Lucas 8

Jesústa yanapaq warmikuna

1Tsaypitanami chunka ishkay discïpulunkunawan markan markan Jesús purir Tayta Dios mandaykashqanpa ali wilakuyninta wilakurqan. 2Paykunawanmi aywapäkurqan supaypa munayninpita jorqushqan warmikuna y qeshyashqanpita aliyätsishqan warmikunapis. Tsaynöpis aywarqan Magdalena nipäkushqan María. Paypitami qanchis supaykunata Jesús qarqurqan. 3Tsaynöpis aywapäkurqan Herodespa yanapaqnin Chuzapa warmin Juana, Susana y wakin warmikunapis. Paykunami Jesústa y discïpulunkunata gastunkunapaq kamariparqan.

Diospa wilakuyninta muruman Jesús tinkutsishqan

Mateo 13.1-9; Marcos 4.1-9

4Maytsay markakunapita atska runakuna juntakaptinmi Jesús wilaparqan kayno nir: 5<<Juk runashi trïgu muruq aywarqan. Muruta matsiptinshi näniman wakin chayarqan. Tsaytashi runakuna jarukurqan y pishqukunapis upshakurkurqan. 6Wakin kaq murushi shalaman chayarqan. Tsaycho jeqamurpis alpa mana kaptinshi tsakikäkurqan. 7Wakin kaq murushi kashakuna rurinman chayarqan. Jeqarkamurpis kashakuna nitiptinshi qarwashtaykälar wanurqan. 8Wakin kaq murunashi itsanqa ali alpaman chayarqan. Tsaykunaqa ali winarkurshi cada espïgacho pachak (100) trïguta wayurqan>>.

Tsayno yacharkatsirmi Jesús qayaraypa kayno nirqan: <<¡Rinriyuq kaqkunaqa nishqäkunata wiyakäritsun!>>

Tinkutsiypa imanir Jesús yachatsishqan

Mateo 13.10-15; Marcos 4.10-12

9Tsaypitanami discïpulunkuna Jesústa tapurqan kayno nir: <<Tayta, ¿ima ninantaq tsay tinkutsiypa yachatsishqayki?>>

10Tsawraqa Jesús kayno nirqan: <<Qamkunataqa Tayta Dios mandaykashqan imano kashqantapis shumaqmi tantiyatsishayki. Wakin runakunatami itsanqa imamanpis tinkutsiypa wilapaykä. Tsaymi rikaykarpis cuentata qokärintsu y wiyaykarpis tantiyapäkuntsu>>.#Isa. 6.9-10.

Muruman tinkutsishqanta Jesús tantiyatsishqan

Mateo 13.18-23; Marcos 4.13-20

11<<Tinkutsiypa wilapashqäta kanan tantiyatsishayki. Trïgu muruqa kaykan Tayta Diospa wilakuyninmi.

12<<Wakin runakunaqa chukru näninömi kaykan. Tayta Diospa wilakuyninta mayaptinpis diablu shamurmi wiyashqalantapis qonqaykatsin. Tsaymi mana criyishpan salvakärintsu.

13<<Wakin runakunaqa shalanömi kaykan. Tsaymi Tayta Diospa wilakuyninta mayar kushishqa chaskikurpis shumaq mana sapitsashqa yörano kar nakaykuna chayaptin qepaman kutikärin.

14<<Wakin runakunaqa kasha kasha chakranömi kaykan. Tsaymi Tayta Diospa wilakuyninta mayarpis yarpachakärin imanöpis kawanalanpaq, rïcu kanalanpaq y kikinkuna munashqanno kawanalanpaq. Tsayno karmi mana wayuq trïguno karkaykan.

15<<Wakin runakunami itsanqa ali alpano kaykan. Tsaymi Tayta Diospa wilakuyninta lapan shonqunwan kushishqa chaskikur Tayta Dios munashqanno kawapäkun. Ali alpacho muru winarkamur shumaq wayushqannömi imaypis kawapäkun>>.

Wilakuyninta atskiman Jesús tinkutsishqan

Marcos 4.21-25

16<<Manami pipis atskita ratarkatsir manka rurinman ni kawitu rurinman churantsu, sinöqa wayiman yaykuqkuna rikapäkunanpaq alayrinninmanmi churan.#Mat. 5.15; Mar. 4.21. 17Tsaynömi yachatsishqäkuna kanan pakaraykaqno karpis musyakanqapaq. Kanan mana tantiyakarpis wara warantinkunaqa tantiyakanqami.#Mar. 4.22. 18Tsayno kaptinqa shumaq mayapäkamay. Yachatsishqäta cäsukuqkunaqa masmi tantiyakärinqa. Mana cäsukuqkunami itsanqa tantiyashqalantapis qonqaykärinqa>>.#Mat. 13.12; 25.29; Mar. 4.25.

