Lucas 6

Jamay junaqpaq Jesús munayniyuq kashqan

Mateo 12.1-8; Marcos 2.23-28

1Jamay junaqchömi discïpulunkunawan Jesús pasarkaykarqan trïgu poquraykaq chakrakunapa. Tsaypa pasarmi discïpulunkuna trïguta palarkur kuparishpan uchupäkurqan. 2Tsayta rikarmi fariseukuna kayno nipäkurqan: <<¿Imanirtaq jamay junaq kaykaptin leynintsita mana cäsukur trïguta palarkaykanki?>>

3Tsaymi Jesús nirqan: <<¿Manaku imaypis liyipäkushqanki David yanapaqninkunawan mikanar imata rurashqantapis? 4Davidshi Tayta Diospa wayinman yaykuykur Diospaq churaraykaq tantata mikurqan.#1Sam. 21.1-6. Tsaynölashi yanapaqninkunatapis qararqan. Tsay tantaqa manami Davidpaq ni paywan kaykaq runakuna mikunanpaqtsu karqan, sinöqa cürakunalapaqmi>>.#Lev. 24.9.

5Nirkur Jesús kayno nirqan: <<Runapa Tsurinqa jamay junaqpaqpis munayniyuqmi kaykan>>.

Makin wanushqa runata jamay junaqcho Jesús aliyätsishqan

Mateo 12.9-14; Marcos 3.1-6

6Tsaypita juk jamay junaqmi sinagögaman yaykur Jesús yachatsirqan. Tsaychömi alawqa kaq makin wanushqa runapis kaykarqan. 7Tsayta rikarmi ley yachatsiq runakuna y fariseukuna Jesústa rikaparkaykarqan jamay junaqcho aliyätsiptinqa tsay achäquila contran sharkapäkunanpaq.

8Tsayno yarpaykashqanta musyarmi makin wanushqa runata Jesús kayno nirqan: <<Sharkurkur runakunapa nawpanman ichiy>>.

Tsayno niptinmi tsay runa ichirkurqan. 9Nirkurna runakunata Jesús tapurqan: <<Kanan mä nipäkamay. Jamay junaqcho ¿ali kaqtaku o mana ali kaqtaku rurashwan? Runa mayintsita ¿salvashwanku o <wanukutsunpis> nishwanku?>>

10Tsaypita tsaycho kaykaq runakunata rikärishpan makin wanushqa runata kayno nirqan: <<¡Makikita joqariy!>>

Joqarkuptinmi makin aliyashqana rikakurqan. 11Tsaypitanami fariseukuna fiyupa rabyakur Jesústa acusananpaq wilanakärirqan.

Chunka ishkay apostolninkunata Jesús akrashqan

Mateo 10.1-4; Marcos 3.13-19

12Tsaypitanami jirkaman aywaykur Tayta Diosta manakuykar Jesús wararqan. 13Patsa wararkuptinnami discïpulunkunata qayaykur chunka ishkayta akrarqan apostolninkuna kananpaq. 14Paykunami karqan Simón (paytami jutinta churaparqan Pedro jutin kanapaq), Simónpa wawqin Andrés, Santiago, Juan, Felipe, Bartolomé, 15Mateo, Tomás, Alfeupa tsurin Santiago, Zelote nishqan Simón, 16Santiagupa tsurin Judas y Judas Iscariote. Paymi Jesústa rantikurqan.

Atska runakunata Jesús aliyätsishqan

Mateo 4.23-25

17Apostolninkunawan jirkapita Jesús urämurnami pampacho tarirqan atska discïpulunkunawan tsaytsika runakuna juntaraykaqta. Tsay runakunami shamushqa karqan intëru Judea provinciapita, Jerusalénpita y lamar kuchuncho kaykaq Tiro y Sidón markakunapita. Tsayman paykuna juntakarqan Jesús yachatsishqanta mayayta munar y qeshyaykashqanpita aliyayta munarmi. 18Tsaychömi supay nakatsishqan runakunatapis Jesús aliyätsirqan. 19Lapan runakunata munayninwan aliyätsiptinmi pïmaypis Jesústa yataylapis yatayta munapäkurqan.

