Popular Bible Verses from 1 Pedro 2

Share

Qamkunami itsanqa kaykanki Tayta Dios akrashqan runakuna, payta sirviq cürakuna, kuyashqan santa nación runakuna y paypa makincho kaykaq runakuna. Paymi tsakäpakushqano kawarkaykaptiki atsikyaqman jorqushushqanki kuyakuq kashqanta pïmaytapis wilapänaykipaq.

Jesucristo cruzcho nakarmi noqantsipa jutsantsipita wanurqan. Tsayno wanurqan noqantsipis jutsa ruraypaq wanur Tayta Dios munashqanno kawanantsipaqmi. Yawarninta jicharmi aliyätsimashqantsi. Nawpataqa oqrakashqa uyshanömi karqantsi. Kananmi itsanqa Jesucristupa makinchöna kaykantsi. Paymi mitsimaqnintsi y ali rikamaqnintsi.

Nawpataqa manami Diospa wamrantsu kapäkurqayki. Kananmi itsanqa wamrankunana karkaykanki. Nawpataqa manami kuyapäshurqaykitsu. Kananmi itsanqa kuyapäshushqankina.

Iti wamra chuchunashqanno qamkunapis Tayta Diospa palabranta imaypis yachakäriy. Tsaynöpami wamra winar tantiyakushqanno Tayta Dios munashqanno kawapäkunaykipaq tantiyakärinki. Tsaypaqmi Tayta Dios salvashushqanki.

Kuyay wawqi panikuna, kay patsacho qorpanöla kapäkuptikimi qamkunata ruwakü lutan yarpaykunata mana rurapäkunaykipaq. Tsay yarpaykunaqa contraykimi kaykan. Jesucristuta mana chaskikuqkunawanpis ali kawapäkuy. Ali kawapäkushqaykita rikarmi manakaqkunata kanan jitapäshushpaykipis Jesucristo kutimunan junaq Tayta Diosta alabapäkunqa.

Qamkunapis rumino kaptikimi Tayta Dios churaykäshunki templun kapäkunaykipaq y payta sirviq santu cürakuna kapäkunaykipaq. Tsaymi altarman churashqa sacrificiuno kashpantsi lapan shonquykiwan payta sirvipäkuy. Jesucristupa yanapayninwan sirvirmi Tayta Dios munashqanno kapäkunkipaq.

Jesucristupa wilakuyninta chaskikushqana kaykarqa jutsa ruraykunata kachariyna. Ama lulakäriytsu, ama ali tukäriytsu, ama chikinakäriytsu ni pipa wasanta rimapäkuytsu.

Jesucristuta manakaqman churapäkuptinpis cimientucho alinnin rumino kananpaqmi Tayta Dios churashqa. Tsayno kaykaptinqa Jesucristuman yärakäriy.

Munashqaykino kawapäkunaykipaq librimi karkaykanki. Librina karpis jutsata ama rurapäkunkitsu, sinöqa Tayta Diosta sirvir pay munashqannöla kawapäkunki.

Tayta Diosqa munan alilata rurar kawapäkunaykitami. Tsayno kawapäkuptikiqa Diosta mana cäsukuq runakuna manami wasaykita rimanqanatsu.