ZEKHARIAH 3
3
Prophet naw Ang Mang ung a Hmuh ah Taigü Tung
1A hei ka ng’mang ung Bawipa naw ana m’hnuh ba cu, Taigü tung Joshua cu Bawipa ah khanchang ah ma ah ng’düi ci. Joshua a pei ah ani hnungtuk püi nak vai law püi ge khai ah Satan cu ng’düi ci. 2Bawipa ah khanchang naw Satan am, “Satan, nang cu Bawipa naw ning m’kyuk sä! Jerusalem m’hni ciah Bawipa naw ning m’kyuk sä. Shin ah chang cu mei bum ungka lak ah mei tawn ah mäih ah kyak ci nei” cine kyak nak ci.
3Joshua cu suishe sui ne acun ung ng’düi ci. 4Khanchang naw acun ung om tuk ciah a chang gui am, “Shin ah chang ah suishe cu suut ne ghawt vä” ci neta, Joshua am, “Na katnak ka ning ghawh pe pyi ci, na sui vai sui akthai ka ning pek khai” cik ci.
5Ani naw cun ung om ci gui am thumkhän ne, Joshua ah lu ung lupawng theing ami pek vai pyen sei, acun ah pek ci gui. Cun kawn ah ani am sui akthai m’sui ci gui, cun yah ung a pei ah Bawipa ah khanchang ng’düi ci.
6Cun kawn ah khanchang naw Joshua am, M’gäi ciah 7Bawipa ah ng’thu am thein cu, “Ka thukhän läk ne ka ning täkphan cu na bi ah a kyak ung, nang cu ka Taigüim la ka mang kiang uk ciah na kya gäk gäk khai. Ka ma ah om ciah khanchang gui ah taigü ka ngaih ah mäih ah nang ah taigü cu ka ngai khai. 8Joshua aw, ngai ä, nang cu taigütung ah na kyak ci; ani ah ak taigü paw gui phi ngai vä, nangmi cu ngawi ah akni law vai nami m’dang ciah nami kyak ci. Kei naw ka changshäm ka ng’dang sak khai, ani cu angban ah khü ah kyak ci! 9Kei naw Joshua ah ma ah chih mawng nak ciah lung tumat ka m’shän khai. Cun ah lung vüt ne ca ka guk khai, shin ah khaw ah katnak avan cu khaw hnüüp ät awn ka k’täm yawp khai. 10Cun ah hnüüp a gawk law ung, nami im ng’phei gui nami khü vai, law u ne, yeikyai ding gei ngaih gep u sei, nami sapyit shun la thei ghing gui naw ning koi gui khai.”
Currently Selected:
ZEKHARIAH 3: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
