruwakuptïpis mana kamäpakushqatsu>>.

41Tsaymi Jesús kayno nirqan: <<¡Yärakuyniynaq jutsasapa runakuna! ¡Imayyaqraq qamkunawan kaykäshaq! ¡Imayyaqraq qamkunata awantashayki! Mä tsurikita apamuy>>.

42Tsawraqa Jesúspa nawpanman chayaykätsiptin wamrata pampaman supay saqtariykur fiyupa siksikyätsirqan. Tsayta rikaykur supayta Jesús olqüpaptinmi wamrapita yarqurqan. Yarquptinmi wamrata aliyashqatana papäninta janchaparkurqan. 43Tayta Diospa munayninwan aliyätsishqanta rikaykurmi lapan runakuna kushikärirqan.

Wanutsinanpaq kashqanta Jesús yapay wilakushqan

Mateo 17.22-23; Marcos 9.30-32

Rurashqankunata rikaykur runakuna kushikäriptinmi discïpulunkunata Jesús kayno nirqan: 44<<Shumaq tantiyakäriy. Runapa Tsurinta chikiqninkunapa makinmanmi entreganqa>>.

45Tsayno wilaptinpis discïpulunkuna manami tantiyarqantsu imata niykashqantapis. Mana tantiyarpis tapuytami itsanqa mantsakärirqan.

Mayqan mas mandaq kananpaqpis discïpulukuna tapushqan

Mateo 18.1-5; Marcos 9.33-37

46Tsaypitanami discïpulunkuna mas mandaq kayta munar kikinpura rimanakuykarqan. 47Shonquncho imata yarpashqantapis musyarmi juk wamrata nawpanman ichiykatsir 48Jesús kayno nirqan: <<Pipis kay wamratano jutïcho chaskirqa noqatapis chaskiykämanmi. Noqata chaskimarqa kachamaqnïtapis chaskiykanmi. Qamkunachöpis mas humildi kaqmi mas mandaq kanqa>>.

Supayta qarquptin mana michänanpaq Jesús tantiyatsishqan

Marcos 9.38-40

49Tsayno niptinmi Juan kayno nirqan: <<Tayta, noqakuna rikapäkushqä juk runa jutikicho supaykunata qarquykaqta. Noqantsiwan mana puriptinmi michäpäkushqä>>.

50Tsawraqa Jesús kayno nirqan: <<Ama michankitsu. Pipis contrantsi mana karqa favornintsimi kaykan>>.

Santiaguta y Juanta Jesús olqüpashqan

51Jana patsaman kutikunanpaq walkalana pishiptinmi mana mantsakuypa Jerusalénman Jesús aywarqan. 52Aywaykashqanchömi kacharqan Samaria particho juk markaman posäda ashiq. 53Jerusalénpa aywaykashqanta musyarmi tsay markacho runakuna patsatsiyta mana munapäkurqantsu. 54Tsaymi discïpulunkuna Santiago y Juan kayno nipäkurqan: <<Tayta, jana patsapita nina shamur kay runakunata ushakätsinanpaq ¿Tayta Diosta [Elíasno] manakärïmanku?>>

55Tsawraqa Jesús olqüparqan [kayno nir: <<Tsayno yarparqa manami Tayta Dios munashqannötsu yarparkaykanki. 56Runapa Tsurinqa manami runakunata ushakätsinanpaqtsu shamushqa, sinöqa runakunata salvananpaqmi>>.]

Tsaypitanami juk markapana aywakärirqan.

Paywan puriyta munaqkunata Jesús tantiyatsishqan

Mateo 8.19-22

57Nänipa aywarkaykaptinmi Jesústa juk runa kayno nirqan: <<Maypa aywaptikipis qatiräshaykimi, tayta>>.

58Tsayno niptinmi Jesús kayno nirqan: <<Atuqkunapaqa machayninkuna kanmi. Pishqukunapapis qeshwankuna kanmi. Runapa Tsurinpami itsanqa maycho punuykunalanpaqpis mana kantsu>>.

59Tsaypitanami juk runata kayno nirqan: <<Qatirämay>>.

Niptin kayno nirqan: <<Qatiränäpaq papänïtaraq puntata pampaykamushaq, tayta>>.

60Tsawraqa Jesús kayno nirqan: <<Wanushkunataqa wanushqa mayinkuna pampakäritsun. Qamqa Tayta Dios mandaykashqanta wilakur puriy>>.

61Tsaynömi juk runapis nirqan: <<Qatiräshaykimi, tayta. Itsanqa wayïcho kaqkunataraq wilaykamushaq>>.

62Tsawraqa Jesús kayno nirqan: <<Pipis qepapa rikaraykar yuntawan aruqno karqa Tayta Dios mandaykashqanpaq manami sirvintsu>>.

Currently Selected:

Lucas 9: qvmB

Highlight

Copy