Mwanzo 19

Opwechiwa wa sitati ya Sotooma na wuusurukha wa Loothi

1Malayikha apale mawiri khufiya Sotooma makaaripi, Loothi aarettiye eekhaliye vanlako#19:1 Nlako wa sitati yaari puuro waazoweriweevo zaari ottakhuliwakaavo milattu na vitthu za zanshara. wa sitati ethiitile, ye nawoona malayikha apale khusala athepeeza atthirelaka. Noofiyela khukokhora khusijiti. 2Khuwooza yoori: “Ambwana zaka safwatali, kintakha mwisapuwe owaka miiyo karumeyeenu; moose moolweenu na mwilale, mwilawe meesho supuyeene.”

Yo khujipu yoori: “Khinihithajiya, fweeyo ninwahi olala vaparasa.”

3Loothi khuwaakhanyerela na kuvu mpakha yo okhupali olawa omaka owawe. Ye khurumisa wiipikhiwa etthu yoojiwa ya nnofu na khoochiwa phaawu yoohiina fwaramento, aletto apale khuja.

4Ila ahinalawe olala, eetta ota alume ooshi a sitati ethiitile waaza attunkhulu mpakha mashaapu khuzukulela nyuupa ya Loothi. 5Khusala anyakula ankhuwelaka Loothi araka: “Alume apa atiiyeeyo nnyupa mwawo mphu osikhu otthuupu ari vayi? Owaasarulele vaje apha, fweeyo nintakha niwaalalane.”

6Loothi khusaruwela vaje, khufuka nlako awe afukelaka onyoko wawe. 7Khuwooza yoori: “Safwatali ajamaazaku; mwihirette etthu eto otakhala 8Mweeyo! Miiyo kinaaye aanaaka awiri ahiniwaajuwaaye alume. Kintta owinkhani atthaapo, mwiwaarettele wakhula etile mwintakhaaye. Ila mwihiwaarettele etthu yootakhala aletto apa, ata nnyupa mwaka miiyo kiina yoowiinanela.”

9Yo khuri: “Oleevo apha! Weeyo o nletto mmuti mphu, ontakha ojinkhe ofwalume na mmuti mweetthu? Fweeyo nintta wuurettela vitthu zooziti epi naari otakhaaye owaarettela apo.” Aphano yo khunsukhuma Loothi, khusala asusela nlako awe yoori apweche. 10Nooretta toole, aletto apale khunkhola Loothi khumfutthela nnyupa khufuka nlako, 11na khuwoola maasho alume apale a Sotooma aari vanlako wa Loothi. Waaza attunkhulu mpakha mashaapu khusala apapasela nlako khuhisala asikana.

12Alume apale khumuuzela Loothi yoori: “Onaaye ajaama akina nsitati mphu? Oleemo, owaathuule aanaawo, akhwewo, muukhaawo na ooshi apale eeyiye awo, 13mwaasa aya nateela opwecha sitati eti. Nnyizinku asiila nkhuwo nwulweene wa vitthu zootakhala anrettaazo atthu a Sotooma, apha aniruma yoori nite nipweche sitati yaya eti.”

14Aphano ye khulawa owooza akhwewe, apale aari weettelaaye owaarala aanaawe yoori: “Mwileemo nsitati mphu, maana Nnyizinku onttela opwecha.” Ila akhwewe apale khusala oona nkhama nzaha.

15Lifwajiri, malayikha apale khusala amuuza Loothi antumereraka yoori: “Waakuve, onthuule muukhaawo na aanaawo oowiiri mwileemo mphu. Noohiretti toowo, amana etaka hukhumu nsitati mphu mweeyo theenya mwintta ofwa.”

16Khusala arupaza, malayikha apale khuwaakholela makhono, ye na muukhaawe na aanaawe oowiiri khuwaalawana othetekele, mwaasa wa Nnyizinku wiiyana huruma na ye. 17Paata yoolaziwamo nsitati mphule, nlayikha limote khumuuza yoori: “Tthira wuusuru ohaayi awo, na oheekese nyuma wala oheemele hatha vahali ohifiyeeni omwaako yoori ohipwetheye.”

