ZEKHARIAH 8
8
Jerusalem M’thawh Ba vai ah Bawipa naw Shaitak ci
1Hlüngtai ciah Bawipa naw shin ah ng’thu cu Zekhariah am pe lawk ci. 2“Kei naw a chang gui thuuk ciah ka m’hni nak awn Jerusalem cu ka m’htei khai ah ka k’bäi ci nei. Cun ah m’hni nak cu a ga gui ah na m’lungshe nak sak ah kyak ci nei. 3Kei cu theing ciah ka mang gaw Jerusalem ah ka hteit ba khai, a cu ah ka om khai nei. Cun ah mang gaw cu bekhüt ciah mang gaw ah hmat khai gui, hlüngtai ciah Bawipa ah khawgui gui cu, theingthap ciah khawgui ah khü khai gui nei. 4Pami ghipa gui la hnumi ghipa gui cu ng’shopawng awn ng’shaw ne hteit u ne, mang gaw ah ang lung ung ngok ba khai gui nei. 5Lam gui ung phi hnumi hta pami hta gui be ne gü ng’lah ba khai gui nei.
6“Shin cu tuhbäi om shüt ciah changpakhui gui ah hmawk ah kä hmat hning vai ah a kyak ung phi, kei ah hmawk ah hmat vai ah kyak ci nei. 7Ka chang gui cu hteh püi ne ami om sak nak gui ah khaw ungka, ka gung gui khai nei. 8Jerusalem ung om ba khai gui ah akhei, ak kyang ung ah ka law püi ba gui khai nei. Ngami cu ka chang ah kyak khai gui, kei cu ngami ah Khanpughi ah ka kyak khai, Bekhüt nak la taga nak awn ka uk gui khai.
9“K’thamah vä! Nangmi naw tuhbäi, Taigüim cawh ba vai ah lung k’tung ng’lin yah ung, prophet gui ah acun ah ng’thu bä cu nami ng’ya ba ci nei. 10Kä cun pha ung m’khüt hning ci a u kä om ci, chang phi kä om ci, sei saya phi kä om ci. A u phi ami ga gui ah kut ung phyawn sak gui ci kä om ci. Chang gui tumat la tumat ka ng’hnungtuk sak gui ci. 11Cun ung phi tuhbäi om ba ci gui ah pakhui ah khan ah a hnga ah kei naw ka bik ci. 12Ngami cu ding gei sei ami m’shi geit khai gui, ami sapyit gui cu m’theih khai gui, khomdek naw akda vauipai sak khai, khawtui phi nik khai. Kei naw shin ah hriham gui cu k’pawih shut ciah ka changpakhui am ka pek khai. 13Judah la Israel chang gui! Yanä ung, a khawhei chang gui ami mät ng’plah tu u ne, “Judah la Israel ah khan ah gawk ciah leigai cu nami khan ah gawk sä!” ci man ci gui. Cun ung phi kei naw ka ning hun gui khai nei, Cun ung a khawhei chang gui cu ami mät gui, ‘Judah la Israel chang gui ah gah ah mäih ah hriham cu gah vä! Cik khai gui nei!’ Cun ah kyasei k’thamah vä, kä kyi en vä!”
14Hlüngtai ciah Bawipa naw, “Nami pupa gui naw ami na m’lungshe sak yah ung, ngami ah hmawk ah leigai ka pawng püi ci, ka m’lung kä ng’thawng ci, ka pawng püi gui cu ka law püi ci. 15Cun ung phi tuhbäi Jerusalem ah Judah chang gui cu hriham ka pe gui khai ah ka pawng ci. Cun ah kyasei kä nami kyih vai. 16Nangmi naw nami bi gui vai cu: tumat la tumat k’cang nak ng’thu nami pyen vai. Yung ah m’kawt ung phi düng ciah nami bi vai, acun naw dimdeeih nak law püi ci. 17Akshe ah kä nami ng’u hneit tu vai. Hleei pyen ne kä nami ng’phyun vai. Kä ng’düng ci, hleeihlak la m’ghä m’ce nak cu kei naw ka thüi nak ci.”
18Hlüngtai ciah Bawipa naw, Zekhariah am ng’thu a pek cu: 19“Acha phli nak, a cha hma nak, a cha chih nak la a cha gha nak ung ei hlawinak cu Judah chang gui ah hmawk ah yeikyai nak, hüithaw nak ah mang pawi ah kyak khai nei. Nangmi naw ng’düng nak la dimdeeih nak nami m’hni vai nei.”
20Hlüngtai ciah Bawipa naw, “A mang gaw päng ungka chang gui Jerusalem ah ami ng’bum law nak vai ah, a khin cu gawk lawk ci nei. 21Mang gaw tumat ungka lawk ci gui naw, a hei ah ka lawk ci gui am, ‘Keimi cu hteit ne hlüngtai ciah Bawipa kami khawihnah khai nei, a hriham dou vai ah kami taigü khai nei, keimi awn atäng ah law tu vä!’ 22Chang akda la huham mah ciah pakhui gui cu Jerusalem ah law u ne, Hlüngtai ciah Bawipa cu khawihnah u ne, a hriham dou vai ah taigü khai gui nei. 23Cun ah hnüüp ung a khawhei chang, chang sing gha cu, Jew chang tumat ah law u neta, “Nang ah bä nak cu kami ng’pai tu hlük ci nei, a i ah kyasei ci ung, ‘Khanpughi cu nang awn atäng ah om ciah kami ng’yak ci nei, cik khai gui’” cik ci.
Currently Selected:
ZEKHARIAH 8: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
