ATÜNNAK 34
34
Dinah Ami Phyeit Pyei
1Hnüüp ät ung Jakob la Leah ah hta hnumi Dinah cu Kanaan hnumi ah va pyä tuk ci. 2Cun ah khaw uk ciah Hivit pakhui Hamora ah hta Shekhem ami ng’vaipi naw ani cu hmu neta phye ne k’pyei ci. 3Cun ung phi hnumi hta cu kyom ciah hmu law neta ani cu m’hni lawk ci. 4Cun ah m’hni law neta apa am, “Shin ah hnumi cu ka chu vai ah na beik peä” cine k’thäh ci.
5Jakob naw a hta hnumi kä a yei cu hmat ci, cun ung phi a hta pami gui ami van seime gui shäm ne, bung ah om sang ci gui kyasei a i kä pyen ne om ci. 6Shekhem ah Hamor cu Jakob ng’thu püi khai ah lawk ci. 7Cun yah ung Jakob ah hta gui phi bung ah kaa law ba ci gui. Shekhem naw ami bee pyei ne, Israel pakhui a yawshe nak gui cu hmat law u neta ang htei ah thüi ne m’lungshe ci gui. 8Hamora naw Jakob am, “Ka hta Shekhem naw na hta hnumi cu m’hni tuk ci, ng’pui ng’khah sak goi ä” cik ci. 9Keimi pakhui la nangmi pakhui mi ng’kawi vai ah mi ng’ge khai nei. 10Kami khaw ung keimi awn a täng ah nami om tu vai, na om nak hlü ah hmun ung na om vai, na m’hni ah na sumlei vai, na m’hni ah khawh na kian vai” cine pyen ci.
11Shekhem naw Dinah la apa ni, a phäi gui ni am, “Ka k’thäh cu na ngaih pe vä, a i phi ka ning pe gui khai nei. 12Nami ng’yak hlü na m’thein vä, maan phi nami pyen ah ka ng’lo khai nei. Nami hta hnumi awn nami na ng’pui khah sak ah khoi ung a i phi nami pyen päng ka ning pe gui khai nei” cine pyen ci.
13Shekhem naw ami bee Dinah ak shedam nak cu Jakob ah hta gui naw kä yum u neta Shekhem la apa cu kahta na ne ng’thu püi goi ci gui. 14Ngami naw, “Kami bee cu vun aat ne kä ng’kyon ciah chang awn kä kami ng’pui khah sak hlawt khai, cun cu thui ng’aa nak vai ah kyak khai. 15Nangmi cu pami avan naw vun aat tu u ne, keimi ah mäih ah nami om tu ah a kyak läi ung kami yum khai nei. 16Cun ah a kyak ung mi ng’kawi khai, keimi cu nangmi awn a täng ah om tu u ngä sei, pakhui ät ah mi kyak khai. 17Kami pyen cu kä yum ne, vun aat ne ng’kyon vai ah phi kä nami yum ah a kyak ung, kami bee hteh ba püi ne kami hteit ba khai” cine kyak ci gui.
18Cun ah ami pyen cu Hamora la a hta Shekhem naw yum ni neta, 19Shekhem naw Jakob ah hta hnumi phi m’hni aih neta, ang ghit ah vun-ah nak cu bik ci, ani cu ami kyong khui ung aküikyang pi ah kyak ci.
20Hamora la a hta Shekhem naw, ng’hmuh teng nak ah hmun, mang gaw m’kawt ung hteit ni neta, ami chang paw gui ah ma ah ng’thu ani pyen cu; 21“Paw chang gui aw, shin ah chang gui cu chang k’ni gui nei, mi khaw ung mi om tu sak gui khai nei, bilo sumlei ne om tu u sä, mi khaw phi ng’shawng ei ci nei. Ngami ah hta phi mi chu na kaw, mikmi ah hta phi chu na u sä. 22Cun ung phi mikmi pami avan naw, ngami ah mäih ah vun aat ne mi ng’kyon tu ah a kyak ung, mikmi awn pakhui ät ah kya ne om tuk khai gui kyak ci nei. 23Ngami ah seime la khawh chaam avan cu mikmi ah kaa ah kyak khai ah kä kya ne ang? Cun ah kyasei mikmi naw mi yum ung ngami cu mi ng’lung ah om tuk khai gui nei” cik ci goi. 24Cun ah ani pyen cu mang gaw ung chang avan naw yum tu u sei, ngami cu vun aat ne ng’kyon tuk ci gui.
25Hnüüp thum lung sei chang gui cu vun ami ah nak m’neh lä u khäta, Jakob ah hta goi Simeon la Levi, Dinah ah bee goi naw, ani m’gan la ni ne, mang gaw kyong ah lut ni neta kä geing na ne om ciah chang pami gui cu ngawn yawp ci goi. 26Hamora la a hta Shekhem phi ngawn ni neta, ami bee Dinah cu Shekhem ah im ungka la ba ni ne, hteh püi ba ci goi. 27Cun kawn ah Jakob ah hta gui cu ami bee ami m’thüi ah phäh ah phu tuk khai gui ah law ba mä ci gui. 28Ngami naw ami htawme, me, sei, m’na gui la pigaw kyong pigaw k’pung ung khawh avan cu la yawp ci gui. 29Ngami naw a phu küi avan, hnumi nau sen avan la im khawh avan phi la yawp ci gui.
30Jakob naw Simeon la Levi am, “Kei cu nami na yaica sak ci nei. Kanaanit chang gui la Perizzit chang gui ni, shin ah khaw ung chang avan naw na gen lawk khai gui nei. Mikmi cu mi ken ci, ngami chang akda naw ng’lung na ne ami na tuk gui ah a kyak ung, mi im bung ah mi di khai nei” cik ci.
31Ngami naw, “Keimi ah bee cu chang pawmzau ah mäih ah chang naw a lawi nak vai cu kä kami yum khai nei” cik ci gui.
Currently Selected:
ATÜNNAK 34: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
