Mwanzo 32

Yaakhumpa onjilokotthela yoori alawe akutthanane Ezawu

1Yaakhumpa khusala arutela safwari yawe, ntarikhi khukutthanana malayikha a Nluku. 2Wakathi Yaakhumpa ooniyeeyo khuri: “Eti puuro ya anajanka a Nluku.” Aphale vaya khutthajavo nzina la Manayimu#32:2 Nzina ntthi la Manayimu lina maana la heema piiri. .

3Yaakhumpa khuwaaruma akarumeya awe yoori alokoze wa ttwiiye Ezawu nti wa Seyiiri tuniya ya Edomu. 4Khuwaaruma yoori: “Mwilawe mwamuuze mbwanaaka Ezawu yoori karumeya awo Yaakhumpa alupa toono: ‘Keekhala vaje wa Labani siikhu zawaatta mpakha leelo. 5Kinaaye mompe, apuuru, pwittipwitthi na puuzi, akarumeya aalume na aakha. Aphano kinimperekheza hapari epi mbwanaaka yoori akipokherele wooshapweyavo.’ ”

6Akarumeya apale khurutela wa Yaakhumpa khumuuza yoori: “Naalawiye mpakha wa ttwiiyo Ezawu. Nanlikha eettaka ota, ontana atthu awe miiya nne oteela okutthanana weeyo.”

7Ye khwiiya wawoova na wooshukulikha, khuwaawanya atthu apale aariina na maphanko a nyama khuntti piiri, pwittipwitthi, puuzi, mompe, na enkamiiya. 8Arettaka toowo oopuweliye yoori: “Ezawu amana ata okuumanana khushintta khuntti moote, eti kiina entta otthira.”

9Aphano Yaakhumpa khulompa araka: “Nluku wa paapa Eburahiima na Nluku wa paapa Esiyaakha, oo Nnyizinku okuuziyeeyo yoori: ‘Orutele nti wa apapazo miiyo kinttela oweettettisa saana,’ 10akinsuhi pheta yawo yawaamineya khwa nanna okikholiyeezo, miiyo karumeya awo; wakathi kaari olokhaavo muuttho Yorotaani miiyo kaathuuliye pakhora yaka paasi, aphano kapattha khuntti piiri za atthu na nyama. 11Okuusuru mmakhono wa ttwiiyaku Ezawu, maana kinimoova oteela okuula vamote na aakha apa na asimaana. 12Ila weeyo wakaahiti yoori onttela okeettettisa saana, na waattisa ojama aka nkhama mishaka za mmattima epi zihinaalakeyaaye.”

13Waari osikhu, ye khulala attaaphale. Mmaphanko wa nyama zawe khuthawulamo nyama za omwinkha ttwiiye Ezawu, 14miiya piiri puuzi zeekha na mirurumpi eshiriini, miiya piiri za pwittipwitthi na mirurumpi eshiriini, 15enkamiiya talaathiini zeekha na aanaaya awaamwa, mompe zeekha talaathiini na zeelume khumi, apuuru eekha eshiriini eelume khumi. 16Wakhula liphanko la nyama khumwinkha karumeya mmote, khuwooza yoori: “Mwilokozise, maphanko apa mwaattuwanise.”

17Otule aalokoziyeeyo khumuuza araka: “Weeyo onlawa wakutthanane ttwiiyaku Ezawu. Amana awuuzela yoori ‘Nyama epi pi zaani, wala weeyo ontta vayi?’ 18Weeyo onjipu yoori, ‘Pi za karumeyeenu Yaakhumpa, vitthu animperekhezaaye mbwana awe Ezawu, ye ontta ota nyuma weetthu.’ ”

19Khunruma otule wa phiiri na wattaatthu na apa akinoko aya aari operekhaaye maphanko a nyama, awoozaka yoori: “Amana mwikutthanana Ezawu, mooshi mwimuuze etthu moote. 20Mwihisahawu olupa yoori: ‘Yaakhumpa karumeyeenu ontta ota nyuma weetthu.’ ” Maana Yaakhumpa aari wuupuwela yoori: “Kintta onnyamaza wiiphiiriwa wa Ezawu mwaasa wa vitthu epi kilokozisiyeezo. Amana kikutthanana talili onteela okipwekherela saana.” 21Khulokozisa vitthu epile, ila ye khulala attaaphale aamakiyeevo.

Wuumana wa Yaakhumpa nti wa Peniyeele

22Osikhu otthuupule Yaakhumpa khulankha khuwaathuula aakhaawe oowiiri na a karumeya awe apale awiri aakha, na aanaawe khumi na mmote, khuwaalosa muuttho Yabokhi. 23Khuwaalosa atthu apale na vitthu zawe zooshi aariinaazo. 24Yaakhumpa khusala otthwe, khumpuwelela nlume mmote khusala oomanana mpakha ocha. 25Nlume otule ooniyeevo yoori khaari onkhitiri khumpiya n'yuunu khukurukunyuwa liphaja lawe eettaka wuumana. 26Aphano nlume otule khuri: “Okilikhe kilawe wacha.” Ye khuri: “Akinuulikha olawa ohikiparikhiyeeni.”

27Nlume otule khumuuzela yoori: “Nzina lawo o paani?”

Khujipu araka: “Miiyo ki Yaakhumpa.”

28Aphano nlume otule khutukhuru yoori: “Khunteela wiittheliwa theenya nzina la Yaakhumpa, ila nka wiitthiwaka Ezirayiilu. Mwaasa yoori weeyo woomanana Nluku na atthu khushintta.”

29Yaakhumpa khumuuza yoori: “Kakhola moolu kuuzeni nzina lenu.”

Ye khujipu araka: “Ontakha orettanne nzina laka?” Khumparikhiya attaaphale.

30Yaakhumpa khulupa yoori: “Miiyo kamoona Nluku wuuso khwa wuuso ila nalelo kiri haayi.” Tiito khutthaja nzina puuro etile la Peniyeele#32:30 Nzina ntthi la Peniyeele lina maana la wuuso wa Nnyizinku. .

31Yaakhumpa lantthamuweliye njuwa alankhaka Peniyeele eettaka okokoja muulu mmote. 32Tiito mpakha leelo atthu a Ezirayiilu khanja ntika wa nyama oluttiyeeyo liphaja, mwaasa yaari phantte ya mwiili wa Yaakhumpa waapiiweeyo khukurukunyuwa.

Currently Selected:

Mwanzo 32: eko

Highlight

Copy