18Loothi khujipu: “Toowo wala safwatali ambwana zaka! 19Mwakirettela saana, khukoonela huruma venkivene, khuusuru ohaayi aka. Ila onyaako khuwoolepawo, opwechiwa wa sitati eti ontta okisikana kihinafiye, na kintta ofwa. 20Kharipu apho, ewaapho sitati ttiitthiiru, kinwahi otthirela ottuukho. Hatha nkhama yeetta opushuwa, mwikilikhe kitthirele ottuukho kuusurukhe.”

21Nlayikha khujipu yoori: “Kakhupali eto ovekiyeeyo, akinteela opwecha sitati yaya eto olupiyeeyo. 22Ila waakuve olawe nasaapi ethiiti, miiyo akinretta hatha etthu, weeyo ohifiyeeni ohali onttaawo.” Tiito sitati yaya eto eniittheliwaaye Zowaari#19:22 Zowaari khwa luuka ya Meepereewu nzina ntthi lina maana a ttiitthiiru..

23Njuwa litthamuwaka na Loothi afiyaka nti wa Zowaari. 24Aphano Nnyizinku khukwisela mawe a moottho otulu, Sotooma na Komoora. 25Khupwecha sitati epile na miti zaattamananiyeeyo, na atthu aya apale aari wiikhalaamo na tthuttu yaya. 26Ila muukha wa Loothi khuzukuluwa khweekesa nyuma ohali aari olankhaawo, khuthatuwa khwiiya sanamu ya mwiinyu.

27Supuyeene Eburahiima aalankhiye khulawa puuro etile aari ottakhulanaavo Nnyizinku. 28Khweekesa phantte ya Sotooma na Komoora na miti zooshi za shiini yaya etile, khusala oona loosi la waatta leettaka otthuwela mmuti mphule nkhama njocho lookhoziwa.

29Nkatthi woopwecha sitati zooshi za tuniya etile, Nluku khufikhiri etile aavekeliweeyo ti Eburahiima, khumuusuru Loothi vakatthi wa pala yaarettikhaniyeeyo sitati etile aari wiikhalaaye.

Ojama wa Loothi, na nchina la Amowaabu na Amooni

30Loothi eetta woova wiikhala Zowaari, khuthama na aanaawe oowiiri khusala eekhala omwaako. Oottaatthu khusala eekhala nlikurakuza.

31Siikhu moote, mwanawe otu nwulu khumuuza otu nttiitthi yoori: “Papeetthu ooluvala na nti opu niriiyo khaamo alume oonirala yoori niwaapatthe aana, nkhama enrettikhanaazo olumwenku wooshi. 32Nlawe nithuule viinyu ninnywise papeetthu ahapaliwe, niwahi orapalelana anivokolele aana, yoori ojama wa papeetthu ohiishe.”

33Osikhu otthuupule khuthuula viinyu khunnywisa papaaya, mwaana otu nwulu aya khulawa khulalana papaawe. Papantthu woohijuwi wakathi arapaleliyeevo wala alankhiyeevo.

34Mmeesho mwaya, otule nwulu khumuuza ttwiiye: “Taana osikhu karapalelana paapa, apho osikhu opu wa leelo nlawe ninhapalise na weeyo olawe warapalelane zwaamu yawo. Anivokolele aana yoori ojama wa papeetthu ohiishe.” 35Osikhu otthuupule khumwinkha papaaya viinyu swaafu ya phiiri, na ye otu nttiitthi aya khulawa khulala na, theenya papantthu khuhijuwi wakathi arapaleliyeevo wala alankhiyeevo.

36Aana apale oowiiri khwiimitthisiwa ti papaaya. 37Otu nwulu aya khumpattha mwaana wanlume khuntthaja nzina la Mowaabu, ye paapa wa amowaabu apa ariiwo mpakha leelo. 38Elottelanaka otule nttiitthi aya khumpattha mwaana wanlume khuntthaja nzina la Ben-Ami#19:38 Ben-Ami khwa luuka ya Meepereewu nzina ntthi lina maana a mwaana wa jamaayaku., ye paapa wa Amooni, apa ariiwo mpakha leelo.

Currently Selected:

Mwanzo 19: eko

Highlight

Copy