Jesúspa maman y wawqinkuna pï kashqanpis

Mateo 12.46-50; Marcos 3.31-35

19Tsaypitami Jesúspa maman y wawqinkuna chayarqan Jesús kaykashqan wayiman. Atska runakuna kaptinmi yaykuyta mana kamäpakurqantsu. 20Tsaymi juk runa Jesústa wilarqan kayno nir: <<Mamayki y wawqikikunami punkucho shuyarpaykäshunki>>.

21Tsayno niptinmi Jesús kayno nirqan: <<Pipis Tayta Diospa wilakuyninta wiyar cäsukuq kaqmi mamäqa y wawqïkunaqa karkaykan>>.

Wayrapaqpis yakupaqpis Jesús munayniyuq kashqan

Mateo 8.23-27; Marcos 4.35-41

22Juk junaqmi discïpulunkunawan büquiman witsarkur Jesús kayno nirqan: <<Wak tsimpaman pasashun>>.

Tsayno niptinmi büquiwan aywapäkurqan. 23Qochata tsimparkaykaptinmi Jesús punukäkurqan. Tsayyaqmi fiyupa wayrawan yaku pulchaqyar büquita talpukätsinanpaqna kaykarqan. 24Tsaymi Jesústa rikchatsir kayno nipäkurqan: <<¡Rabí, rabí! ¡Talpukaykantsinami!>>

Tsawraqa Jesús sharkurkur wayrata y yakuta olqüparqan. Olqüpaptinmi wayrapis yakupis chawarqan. 25Tsaypitanami discïpulunkunata kayno nirqan: <<¿Imanirtaq yärakuynikikuna kantsu?>>

Tsawraqa mantsakashqa kikinpura kayno nipäkurqan: <<Yakupis wayrapis tsayno cäsunanpaqqa ¡pitaq kay runaqa!>>

Supaykuna löcuyätsishqan runata Jesús aliyätsishqan

Mateo 8.28-34; Marcos 5.1-20

26Tsaypita Gerasa#8.26 Wakin griego copiakunachöqa Gadara ninmi. Wakinnami Gergesa nipäkun. nishqan partiman chayapäkurqan. Tsayqa kaykan Galileapa tsimpanchömi. 27Büquipita Jesús urarpuptinmi supaykuna löcuyätsishqan runa shamurqan. Tsay runaqa nawpapita patsami qarapächula purikurqan. Wayicho tänanpa trukanqa panteonlachömi tarqanpis. 28Jesústa rikaykurmi fiyupa qaparashpan nawpanman lätakuykur fuertipa kayno nirqan: <<¡Munayniyuq Diospa Tsurin Jesús! ¡Imatataq noqawan munanki! ¡Ama nakaykatsilämaytsu!>>

29(Tsayno supay nirqan runapita yarqunanpaq Jesús nishqa kaptinmi. Tsay runataqa atska kutimi munashqanta supay ruratsirqan. Tsaymi makipita y chakipita cadinawan watapäkuptinpis rachirir chunyaq jirkakunaman aywakuq.)

30Tsaypitami Jesús kayno tapurqan: <<¿Imataq jutiki?>>

Tapuptinmi kayno nirqan: <<Legión>>.#8.30 Legión ninanqa atska waranqa ninanmi.

(Tsayno nirqan atska supaykuna payman yaykushqa kaptinmi.)

31Tsay supaykunami Jesústa yaparir yaparir ruwakärirqan yanawyaykaq tsakayman mana qarpunanpaq. 32Washa lädu jirkanchömi tsaytsika kuchikunata mitsirkaykarqan. Tsaymi supaykuna Jesústa ruwakärirqan kuchikunaman yaykapäkunanpaq. Ruwakushqanta Jesús awniptinmi 33supaykuna runapita yarqurir tsay kuchikunaman yaykukuykurqan. Tsawraqa kuchikuna löcutar tunapa cörrikachashpan qochaman jeqakurpurqan. Tsaychömi shenqaypa wanupäkurqan.

34Tsayta rikaykurmi kuchi mitsiqkuna warakayla aywapäkurqan markacho y cercancho taq runakunata wilapäkunanpaq. 35Wilaptinmi runakuna shapäkamurqan ima pasashqantapis rikananpaq. Jesús kaykashqanman chayashpanmi tsay löcuyashqa runata taripäkurqan röpan jatishqana y yarpayninchöna Jesúspa nawpancho jamaraykaqta. Tsayta rikaykurmi mantsakashqa rikakärirqan.

