Lucas 6:27-49

<<Mayamaqkuna, qamkunatami kayno nï: Chikishuqnikikunata kuyapäkunki. Contrayki sharkuqkunatapis ali rikapäkunki. Ashlishuptikipis ali shimilaykipa parlapanki. Manakaqta tumpashuptikipis Tayta Diosta paykunapaq manakunki. Laqyashuptikiqa jukaq qaqlaykita kamapanki. Punchuykita qechushuptikiqa chompaykitapis loqtiparinki. Imata manakushuptikipis qoykunki. Imaykita qechushuptikipis kachaparinki. Imanömi runa mayiki ali rikashunaykita munanki, tsaynöla qamkunapis runa mayikita ali rikapäkunki. <<Kuyanakushqalaykiwan kuyanakurqa ¿ima alitataq rurarkaykanki? Jutsasapa runakunapis kuyanakushqalanwanqa kuyanakärinmi. Ali kaqkunalawan ali kawarqa ¿ima alitataq rurarkaykanki? Jutsasapa runakunapis tsaynölaqa kawapäkunmi. Imatapis chaskinayki kashqalaqa manarqa ¿alitatsuraq ruraykanki? Jutsasapa runakunapis tsaynölaqa imatapis manaykunmi. <<Qamkunaqa chikishuqnikikunata kuyapäkuy. Paykunawan ali kawapäkuy. Imatapis manarqa ama cobrapäkuytsu. Tsayno kawashqaykipitami Tayta Dios premiuta qoshunkipaq. Payqa mana kuyakuq runakunata y fiyu runakunatapis kuyapanmi. Tsaymi qamkunapis kuyapäkuq karqa munayniyuq Tayta Diospa wamran karkaykanki. Taytayki kuyapäkuq kashqanno qamkunapis kuyapäkuq kapäkuy. <<Tayta Dios mana juzgashunaykipaq runa mayikita ama juzgaytsu. Tsaynöpis manakaqman mana churashunaykipaq manakaqman ama churaytsu. Runa mayikita perdonaptikiqa qamkunatapis Tayta Dios perdonashunkimi. Ali runa kaptikiqa Tayta Dios qamkunatapis jichay jichayta lipay lipaytami qoshunkipaq. Melqayniki juntatami melqapäshunkipaq. Runa mayikita imanöpis yanapashqaykiman tupumi qamkunatapis Tayta Dios yanapashunkipaq>>. Tsaynöpis tinkutsiypa yachatsirmi Jesús kayno nirqan: <<¿Qapra runa qapra mayinta pushanmantsuraq? Pusharqa ¿manatsuraq pözuman ishkan jeqanqa? Mayqan yachakuqpis manami yachatsiqninpita mastaqa yachantsu. Tsayno kaptinpis yachakurqa yachatsiqninnömi kanqa. <<Nawikicho jatunkaray qeru jatiraykaptinqa ¿imanirtaq runa mayikipa nawincho taksha oqsha jatiraykaqta rikaparkaykanki? Nawikicho jatunkaray qeru jatiraykaptinqa ¿imanöparaq kayno ninkiman: <Nawikipita oqshata jorqapäshayki>? ¡Ishkay cära runakuna! Puntataqa nawikicho kaykaq qerutaraq jorquy. Tsayraqmi shumaq rikankipaq runa mayikipa nawinpita oqshata jorqupänaykipaq. <<Ali yöraqa manami mana alita wayuntsu. Tsaynölami mana ali yörapis alitaqa mana wayuntsu. Wayuyninpami ima yöratapis reqintsi. Manami kashakunapitatsu hïgusta palantsi ni shirakakunapitatsu üvata palantsi. Ali runaqa shonqun alita yarpashqantami parlan y fiyu runaqa shonqun mana alita yarpashqantami parlan. Runaqa shonqun yarpashqantami alitapis o mana alitapis parlan. <<Yachatsishqäta mana cäsukuykarqa ¿imanirtaq <Patronnïmi kanki> nipäkamanki? Nishqäkunata cäsukamaqkuna imano kashqantapis kanan yachatsishayki. Juk runashi wayita sharkatsinanpaq qaqaman chayananyaq oqtiykur cimientuta perqarqan. Tsawraqa qaqa janancho shumaq perqashqa kaptinshi cargashqa mayu chayarpis tsay wayita mana juchutsirqantsu. Juk runanashi cimientuta mana perqaylapa aquysha janalancho wayita sharkatsirqan. Tsayno kaptinshi cargashqa mayu aywar tsay wayita jukla juchuratsirqan. Tsayshi pasaypa kuyapaypaq karqan. Tsaynölami nishqäkunata mana cäsukamaq runapis kanqa>>.