1 Pedro 2
2
1Jesucristupa wilakuyninta chaskikushqana kaykarqa jutsa ruraykunata kachariyna. Ama lulakäriytsu, ama ali tukäriytsu, ama chikinakäriytsu ni pipa wasanta rimapäkuytsu. 2Iti wamra chuchunashqanno qamkunapis Tayta Diospa palabranta imaypis yachakäriy. Tsaynöpami wamra winar tantiyakushqanno Tayta Dios munashqanno kawapäkunaykipaq tantiyakärinki. Tsaypaqmi Tayta Dios salvashushqanki. 3Tsayno yachakärinaykipaqmi Tayta Dios kuyakuq kashqanta tantiyapäkushqankina.#Sal. 34.8.
Cimientucho alinnin rumino Jesucristo kashqan
4Jesucristuta manakaqman churapäkuptinpis cimientucho alinnin rumino kananpaqmi Tayta Dios churashqa. Tsayno kaykaptinqa Jesucristuman yärakäriy. 5Qamkunapis rumino kaptikimi Tayta Dios churaykäshunki templun kapäkunaykipaq y payta sirviq santu cürakuna kapäkunaykipaq. Tsaymi altarman churashqa sacrificiuno kashpantsi lapan shonquykiwan payta sirvipäkuy. Jesucristupa yanapayninwan sirvirmi Tayta Dios munashqanno kapäkunkipaq.
6Jesucristupitami Tayta Diospa palabranpis kayno niykan:
<<Siónmanmi cimientupaq alinnin rumita churä.
Tsay rumiqa akrashqami kaykan.
Pipis payman yärakuq kaqqa manami manakaqlapaqtsu yärakunqa>>.#Isa. 28.16.
7Yärakuqkunapaqqa Jesucristo kushikuypaqmi kaykan. Mana yärakuqkunapaqmi itsanqa Tayta Diospa palabrancho kayno qelqaraykan: <<Wayi sharkatsiqkuna <kay rumiqa manami alitsu> nir jitarishqanmi wayi esquïnan cimientuchöna churaraykan>>.#Sal. 118.22.
8Mastapis kaynömi niykan: <<Takakätsikuq y tunitsikuq ruminömi kashaq>>.#Isa. 8.14-15.
Jesucristuman mana yärakuqkunaqa Tayta Diospa palabranta mana cäsukurmi tsay rumiman takakaqno karkaykan. Tsayno kananpaqmi destinashqa karqan.
9Qamkunami itsanqa kaykanki Tayta Dios akrashqan runakuna, payta sirviq cürakuna, kuyashqan santa nación runakuna#Éxo. 19.5-6; Deut. 7.6; Isa. 43.20. y paypa makincho kaykaq runakuna.#Isa. 43.21; Tito 2.14. Paymi tsakäpakushqano kawarkaykaptiki atsikyaqman jorqushushqanki#Isa. 9.2. kuyakuq kashqanta pïmaytapis wilapänaykipaq. 10Nawpataqa manami Diospa wamrantsu kapäkurqayki. Kananmi itsanqa wamrankunana karkaykanki. Nawpataqa manami kuyapäshurqaykitsu. Kananmi itsanqa kuyapäshushqankina.#Ose. 1.6, 9; 2.23.
Tayta Dios munashqanno kawanantsipaq nishqan
11Kuyay wawqi panikuna, kay patsacho qorpanöla kapäkuptikimi#Sal. 119.19. qamkunata ruwakü lutan yarpaykunata mana rurapäkunaykipaq. Tsay yarpaykunaqa contraykimi kaykan. 12Jesucristuta mana chaskikuqkunawanpis ali kawapäkuy. Ali kawapäkushqaykita rikarmi manakaqkunata kanan jitapäshushpaykipis Jesucristo kutimunan junaq Tayta Diosta alabapäkunqa.
Autoridäkunata cäsukunantsipaq tantiyatsishqan
13Señor Jesucristuta pipis manakaqman mana churananpaq lapan mandashuqnikikunata cäsukäriy. Tsayno cäsukäriy nación mandaq rey kaptinpis 14y autoridäkuna kaptinpis. Autoridäkunatami rey churashqa fiyu ruraqkunata castigananpaq y ali ruraqkunapa favornin sharkunanpaq. 15Tayta Diosqa munan alilata rurar kawapäkunaykitami. Tsayno kawapäkuptikiqa Diosta mana cäsukuq runakuna manami wasaykita rimanqanatsu.
16Munashqaykino kawapäkunaykipaq librimi karkaykanki. Librina karpis jutsata ama rurapäkunkitsu, sinöqa Tayta Diosta sirvir pay munashqannöla kawapäkunki. 17Lapan runakunatapis respitapäkunki. Yärakuq mayikikunawan kuyanakärinki. Tayta Diosta mantsakur kawapäkunki. Reyta respitapäkunki.
Patronninta cäsukunanpaq yätsishqan
18Ashmaykuna, patronniki ali runa kaptinpis o fiyu kaptinpis respitar cäsukärinki. 19Tayta Dios munashqanno kawapäkuptiki jutsayuqtano nakatsishuptikipis ama jaqayankitsu. Mana jaqayaypa kawarqa alitami rurarkaykanki. 20Lutanta rurashqaykipita nakarqa ¿ima alitataq rurarkaykanki? Alikunata rurashqaykipita nakarmi itsanqa Tayta Dios munashqanno kawarkaykanki.
21Tsayno nakapäkunaykipaqmi Tayta Dios qayashushqanki. Jesucristo noqantsi rayku nakashqa kaptinmi tantiyakuntsi pay nakashqanno noqantsipis nakanantsipaq kashqanta. 22Payqa manami ima jutsatapis rurarqantsu ni pitapis lulaparqantsu.#Isa. 53.9. 23Runakuna ashliptinpis upälakurqanmi. Nakatsiptinpis manami juraparqantsu. Tsaypa trukanqa pitapis mana jananpaypa juzgaq Tayta Diospa makinmanmi kachaykurqan.#Isa. 53.7.
24Jesucristo cruzcho nakarmi noqantsipa jutsantsipita wanurqan. Tsayno wanurqan noqantsipis jutsa ruraypaq wanur Tayta Dios munashqanno kawanantsipaqmi. Yawarninta jicharmi aliyätsimashqantsi.#2.24 Manami qeshyalapita aliyätsimänantsipaqtsu niykan, sinöqa nakaykunapita, lakikuykunapita y jutsa ruraykunapita salvamänantsipaqmi niykan.#Isa. 53.5. 25Nawpataqa oqrakashqa uyshanömi karqantsi.#Isa. 53.6. Kananmi itsanqa Jesucristupa makinchöna kaykantsi. Paymi mitsimaqnintsi y ali rikamaqnintsi.
Currently Selected:
1 Pedro 2: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