Kushikunanpaq y lakikunanpaq Jesús wilashqan

Mateo 5.1-12

20Discïpulunkunata rikärirmi Jesús kayno nirqan: <<Waktsakuna, kushishqami kawapäkunki. Qamkunapaqmi Tayta Dios mandaykashqan kaykan.

21<<Mikanaqkuna, kushishqami kawapäkunki. Qamkunaqa manami mikanankipaqnatsu.

<<Waqaqkuna, kushishqami kawapäkunki. Qamkunaqa manami lakikärinkipaqnatsu.

22<<Kushishqami kawapäkunki Runapa Tsurinta chaskikushqaykipita chikishuptikipis, qarqushuptikipis, ashlishuptikipis y manakaqman churashuptikipis. 23Tsayno kaptinpis kushikäriy. Qamkunapaqmi gloriacho Tayta Dios premiuta mayna kamarishqa. Qamkunatanömi chikishuqnikikunapa unay aylunkunapis Tayta Diospa profëtankunata nakatsipäkurqan>>.

24<<¡Wawalaw, rïcukuna! Qamkunaqa kay patsalachömi kushikurkaykanki.

25<<¡Wawalaw, saksashqa kawaqkuna! Qamkunaqa yarqanankimi.

<<¡Wawalaw, kay patsacho kushishqala kawaqkuna! Qamkunaqa fiyupa lakikurmi waqapäkunkipaq.

26<<¡Wawalaw, lapan runapita alabashqa kaqkuna! Qamkunatanölami lula profëtakunatapis unay ayluykikuna alabarqan.

Chikimaqnintsita kuyanantsipaq Jesús yachatsishqan

Mateo 5.38-48; 7.12

27<<Mayamaqkuna, qamkunatami kayno nï: Chikishuqnikikunata kuyapäkunki. Contrayki sharkuqkunatapis ali rikapäkunki. 28Ashlishuptikipis ali shimilaykipa parlapanki. Manakaqta tumpashuptikipis Tayta Diosta paykunapaq manakunki. 29Laqyashuptikiqa jukaq qaqlaykita kamapanki. Punchuykita qechushuptikiqa chompaykitapis loqtiparinki. 30Imata manakushuptikipis qoykunki. Imaykita qechushuptikipis kachaparinki. 31Imanömi runa mayiki ali rikashunaykita munanki, tsaynöla qamkunapis runa mayikita ali rikapäkunki.

32<<Kuyanakushqalaykiwan kuyanakurqa ¿ima alitataq rurarkaykanki? Jutsasapa runakunapis kuyanakushqalanwanqa kuyanakärinmi. 33Ali kaqkunalawan ali kawarqa ¿ima alitataq rurarkaykanki? Jutsasapa runakunapis tsaynölaqa kawapäkunmi. 34Imatapis chaskinayki kashqalaqa manarqa ¿alitatsuraq ruraykanki? Jutsasapa runakunapis tsaynölaqa imatapis manaykunmi.

35<<Qamkunaqa chikishuqnikikunata kuyapäkuy. Paykunawan ali kawapäkuy. Imatapis manarqa ama cobrapäkuytsu. Tsayno kawashqaykipitami Tayta Dios premiuta qoshunkipaq. Payqa mana kuyakuq runakunata y fiyu runakunatapis kuyapanmi. Tsaymi qamkunapis kuyapäkuq karqa munayniyuq Tayta Diospa wamran karkaykanki. 36Taytayki kuyapäkuq kashqanno qamkunapis kuyapäkuq kapäkuy.

