ZEKHARIAH 2
2
Ang Mang ung a Hmuh ah Nüt nak gui
1Cun kawn ah kei naw a kut ung nüt nak vai ah gui kawt ciah chang cu ka hmu ba ci. 2Kei naw, “A hawi na hteit khai?” cine ka ng’shik ci.
Ani naw, “Jerusalem cu a yun a i güt, akdang a i güt, a law ah hmuh vai ah ka nüt khai” cik ci.
3Cun kawn ah kei na ng’thu püi ciah khanchang cu vang hlat vüba khäta, a hei khanchang cu ani hmuk khai ah lawk ci. 4Law htük ci naw tumat am, “Dawng ne hteit ne nüt nak gui kawt ciah chang nong am na m’thein vai cu, Jerusalem ung chang akda, ui vawk ai akda om lawk khai kyasei, akdäm ah ng’vong k’pang vai kyak khai nei. 5Bawipa amät naw shai ataak cu, ani a mät cu mei-k’paang ah kyak ci, mang gaw veing ne shungvong ciah kya ne, acun ung a bämang nak avan awn angtäi ah om khai, ciah kyak ci.”
Chang K’dawng gui Im ah Ami Law ba vai ah Khü gui ci
6-7 Bawipa naw a hang gui am, “Kei naw khaw ng’nü ung ka ning püi sak gui ci, cun ung phi tuhbäi nang chang k’dawng gui, Babilonia ah ka gawt law ne, Jerusalem ah nami law ba ci. 8Nangmi ning ng’tuk püi gui ci cu, kei ah ka, aknipikbäih ng’tuk püi ciah kyak ci” cik ci.
Cun ah kyasei M’gäi ciah Bawipa naw shin ah ng’thu na m’kan ne, a chang gui m’di ciah pakhui gui ah om nak ah ana tüih ah kyak ci. 9“Bawipa amät naw nangmi cu ning ng’tuk püi gui khai, nami changshäm man naw nangmi cu ning m’di gui khai.”
Shin gui a kyak awn ah, M’gäi ciah Bawipa naw, kei cu ana tüih law ah chang päng naw hmat lawk khai nei.
10 Bawipa naw, “Jerusalem chang gui aw, yei ne ng’äi m’cu vä! Kei cu nami ng’lung ah ka om khai ah ka lawk ci ne!” cik ci.
11Cun sangung changpakhui akda cu Bawipa ah law u ne, ani ah chang ah kya lawk khai gui. Ani cu nangmi ah ng’lung ah om khai, nangmi ah om nak ah kei ana tüih law cu nangmi naw nami hmat lawk khai. 12Judah cu Bawipa ah a khaw theing ung akbä pi a khawh cham ah kya ba khai. Jerusalem cu mang gaw avan ungka, am hni pikbäih ah kyak khai.
13 Bawipa ah ma ah chang ng’nü cu a düm ah om sä, ani cu theingcim ciah hmun, a om nak ungka naw law sang ci nei.
Currently Selected:
ZEKHARIAH 2: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
