Khaazi 20

Paawulu ontta Masetooniya mpakha Kereesiya

1Nawiisha nzuuzu ntthile, Paawulu khurumisa okhuweliwa anakhiyoni, khuwaalipisela khuwaaleza, khusala alawa Masetooniya. 2Paata yoovira mmamuti mphule awaalipiselaka anakhiyoni khwa mattakhuzi menkeene khufiya Kereesiya, 3ottuukho eekhaliyeewo nyeezi mittatthu. Wakathi aari osaleelaavo opakhira yoori avikanele Siiriya, mayaahuuti khuwaza shawuri yoori amuule; tiito ye khukayiri khwiishelana orutela Masetooniya ottuukhule. 4Khuperekhiwa ti Sopaaturu, mwaana wa Piiru wa Bereeya; na ti Arishitaruku na Sekuntu wa nti wa Tizaloonika; aarivo theenya Kaayu wa nti wa Teerepe na Timootiyu, onlikha Tikiiku na Torofimu a nti wa Aaziya. 5Mamwinyi apo pi aalokoziyeeyo khusala aniweja Torowaati. 6Paata ya ovira njampo la phaawu yoohiina fwaramento, neetta olankha sitati ya Filiipe, siikhu yathaanu khuwaasikana Torowaati, khwiisha sumana niri ottuukho.

Osisimuwa wa Eetiku

7Siikhu ya mwanzo ya sumana, fweeyo khukusanyeya yoori nirafune phaawu#20:7 Orafuna phaawu opu ori apha, ona maana la njampo la mwiili na taamu ya Yinsa., Paawulu khusala attakhula awaalipiselaka mpakha osikhu layili, maana aarina ya oretta safwari mmeesho mwaya. 8Nhali naathukumaniyeemo zaarimo vimwasikhelo zawaatta. 9Shaapu mmote, aari wiitthiwaaye Eetiku, ekhaliyeeyo veettakha, khunkhola osikizi saaneene mwaasa wa tafusiiri etile ya Paawulu olepa, khukwa vatulu nyuupa ya ttaatthu ya manyupa oothatanyeliwa, khutthempiwa ari woofwa. 10Paawulu khwiishukha mpakha attaaphale aakweliyeevo, khumwaakuvela khwiinama khumpatikha, khuwooza atthu yoori: “Mwihishukulikhe, ori haayi!” 11Paawulu khuwela opheya khurafuna phaawu. Khurutela otafusiri theenya khulawana mpakha ocha, nawiisha khusala alawa. 12Aphano, khuthuuliwa shaapu otule khulawaniwa owawe ari haayi, atthu khwiiya zoowaakhurunuwa rooho.

Paawulu oniwaaleeza anamalokozela a Eefezu

13Fweeyo khulokoza mpankaya khulawa mpakha nti wa Asose ohali naari onwejaawo Paawulu, maana ettiye oniruma oretta etthiipo, ye aaviriye tuulu. 14Wakathi anisikaniyeevo niri Asose, fweeyo khumpwekherela khuwela mpankaya khusala nilawa Mitilene. 15Mmeesho mwaya, khulokha khufiya nshini ya esura ya Khiiyo, siikhu ya ttaatthu theenya khulawa mpakha esura ya Saamo, siikhu ya nne ti nifiyeevo nti wa Miletu. 16Maana Paawulu aalakeliye oheemeli sitati ya Eefezu, khaari otakha orupazawo Aaziya, aariye aakuve arutele Yeruzaleemu ehinafiye siikhu ya Takhiriima amana awahi.

17Noofiya Miletu, Paawulu khuruma olawa okhuweliwa attunkhulu a ojama wa Nluku a sitati ya Eefezu. 18Noota, ye khuwooza yoori: “Mweeyo mwinjuwa saaneene nanna kaari wiikhalaazo wakathi opule kaari vakatthi venu, waaza siikhu etile miiyo kifiyeevo Aaziya okhuno. 19Kanrumeyela Mbwana na ojipushuwisa na mishozi zaka mwaasa wa nanna kaari olupatthiwaazo ti khuntti ya mayaahuuti. 20Mweeyo mwinjuwa yoori akaalikhiye wuutafusirelani zooshi epile ziiyiye za fwayita, na osomisa vamwanttiwa mpakha nyuupa khwa nyuupa. 21Kiwaatafusirelaka venkivene mayaahuuti mpakha akereeku yoori ankhupali Nluku athupwiye na amwaamini Mbwana eetthu Yinsa. 22Nasaapi eti Rooho Ttakatthiifu enikitakhela yoori keette Yeruzaleemu, akijuweeni niini enttelaaye okirettikhanela. 23Ila kinjuwa yoori Rooho Ttakatthiifu wakhula sitati kineettaaye ye enikuuza yoori oniweekesa ohoowa na weetta nkalapooso. 24Khwa miiyo ohaayi aka khuna fwayita, ila eriina fwayita okhola khaazi eti kithawuleliweeyo ti Mbwana Yinsa, mpakha wiishisa, khaazi ya olaleya hapari zooshapweya za rehema ya Nluku.

25“Aphano khina mmote wa mweeyo kintafusireliyeeyo ofwalume wa Nluku, anttelaaye okoona theenya. 26Nakataalikha, miiyo kintukhuru leelo yoori, akina paathuli khwa taamu yenu mooshi. 27Maana miiyo akilikheleleeni oweelezani niiya ya Nluku yooshi. 28Mweettette saana na mwitthantte khuntti etile Rooho Ttakatthiifu awinkhiyeenini otthantta, yoori mwiiye attunkhulu awulu a ojama wa Nluku, otthuupo ye oozanyiyeeyo na taamu yawe. 29Kinjuwa yoori paata ya miiyo olawa enlawa zapuwe miiji za ntthuttu zite vakatthi venu yoori evulaze khuntti. 30Mweeyena ru anlawa apuwevo akina anttelaaye okarawela haakhi yoori awaathowelelise attwiizaya. 31Apho, mwijeekesele, mwifikhirele yoori khwa nyaakha mittatthu miiyo akilikheleleeni wuulipiselani wakhula mmote wa mweeyo, osikhu na nthana, na mishozi zeettaka okikwa.

32“Nasaapi eti, miiyo kiniwinkhelelani mmakhono wa Nluku na nttakhuzi la rehema lawe, linttelaaye wuujekani na owinkhani erathi vakatthi wa attakatthiifu. 33Miiyo akilazeleeni omaashokopho feeta, wala weero, ama kuwo zawatthu. 34Mweeyo mwinjuwa yoori miiyo kakhola khaazi na makhono aka yoori kiishishe othowiwa waka na wa ashirikhaaka. 35Zooshi kirettiyeezo, miiyo koosomisani yoori khwa khaazi zoolipa nina ya owaawuni apale oothowiwa, nifikhirelaka mattakhuzi apale alupiyeeyo Mbwana Yinsa yoori: ‘Wooparikhiyiwa ti otule aninkhaaye zayita otule aninkhiwaaye.’ ”

36Paata ya olupa toowo, khukokhora vamote na anakhiyoni apale khusala alompa. 37Ooshi khusala alila, na ompatikha Paawulu. 38Yo aari oohuzunikha venkivene mwaasa wa nttakhuzi awooziyeeyo yoori: “Khaari oteela woonana theenya.” Aphano yo khumperekha mpakha mpankaya.

Currently Selected:

Khaazi 20: eko

Highlight

Copy