Runa mayintsita mana jamurpänantsipaq Jesús nishqan

Mateo 7.1-5, 17-20; 12.34-35

37<<Tayta Dios mana juzgashunaykipaq runa mayikita ama juzgaytsu. Tsaynöpis manakaqman mana churashunaykipaq manakaqman ama churaytsu. Runa mayikita perdonaptikiqa qamkunatapis Tayta Dios perdonashunkimi. 38Ali runa kaptikiqa Tayta Dios qamkunatapis jichay jichayta lipay lipaytami qoshunkipaq. Melqayniki juntatami melqapäshunkipaq. Runa mayikita imanöpis yanapashqaykiman tupumi qamkunatapis Tayta Dios yanapashunkipaq>>.#Mat. 7.2.

39Tsaynöpis tinkutsiypa yachatsirmi Jesús kayno nirqan: <<¿Qapra runa qapra mayinta pushanmantsuraq? Pusharqa ¿manatsuraq pözuman ishkan jeqanqa?#6.39 Jesucristo tsayno nirqan jamurpäkuq runata qapraman tinkutsishpanmi. 40Mayqan yachakuqpis manami yachatsiqninpita mastaqa yachantsu. Tsayno kaptinpis yachakurqa yachatsiqninnömi kanqa.#6.40 Tsayno yachatsirmi Jesucristo kayno nirqan: Yachatsishuqniki jamurpäkuq kaptinqa qampis jamurpäkuq kaytami yachakunkipaq.

41<<Nawikicho jatunkaray qeru jatiraykaptinqa ¿imanirtaq runa mayikipa nawincho taksha oqsha jatiraykaqta rikaparkaykanki? 42Nawikicho jatunkaray qeru jatiraykaptinqa ¿imanöparaq kayno ninkiman: <Nawikipita oqshata jorqapäshayki>? ¡Ishkay cära runakuna! Puntataqa nawikicho kaykaq qerutaraq jorquy. Tsayraqmi shumaq rikankipaq runa mayikipa nawinpita oqshata jorqupänaykipaq.#6.42 Kay textuchömi runa mayintsipa jutsankunata tinkutsin nawincho kaykaq oqshaman. Kikintsipa jutsantsitanami tinkutsin nawintsicho kaykaq qeruman. Nawintsipita qeruta jorqunantsipaq nirqa jutsantsikunata kacharinantsipaqmi niykan. Tsaynöpami tantiyatsimantsi jukta jamurpänantsipa trukan kikintsipa jutsantsikunata kacharinantsipaq kashqanta.

43<<Ali yöraqa manami mana alita wayuntsu. Tsaynölami mana ali yörapis alitaqa mana wayuntsu. 44Wayuyninpami ima yöratapis reqintsi. Manami kashakunapitatsu hïgusta palantsi ni shirakakunapitatsu üvata palantsi. 45Ali runaqa shonqun alita yarpashqantami parlan y fiyu runaqa shonqun mana alita yarpashqantami parlan. Runaqa shonqun yarpashqantami alitapis o mana alitapis parlan.

Cäsukuq runa y mana cäsukuq runa imano kashqanpis

Mateo 7.24-27

46<<Yachatsishqäta mana cäsukuykarqa ¿imanirtaq <Patronnïmi kanki> nipäkamanki? 47Nishqäkunata cäsukamaqkuna imano kashqantapis kanan yachatsishayki. 48Juk runashi wayita sharkatsinanpaq qaqaman chayananyaq oqtiykur cimientuta perqarqan. Tsawraqa qaqa janancho shumaq perqashqa kaptinshi cargashqa mayu chayarpis tsay wayita mana juchutsirqantsu. 49Juk runanashi cimientuta mana perqaylapa aquysha janalancho wayita sharkatsirqan. Tsayno kaptinshi cargashqa mayu aywar tsay wayita jukla juchuratsirqan. Tsayshi pasaypa kuyapaypaq karqan. Tsaynölami nishqäkunata mana cäsukamaq runapis kanqa>>.

Currently Selected:

Lucas 6: qvmB

Highlight

Copy