36Jesús aliyätsishqanta rikaqkunanami tsayman chayaqkunata wilarqan imanöpa aliyashqantapis. 37Tsaymi tsay particho taq runakuna pasaypa mantsakashpan Jesústa ruwakärirqan tsaypita aywakunanpaq. Tsawraqa büquiman witsarkur discïpulunkunawan Jesús aywakurqan.

38Manaraq aywakuptinmi aliyaq runa Jesústa ruwakurqan paywan aywakunanpaq. Tsawraqa Jesús kayno nirqan: 39<<Wayikipa kutiykur Tayta Dios aliyätsishushqaykita wilakuy>>.

Tsayno niptinmi aywar Jesús aliyätsishqanta pïmaytapis wilaparqan.

Jairupa tsurinta kawaritsimushqan y warmita aliyätsishqan

Mateo 9.18-26; Marcos 5.21-43

40Qocha wak tsimpanman Jesús kutiptinmi shuyarpaykaq atska runakuna kushishqa chaskikärirqan. 41Tsaymanmi chayarqan sinagögacho mandaq Jairo jutiyuq runa. Paymi Jesúspa nawpanman qonqurpakuykur ruwakurqan wamranta aliyätsiq wayinman aywananpaq. 42Tsay tsurinqa chunka ishkay watayuqno juklayla warmi tsurinmi karqan. Paymi pasaypa antsa qeshyaykarqan.

Jairupa wayinman Jesús aywaptinmi tsaytsika runakuna kichkiyparaq qatirparqan. 43Tsay runakunawanmi chunka ishkay watana yawar apaywan qeshyaykaq warmipis aywaykarqan. [Jampikunanpaqmi imaykantapis rantikur usharqan.] Manami ni pï jampiptinpis aliyarqantsu. 44Tsay warmi Jesúspa qepalanpa yaykuykur röpanpa kuchunta yataykuptinmi jinan höra yawar apaynin chawarqan. 45Tsawraqa Jesús kayno nirqan: <<¿Pitaq yataykamashqa?>>

Niptinmi lapanpis kayno nirqan: <<Manami noqa yatashqätsu>>.

Tsawraqa Pedro kayno nirqan: <<Kichkimi aywaykantsi, tayta. [¿Imanöparaq musyapäküman mayqan yataykushushqaykitapis?]>>

46Tsayno niptinpis Jesús yapay nirqan: <<Pï karpis yatamashqami. Munaynï yarqushqantami mayashqä>>.

47Yatashqanta tantiyaptinmi tsay warmi mantsakashqa siksikyaykar Jesúspa nawpanman qonqurpakuykurqan. Nirkurmi lapan runakunapa nawpancho wilarqan imanir yataykushqanta y jinan höra aliyashqanta. 48Tsawraqa Jesús kayno nirqan: <<Yärakamashqaykipitami aliyashqanki, hïja. Kananqa kushishqana aywakuy>>.

49Jesús tsayno parlaykaptinraqmi Jairupa wayinpita wilakuq taripaykur kayno nirqan: <<Tayta, tsuriki wanushqanami. Jesústa amana pushaynatsu>>.

50Tsayno niqta mayaykurmi Jesús kayno nirqan: <<Ama lakikuytsu. Tayta Diosman yärakuy. Tsurikiqa kawarimunqami>>.

51Wayiman chayaykurnami Jesús yaykatsirqan Pedruta, Juanta, Santiaguta y Jairutapis warmintinta. Wakin kaq runakuna yaykunantaqa manami munarqantsu. 52Wamra wanushqa kaptinmi waqtacho runakuna fiyupa waqarkaykarqan. Tsawraqa Jesús kayno nirqan: <<Ama waqapäkuytsu. Manami wanushqatsu, sinöqa punuykanlami>>.

53Tsayno niptinmi wanushqa kaykashqanta musyar runakuna Jesústa asiparqan. 54Tsaypitanami wanushqa kaykaqpa makinpita tsarirkur Jesús kayno nirqan: <<¡Wamra, sharkuy!>>

55Tsayno niptin jinan höra kawarirkamur sharkurqan. Tsawraqa Jesús kayno nirqan: <<Kay wamrata mikuyta qaray>>.

56Wamra kawarimushqanta rikaykur maman y taytan pasaypa kushikärirqan. Itsanqa kawaritsimushqanta pitapis wilapänanta Jesús manami munarqantsu.

Currently Selected:

Lucas 8: qvmB

Highlight

Copy