ZEKHARIAH 9
9
Pei ng’leng ah Pakhui gui am khoicha nak
1Shin cu Bawipa ah ng’thu ah kyak ci.
Ani naw Hadrak khaw la Damaskas mang gaw cu m’kyuk ci. Bawipa naw Israel khaw bäng ah kä kyak ci, Siria mang gaw phi khäm ci. 2Hadrak awn khawgii ciah Hamath khaw phi khäm ci, Tire la Sidon mang gaw gui ah abä nak avan phi khäm ci. 3Tire naw mät ah phäh ah gaw k’paang sa ne, m’vut khui chü ah da ciah ghui ngui ng’peeih cu m’küm ci. 4Cun ung phi ani ung om ci phung avan cu Bawipa naw heng yawp khai. Ani ah khawh chaam avan cu tuinu ung shum yawp khai, mang gaw phi m’dek ung khiit khai ah mei awn m’khih khai.
5Ashkelon mang gaw naw acun hmu neta kyi kyawk khai. Kaza mang gaw naw acun hmu neta, geinvai ne m’neh khai. Ekron mang gaw la ang ngai u avan phi payak khai. Kaza ghangpughang phi maih khai, Ashkelon mang gaw phi ang gawng ah om khai. 6Ashdod mang gaw ung changpakhui gui ng’caw ne om khai gui. Bawipa naw, “Philistin chang gui ah chang ah ng’shei nak avan cu ka hnim khai nei. 7Ngami naw asi om ciah asa cu kä ei khai gui, ami hlawi sak gui phung kä ei khai gui. K’pawih ci gui ami van cu kei ah chang ah kyak khai gui, Judah pakhui ah pa ng’pai tumat ah mäih ah kyak khai gui. Ekron gui phi kei ah chang ah kya u ne, Jebusit ah mäih ah kyak khai gui. 8Kei naw ka khaw cu ka ngäng khai. Gakap gui naw kä kaan khai gui ah ka k’pang khai. Chang shedam na man ci naw phi kä shedam naba gui khai. Ka chang gui A i hlawk ah ami khüikha cu ka hmu pyi ci nei.”
Ma ung Lawk khai ah Ghangpughang
9Zei vä, yei vä, Zion Chang gui,
Zei ne m’lau vä,
Jerusalem Chang gui!
Ani cu m’khüt nak la
näng nak awn lawk ci nei!
Teng vä, nami ghangpughang cu
lawk ci nei!
Cun ung phi m’lung neim nak awn
Ng’sehta ng’cuum ne lawk ci,
cun cu Ng’se am ca hta,
ng’se a nu ah a hta ah kyak ci.
10 Bawipa naw,
“Kei naw Israel ungka
ng’tuk nak ah yatha gui la
Jerusalem ungka ng’se gui cu,
Ka lak khai nei;
Ami ng’tuk nak ah li gui phi
Ka m’di khai nei.
Nami ghangpughang naw
chang pakhui gui ah ng’lung ah
dimdeeih nak bik khai nei;
Ani naw
vang tuinu ungka naw vang tuinu,
Euphratis tuinu ungka naw,
khaw cawi ah khüt khai ah,
uk khai nei” cik ci.
Khanpughi ah Chang gui M’thawh Ba nak
11 Bawipa naw,
“Küikyan nak ah si awn m’hnüt ne,
Nang awn thukhän ka bi ah hmawk ah
Na chang gui cu
ka m’hlawt gui khai nei —
Tui kä om ciah khui chawng ungka,
Ka k’phyawn gui khai nei.
12Law ba vä,
ami k’täm ah chang gui,
Tuhbäi nami ngaih u vai om ci nei;
Phyawn nak ah nami hmun ung
law ba vä.
Tuhbäi kei naw
ka ning m’thein gui cu,
Nami geinvai nak avan ah khan ah,
a goi ah hriham
ka ning pe gui khai nei.
13Kei naw Judah gui cu
Gakap ah li ah mäih ah,
Israel gui cu
Gakap ah m’la ah mäih ah,
ka mang khai nei.
Kei naw Zion chang gui cu
Kreece chang gui tuk nak vai ah
Khim ghaat ah mäih ah
ka mang ba gui khai.”
14 Bawipa cu
a chang gui ah khan ah
ng’dang lawk khai;
Ani naw am’la gui cu
khaw lailäp ah mäih ah kap khai.
Uk ciah Bawipa naw
phyung heng tum khai;
A htumtäng ah ka
puikhaw ah khi ne lawk khai.
15Hlüngtai ciah Bawipa naw
a chang gui cu shung vong khai,
Ngami naw ami ga gui cu
m’di khai gui.
Ngami cu awktat ciah mäih ah
ng’tuk nak ung
ng’hawh shaak khai gui.
Ngami naw ami ga gui ah si
k’theh khai gui;
Cun cu ng’ghu thaa nak ah
si ah mäih ah long ne,
K’pawng ungka sonkiang ung
yu long khai!
16Cun ah hnüüp a gawk law ung,
Bawipa naw a chang gui cu,
Htoshäm naw htome gui
kyihkyawk nak ung
a hun gui ah mäih ah
hun gui khai.
Ngami cu ani ah khaw ung
pyülung lukhu ah mäih ah
ng’shü khai gui.
17Cun ah khaw cu a i hlawk ah
ni ne kyom khai aw!
Chang nong gui cu
cun ah khaw ungka htang m’guh la
sapyit tui awn
däm ng’ghaw khai gui.
Currently Selected:
ZEKHARIAH 9: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
