ATÜNNAK 33

Jakob naw Esau Hmuk ci

1Jakob naw Esau cu chang phia phli khah püi ne law sei hmuk ci. Cun ah kya khäta a hta gui cu, Leah la Rebekka ni, a changshäm gui ni am k’pai gui ci. 2A changshäm gui la ami hta gui cu ma sak gui ne, Leah la a hta gui ni tawi u sei, Rebeeka la Joseph cu hnu ni sei hteit ci gui. 3Cun kawn ah Jakob cu ma ne hteit neta, m’dek ung chih vei kawp ne a phäi cu ng’paa nak ci. 4Esau cu dawng law neta Jakob cu kyawp ne ng’ui sei ani nik hnih kyap ci goi. 5Esau naw hnumi gui la a hmaw gui cu hmu law gui neta, “Shin ah na khah püi gui cu a u gui ang?” cine ng’shik ci.

Jaokb naw, “Ka bawi aw, shin ah a hmaw gui cu Khanpughi naw bä ne ana pek ah kyak ci nei” cine m’shang ci. 6Cun kawn ah a changshäm gui la ami hta gui cu law ne kawp lawk ci gui; 7Leah la a hta gui law u sei, Rebekka la Joseph ni phi law tu u sei ami van ama ah kawp ci gui.

8Esau naw, “Shin ung ka hmuh vai ah na law püi gui shi a i vai ang? A i ah na ci hlü ang?” cine ng’shik ci.

Jakob naw nang naw na yei nak vai ah ka bi nei” cik ci.

9Esau naw, “Ka nau aw, kei ung a päng om ei ci nei, na kaa cu na mät naw kaa ei na ä” cik ci.

10Jakob naw, “Na bä ni, ka phäi aw, nang ah yei nak ka hmuh nak vai ah shin gui cu na dou pe ä. Nang naw na na yei nak cu kei ah hmawk ah Khanpughi ah hmai hmuh ah mäih ah kyak ci nei. 11Na bä ni, nang ah hmawk ah ka law püi ah shin gui cu na dou peä, Khanpughi naw a päng küm khai ah kei cu na m’gein ci nei” ci neta Esau naw kä a dou pha a chuih Jakob naw pek ci.

12Esau naw, “Mi hteit ei khai nei, kei ma ne ka na hteit khai nei” cine pyen nak ci.

13Jakob naw, “Na hmat ah mäih ah a hmaw gui cu cümbawng ci gui. Seime gui la ami hta gui phi züt ci gui. Hnüüp ät ge awn gawk vai ah hteh ah khoi ung ngami cu si yawp khai gui nei. 14Nang cu ana ma ei ba ä, kyäp kyäp ah kami lawk khai nei. Na om nak Edom khaw ah gawk law püi gui ne a hmaw gui la seime gui cu ka law püi gui khai nei” cine pyen ci.

15Esau naw, “Ka chang amshah ka ning nawng pe shüt khai nei” cik ci.

Jakob naw, “Na mät ah yum ah kya sä” cik ci. 16Esau cu a cu hnüüp Edom khaw ah gawk ba khai ah ng’hlat ne hteit ba ci. 17Cun ungka naw Jakob cu Sukkoth ah gawk neta, amät ah phäh ah im co ne, a seime gui ah phäh ah sei im co ci. Cun ung tün ne cun ah hmun cu Sukkoth ah mingthang ci.

18Jakob cu Mesopotamia ah kaa a law ba lam ah Kanaan khaw Shekhem mang gaw ah gawk ne, a cun ah gaw pei ah im co ne om ci. 19Ani naw Shekhem ah pa Hamora ah htangshon gui ah ami khaw amshah cu ngui phia awn thong ba ci. 20Ani naw a cun ung khawih kiang co neta, “El, Israel Khanpughi” ciah a ming sui ci.

Currently Selected:

ATÜNNAK 33: CBC

Highlight

Copy