Mwanzo 20

Eburahiima na Apimeleekhi

1Eburahiima aalankhiye Manre khulawa nti wa Nikeepu, khwiikhala enakatthinakatthi ya Kateeshi na Shuuri. Khuthamela theenya nti wa Keraari. 2Ottuukhule, Eburahiima aalupiye yoori Suhura nlupuwe, khupe ari muukhaawe. Aphano Apimeleekhi mfwalume wa nti aya opule, khuruma weetteliwa Suhura, ye khunthuula.

3Osikhu, Nluku khunteela Apimeleekhi khusala amuuza nkatthi wa jozi yoori: “Ontta ofwa mwaasa wa muukha otu onthuuliyeeyo, ye onaaye mannawe.”

4Ila Apimeleekhi aari ahinarapalelane muukha otule, ye khujipu: “Mbwana, onttela okuula miiyo na atthu aka woohiivo hatha paathuli? 5Ti Eburahiima aakuuziye yoori Suhura nlupuwe! Na Suhura khukuuza etthiipo yoori nlupwaaka. Miiyo karetta epo na rooho yookemaani woohijuwivo etthu.”

6Aphano Nluku khunjipu njozi nttumphule yoori: “Miiyo kajuwa yoori vitthu epi waretta na rooho yookemaani. Tiito miiyo kiwiinaneliyeeyo yoori ohikikose, pi apho kihuutakheleeni onsapa muukha oto. 7Nasaapi, onrutisele mannawe muukha oto. Ye napiyu, ontta wuulompela yoori ohifwe, ila amana ohinrutiseli kiniwuuza khweele yoori ontta ofwa weeyo na zooshi epi ziiyiye zawo.”

8Noolankha mmeesho mwaya supu, Apimeleekhi khuwaakhuwela mawaziri awe khusala awooza epile aalotthiyeezo, yo khwiiya awoova channu. 9Nawiisha, khuruma okhuweliwa Eburahiima khusala amuuzela yoori: “Niini eti oniretteliyeeyo? Kookosela ni okikwiselaka paathuli ya twampi khuluyeene nkhama eti, miiyo na atthu aka? Etthu okiretteliyeeyo khinrettiwa.” 10Apimeleekhi khumuuza theenya Eburahiima yoori: “Woopuweliye niini okirettelaka vitthu nkhama epi?”

11Eburahiima khunjipu: “Miiyo kaari woona yoori atthu a nti opu khanimoova Nluku, antta okuula mwaasa wa muukhaaka. 12Na khweele phantte kiina nlupwaaka, mwaana wa paapa ila khahiyo mwaana wa maama. Ti nanna afiyeleliyeeyo wiiya muukhaaka. 13Wakathi Nluku akilaziyeemo mmuti wa apapazaku, kaamuuziye muukhaaka yoori: ‘Safwatali kintta wuuvekela, wakhula vahali ninfiyaavo osala olupa yoori ki nlupuwo.’ ”

14Aphano Apimeleekhi khuthuula pwittipwitthi, mompe na amwiitthwaana aalume na aakha khumwinkha Eburahiima na theenya khunrutisela muukhaawe. 15Apimeleekhi khuri: “Nti opu pu waka ohiiyane shaakha, wiikhale wakhula vahali ontakhaavo.”

16Khumuuza Suhura yoori: “Kamwinkha nlupuwo nzurukhu wa feeta alufu, ajamaazo ooshi ajuwe yoori khutthekeeni hatha etthu, na ahiiyevo antakhaaye owaakhanyarela.”

17Elottelanaka, Eburahiima khulompa anvekelaka Nluku na Nluku khunvonisa Apimeleekhi, muukhaawe na ajaazi awe khwa nanna awahiyeevo wiiyana aana opheya. 18Nnyizinku aawaarettiye aakha ooshi a vaje wa Apimeleekhi yoori ahisala avokola, mwaasa wa Suhura muukha wa Eburahiima. Aphano Eburahiima khunvekela Nluku zwaamu ya Apimeleekhi, Nluku khunvonisa vamote na muukhaawe na akarumeya awe aakha yoori asala avokola.

Currently Selected:

Mwanzo 20: eko

Highlight

Copy